8 تامىز، سەنبى كۇنى تۇسكە قاراي استاناعا ىرگەلەس (اقمولا وبلىسىنا قارايتىن) تالاپكەر اۋىلىندا بيىل اباقتىدا قازا تاپقان ازاماتتىق بەلسەندى، مارقۇم دۋلات اعادىلدىڭ اسى ءوتتى. جيىن بارىسىنان حابار تاراتىپ جاتقان باق جانە بەلسەندىلەردىڭ مالىمەتىنە قاراعاندا، رەسپۋبليكانىڭ ءار وڭىرىنەن ازىرگە ەكى جۇزدەن ارتىق ادام كەلگەن. ازاتتىقتىڭ حابارلاۋىنشا، اۋىل سىرتىندا پوليتسيا كولىكتەرى مەن اۆتوبۋستارى «ساقاداي ساي» تۇر.  

اعادىلدىڭ قاراشاڭىراعىنىڭ الدىنا ءۇش اقبوز ءۇي تىگىلىپ، داستارحان جايىلعان، ءار ءۇيدىڭ بوساعاسىندا تۋ كوتەرىلگەن. باستى باننەر مەن كورنەكى پلاكاتتاردا قازاقستاننىڭ كارتاسى، بەلسەندىنىڭ سۋرەتى مەن «08.08.2020» دەگەن جازۋ بەينەلەنگەن.

ەسكە الىپ، دۇعا باعىشتاۋ شاراسىنا جينالعاندار الدىندا مارقۇمنىڭ اناسى گۇلباراش جولمۇحانبەتوۆا، ايەلى گۇلنار قاسىمحانوۆا جانە بەلسەندى جانات نۇركىشەۆ اعادىل ءولىمىنىڭ «ەرتە اياقتالعان» تەرگەۋى جونىندە ءسوز سويلەپ، پروكۋراتۋراعا جازىلعان ارىزدى وقىپ بەردى، – دەپ حابارلايدى ازاتتىق.

اقپان-توقپاندا ازاماتتىق قوعامدى اياقتان تۇرعىزعان اعادىلدىڭ رۋحىنا ارنالعان اسقا پوليتسيا وكىلدەرى، تالاپكەر اۋىلىنىڭ اكىمى مەن سانيتار دارىگەرى كەلىپ ەسكەرتۋ جاساماق بولدى. بىراق حالىق نارازىلىق بىلدىرگەن سوڭ، ولار ەشنارسە ايتپاستان كەرى بۇرىلىپ، كەتىپ قالدى.​ اسقا جينالعان جۇرت مارقۇمنىڭ بەيىت باسىنا بارىپ دۇعا باعىشتادى. جول-جونەكەي بەلسەندىلەر شەرۋلەتىپ ءجۇرىپ ءوتتى. ولار «دۋلات اعادىل»، «دۋلات باتىر!» دەپ ۇرانداسىپ، «مەنىڭ اتامەكەنىم» ءانىن بىرگە شىرقاستى. شەرۋشىلەر كوشىن ەكى قاپتالدان ارنايى جاساق ەرىپ ءجۇردى. سونداي-اق گۇلباراش جولمۇحانبەتوۆانىڭ جيىن ءوتىپ جاتقان ءۇيىنىڭ ۇستىندە ۇشىپ جۇرگەن بيلىكتىڭ ارنايى درون-كامەرالارى جينالعانداردى بەينەجازباعا ءتۇسىرىپ العان. الداعى ۋاقىتتا ەلدىڭ ءار وڭىرىنەن كەلگەن بەلسەندىلەردى پوليتسياعا شاقىرۋ-تەرگەۋ ءجۇرۋى دە ابدەن مۇمكىن. سەبەبى قازاقستاندىق قۇقىق قورعاۋشىلاردىڭ ايتۋىنشا، ەلدە اسقا كەلۋگە نيەتتەنگەن 30-عا تارتا ازاماتتى پوليتسيا ۇستاپ نە جولعا شىعۋىنا كەدەرگى جاساعان. بۇگىنگى اسقا قاتىسقانداردى پوليتسيا ۇستاعان جوق. دۇعا باعىشتاعان سوڭ جينالعاندار تاراپ كەتكەن.

