Байден & Макрон.

Құрама Штат билігін жақында ғана қолына алған Жозеф Байден француз әріптесі Эммануэль Макронмен телефон арқылы сөйлесті. Екі ел лидері ынтымақтастықты дамытуға келісті.

Франция президенті Байден Ақ үй тізгінін қолына ұстағаннан кейін телефон арқылы сөйлескен алғашқы шетелдік әріптестерінің бірі. Бұдан бұрын ол Британ және Канада үкіметінің жетекшілерімен сөйлескен.

Ақ үй баспасөз қызметінің ақпарат құралдарына таратқан мәліметіне қарағанда, телефон арқылы сөйлесуде Байден Құрама Штаттардың «ең көне одақтасы» Франциямен жан-жақты келісімді дәстүрлі түрде дамытуға тырысатынын жеткізген.

Франция президенті Макрон да Құрама Штаттармен бұған дейін түзілген барлық келісімдерді дамытып, оған қоса АҚШ-тың ЕО мен НАТО құрамындағы әрекеттеріне қолдау көрсетуге дайын екенін жеткізген.

Байден мен Макрон арасындағы сөйлесуде екі ел қатынастарынан тыс климаттың өзгеруі, жаһандық экономиканы дамыту, пандемияға қарсы әрекет ету мәселелері де сөз болған.

Айта кетейік, Байден билігі АҚШ-тың алыстай түскен одақтастарымен қарым-қатынасын реттеп, халықаралық келісімдерге қайта қосылмақ. Оның арасында «Париж келісімі» де бар.

“The Qazaq Times”