فوتو: edu.gov.kz

قر پرەمەر-ءمينيسترى باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ءبىرجان نۇرىمبەتوۆ ء"ونىمدى جۇمىسپەن قامتۋ مەن جاپپاي كاسىپكەرلىكتى دامىتۋ"  باعدارلاماسى اياسىندا 2017 جىلعا 85,3 ملرد تەڭگە قاراستىرىلعانىن مالىمدەدى. بۇل تۋرالى پرەمەر-ءمينيستردىڭ رەسمي سايتى حابارلادى. 

ۆيتسە-ءمينيستردىڭ سوزىنشە، باعدارلامانىڭ ءبىرىنشى باعىتى اياسىندا 2017 جىلعى 1 قىركۇيەكتەن باستاپ ۇبت-دان وتپەگەن جانە وقۋ ورىندارىنا تۇسپەگەن مەكتەپ تۇلەكتەرى تەگىن كاسىبي جانە تەحنيكالىق ءبىلىم بەرۋمەن قامتاماسىز ەتىلەدى.

21 مىڭعا جۋىق جاستار 2,5 جىلعا كجتب وقۋعا جىبەرىلەدى، ولاردىڭ وقۋلارىنىڭ اقىسى ءارى شاكىرتاقىسى، جول جۇرۋگە جۇمسايتىن اقشالارى تولەنەدى جانە ءبىر رەتتىك ىستىق تاماقپەن قامتاماسىز ەتىلەدى.

سونداي-اق، 1 ساۋىردەن باستاپ نارىقتا سۇرانىسقا يە ماماندىقتار مەن كاسىپتەر بويىنشا جۇمىسشى مامانداردى قىسقا مەرزىمدى كاسىبي وقىتۋ جۇمىستارى باستالعان. بۇگىندە قىسقا مەرزىمدىك كۋرستارعا 27,7 مىڭ ادام باعىتتالعان.

بيىلعى جىلدىڭ 1 تامىزىنداعى دەرەكتەر بويىنشا، باعدارلاماعا قاتىسۋعا 276,2 مىڭ ادام ءوتىنىش بىلدىرگەن، ولاردىڭ 248,4 مىڭى (90%) باعدارلاما قاتىسۋشىلارىنىڭ قۇرامىنا قوسىلدى. قاتىسۋشىلاردىڭ قۇرامىنا قوسىلعانداردىڭ قاتارىندا جۇمىسسىزدار – 200 مىڭ ادام (80,5%), ءوزىن-ءوزى جۇمىسپەن قامتىعاندار – 48,4 مىڭ ادام (19,5%). ەسەپ بەرۋ كۇنىنە 213,9 مىڭ ادام جۇمىسقا ورنالاستىرىلدى، ولاردىڭ 178,3 مىڭىندا (83,4%) مىندەتتى زەينەتاقى جارنالارى (مزج) بار. تۇراقتى جۇمىس ورنىنا جۇمىسپەن قامتىلعانداردىڭ 56,1% (119,9 مىڭ ادام) ورنالاستى.

ايتا كەتەيىك، قازاقستاندا كاسىبي تەحنيكالىق ماماندىققا قىزىعۋشىلىق از دەۋگە بولادى. بۇعان تۇلەكتەر اراسىنداعى تەك جوو-عا ءتۇسۋ سياقتى قالىپتاسقان قاعيدالار مەن مەكەپ قابىرعاسىندا جۇرگەن كەزدە بالالارعا دۇرىس كاسىبي باعداردىڭ بەرىلمەۋى سەبەپ.

“The Qazaq Times”