Басын бәйгеге тіккен дамушы елдер. Дүниежүзілік банк 100 елге қарыз беріп, қоржынын босатпақ, Фото: World Bank арнасы / Үoutube

Коронавирус індетінің кесірінен әлемде 60 миллионға жуық адам кедейлікке ұшырауы мүмкін. Дамушы елдер қайта қарызданбақ.

Дүниежүзілік банктің басшысы Дэвид Малпасс 19 мамырда пандемия дағдарысының салдары туралы болжамын бөлісті.

Бас банкир банк жүйесіндегі бағалау бағаны экономика 5%-ға құлдырап, «терең рецессияға ұшырайтынын» айтады. Оның сөзінше дағдарыстың зардабын жеңілдету үшін әлем банкі дүние жүзінің 70% халқы өмір сүретін 100 дамушы мемлекетке несие беруді жоспарлап отыр. COVID-19 вирусы және дағдарысқа қарсы көмек сұрап отырған 39 ел Африка құрлығынан. Қарызға берілген қаражат денсаулық сақтау бағдарламасы, экономика жүйесі және әлеуметтік қорғау-қамсыздандыру саласына бағытталады деседі. Осылайша, Дүниежүзілік банк 15 айдың ішінде, яғни келесі жылдың ортасына дейін 160 млрд доллар несие бермек. Қазірдің өзінде Өзбекстан, Пәкістан, Тунис, Филиппин т.б. тәрізді 33 ел келісімшарт жасасып, транзакция аударымын жүргізіп жатыр. Аталған елдердің тізімінде Қазақстанның бар-жоғы әлі белгісіз. Бірақ экономистер күллі әлемді тығырыққа тіреген індетпен ілесе келген несиенің мемлекет қазынасына салқынын тигізетінін жоққа шығармайды.

Былтыр сәуірден бері Дүниежүзілік банкке басшылық етіп келе жатқан Дэвид Мальпасс. Фото: Simone D McCourtie / Дүниежүзілік банк

2015 жылғы есеп бойынша, әлем халқының 10 пайызы немесе 734 миллион адам күніне 1,90 доллардан аз ақшаға кедейшілікте өмір сүреді. Пандемия кесірінен енді кедейлер саны 800 миллионға жетуі мүмкін көрінеді.

Былтыр желтоқсан айының соңында Қытай билігі Хубэй провинциясының Ухань қаласында қалай пайда болғаны белгісіз вирус тарала бастағанын хабарлаған еді. Сарапшылар мен мамандар мұны коронавирустың жаңа түрі 2019-nCoV (кейіннен SARS-CoV-2),  COVID-19 деп атаған. Дүниежүзілік денсаулық сақтау ұйымы қауіпті кесел 114 елде 118 мың адамға жұққан кезінде, биыл (2020 жыл) 11 наурызда вирусты жаһандық індет (пандемия) деп жариялады. Екі жарым айдың ішінде кейстер саны 10 мыңнан 5 миллионға өсті.

"The Qazaq Times"