فوتو: Kazday

ءبىزدىڭ ەلدە كوكتەمدە قار ەرىپ، جاڭبىر جاۋاتىنىن بيلىكتەگى اتقامىنەرلەر ءالى كۇنگە دەيىن بىلمەي كەلە جاتقانىنا ءبىراز ۋاقىت بولدى. بيىل اقمولا، پاۆلودار، قاراعاندى وبلىستارىن قار سۋى باسىپ جاتسا، الماتى كوشەلەرىن كەشەدەن بەرى جاۋعان جاۋىن ءبىر-اق كۇندە ۆەنەتسياعا اينالدىرىپ شىعا كەلدى.

تاۋعا تىكۇشاقپەن شىعىپ، شاڭعىمەن سىرعاناپ تۇسەتىن احمەتجان ەسىموۆتىڭ كەزىندە الماتى حالقى قىستا قاردىڭ استىندا، كوكتەمدە سۋدىڭ ىشىندە جۇرەتىن ەدى. ال، باۋىرجان بايبەك اكىم بولىپ كەلگەلى وڭتۇستىك استانا كوشەلەرىندە نە وزگەردى؟ كىم، قانداي وزگەرىس بايقادى؟ مىسالى، ءبىز مىناداي وزگەرىس بايقادىق. اۆتوبۋستاردا ۆاليداتور ورىنىنا وڭاي كەلدى. كوشەلەردە جارناما بيلبوردتارى ازايىپ، اقىلى ۆەلوسيپپەتتەر كوبەيدى. اۆتوبۋستار عانا جۇرەتىن جول پايدا بولدى. ەستە قالعان، كوزگە تۇسكەن وزگەرىستەر وسى.  ەندى نە وزگەرمەدى دەگەن زاڭدى سۇراق تۋادى؟ باراحولكا بازارى باياعىداي جىلىنا ءبىر، ەكى رەت ورتەنىپ تۇرادى. الماتى جۇرتى قىستا شاڭعىمەن، كوكتەمدە قايىقپەن ءجۇرۋىن ءالى قويمادى. ال شۇرق تەسىك جولدار الماتىنىڭ عانا ەمەس، بۇكىل قازاقستاننىڭ ماڭگىلىك ترەندىنە اينالدى. ەسىموۆتان كەيىن بايبەككە ەستەلىككە قالعان دۇنيەلەردىڭ باستى رەيتينگىن قۇرايتىن ماسەلەلەر وسىلار.

بىراق، ءبىز بۇگىن الماتى قالاسى مەن شەت اۋداندارىندارىنىڭ سۋ استىندا قالعانى جايىندا ايتپاقپىز. كەشەگى جاۋعان جاۋىننىڭ سالدارىنان ناۋرىزباي اۋدانىندا ورنالاسقان «دوستىق» كوتەدجدەر قالاشىعى، ءال-فارابي كوشەسىندەگى جەر استى وتكەلدەرى، «الماتى وپتيكا» دۇكەنى، «ازيا» بازارى، «بوتاگوز» بالاباقشاسى سۋ استىندا قالعان. وسى جەردە بۇعان كىم كىنالى دەگەن تاعى ءبىر سۇراق تۋادى سانالى ادامنىڭ باسىندا. ارىقتاردى دۇرىس تازالاماعان "الماتى تازالىق" پا، ولاردى دۇرىس قاداعالاماعان الماتى اكىمدىگى ما، جوق الدە تابيعات پا؟ بۇل سۇراققا جاۋاپتى اكىمدىكتەگىلەر الداعى ۋاقىتتا بەرە جاتار. ءازىر بىزگە جاڭبىر جاۋعان سايىن ۇيرەك ۇشىپ، قاز قونارلىقتاي سۋ باساتىن الماتى كوشەلەرىنىڭ اسەم كوركىنە تامسانىپ جۇرۋدەن باسقا امال جوق.

“The Qazaq Times”