![](https://qazaqtimes.com/kk/content/uploads/2020/03/H20180326000253-800x480.jpg?token=c948d0cc8baee433b08fa0dae545be95)
Израиль коронавирус пандемиясымен күресте лаңкестікке қарсы құрылғыларды қолданбақ. Бұл туралы ел премьер-министрі Биньямин Нетаньяху хабарлады.
Шетелдік басылымдар Израильдің бұл қадамын «миға қонымсыз, күлкілі әрекет» деп сынға алған.
Израиль премьер-министрі сөзінде: «Біз дертпен күресу үшін барлық шараны қолға алып жатырмыз. Енді үкімет қажетті техникалық құрал-жабдық туралы шешім қабылдайды. Денсаулық сақтау министрлігі лаңкестікке қарсы күресте қолданылатын цифрлық технологияны пайдалануды сұрап отыр. Біз оны азаматтық мақсатта қолданған емеспіз. Бірақ қазір жағдай осыны талап етіп отыр», – дейді.
Қазіргі уақытта елде дәмхана, мейрамхана, спорттық орындар және азық-түліктен басқа барлық дүкендер жабылды. Ресми Тель-Авив шетелден келген азаматтардың барлығын 14 күнге өзін өзі оқшаулауға міндеттеген. Соңғы деректер бойынша, Израильде 200 адам вирус жұқтырған.