دۋلات اعادىل بيىل اقپان ايىنىڭ 24-ءى كۇنى قازاقستان پوليتسياسى الىپ كەتكەن سوڭ اباقتىدا جۇمباق جاعدايدا قازا تاپقان. ازاماتتىق قۇقىق پەن دەموكراتيالىق قۇندىلىقتاردىڭ ورىندالۋىن تالاپ ەتە ءجۇرىپ كوپ رەت قامالعان بەلسەندى ءولىمىنىڭ رەسمي سەبەبى «جۇرەك قان تامىرلارىنىڭ جەتىسپەۋشىلىگى» دەپ كورسەتىلدى. دەگەنمەن كوپتەگەن بەلسەندىلەر، جۇرتشىلىق جانە مارقۇمنىڭ تۋىستارى بۇعان سەنبەيدى.

بىلتىر كوكتەمنەن بەرى جيىلەگەن الەۋمەتتىك نارازىلىقتاردىڭ بەل ورتاسىندا جۇرگەن بەلسەندى ءومىرىنىڭ اقىرىنا دەيىن اكىمشىلىك جازا رەتىندە كەمىندە 60 كۇندەي قاماۋدا بولعان. ارتىندا قالعان التى بالاسى مەن جارىنا ەرىكتىلەر، بەلسەندىلەر ورتادان جىلۋ جيىپ، بەلسەندى ىرگەتاسىن قالاپ كەتكەن ءۇيدىڭ قۇرىلىسىن اياقتاپ بەرگەن. وسىعان وراي، بۇگىنگى اس ءبىر جاعىنان كوپشىلىككە ريزاشىلىق جيىنى رەتىندە ءوتىپ جاتىر. اس تۋرالى حابار تاراعالى بەرى ەلدىڭ ءار ايماعىنان كەلەم دەگەن نيەتتى بەلسەندىلەرگە كەدەرگى كوبەيىپ، بيلىك قىسىمى ارتقان. وسى سەبەپتى دە قىستىڭ ايازىندا اعادىلدىڭ اقتىق ساپارىنا قاتىسقان مىڭداعان ادامنىڭ قاراسى ايتارلىقتاي از بولسا كەرەك.

اۋىل سىرتىندا تۇرعان پوليتسيا جاساۋىلى مەن بيىل مامىر ايىندا عانا تاعايىندالعان تالاپكەر اۋىلدىق وكرۋگىنىڭ اكىمى اسقار جاقسىگەلدينوۆ قالاي ارەكەت ەتەتىنى تۋرالى حابارلايتىن بولامىز.

مارقۇمنىڭ قازاسىن اشىق ءارى ءادىل تەرگەۋدى تالاپ ەتكەن اقش مەملەكەتتىك دەپارتامەنتى، ۇلىبريتانيانىڭ قازاقستانداعى ەلشىلىگى مەن ەقىۇ قۇرامىنداعى  دەموكراتيالىق ينستيتۋتتار جانە ادام قۇقىقتارى جونىندەگى بيۋرو باسشىلىعى, ازاماتتىق قوعامنىڭ تالابىنا قاراماستان، قازاقستان بيلىگى ەلدى دۇرلىكتىرگەن ءىستى ءبىر توقسانعا سوزباي 29 مامىر كۇنى توقتاتقان. قۇزىرلى ورگاننىڭ قورىتىندىسى بويىنشا، اعادىلدىڭ  قازاسىنا ەشكىم جاۋاپتى ەمەس كورىنەدى. الايدا مۇنىمەن كەلىسپەيتىندەر كوپ.

(اقپارات تولىقتىرىلدى)

"The Qazaq Times"