مينسك سوتى TUT.BY سايتىن باق مارتەبەسىنەن ايىردى

مينسكىدەگى سوت TUT.BY سايتىن باق مارتەبەسىنەن ايىردى. باستى سەبەپ – سايت تىلشىلەرىنىڭ پرەزيدەنت سايلاۋى مەن ەلدەگى ميتينگتەن شىنايى اقپارات تاراتۋى.

نەگىزىنەن بەلارۋس اقپارات ءمينيسترى يگور لۋتسكيدىڭ 29 قىركۇيەكتەگى بۇيرىعىنا سايكەس TUT.BY سايتى اقپارات تاراتۋ قۇقىعىن 2020 جىلدىڭ 1 قازانىنان باستاپ توقتاتقان. دەپارتامەنت 18 قىركۇيەكتە مينسك ەكونوميكالىق سوتىنا تالاپ ارىزىن جولداعان. سوت وتىرىسى 8 قازانعا جوسپارلانعان.

TUT.BY رەسمي بۇقارالىق اقپارات قۇرالى رەتىندە 2019 جىلدىڭ قاڭتارىندا تىركەلگەن. بەلارۋس زاڭىنا سايكەس ينتەرنەت-رەسۋرستاردى اقپارات قۇرالى رەتىندە تىركەۋ مىندەتتى ەمەس. سول سەبەپتى سايت 2000 جىلى قۇرىلعاننان وتكەن جىلعا دەيىن تىركەلمەي جۇمىس ىستەگەن.

2020 جىلدىڭ 7 تامىزىنان بەرى TUT.BY سايتىنا ءتورت مارتە ەسكەرتۋ جاسالعان. وعان باستى سەبەپ – سايتتىڭ بەلارۋستەگى پرەزيدەنتتىك سايلاۋ قارساڭىنداعى زاڭ بۇزۋشىلىقتار جانە نارازىلىق شارالارى تۋرالى اقپارات تاراتۋى.

بەلارۋس بيلىگى باق تۋرالى زاڭدى العا تارتا وتىرىپ سايتتى سوتقا تارتقان. ناتيجەسىندە قازاننان باستاپ TUT.BY سايتى اقپارات قۇرالى مارتەبەسىنەن ايرىلدى. دەگەنمەن پورتال وكىلدەرى بۇل شەشىمگە قاراماستان جۇمىستى جالعاستراتىنىن مالىمدەدى.

9 تامىزدا بەلارۋستە پرەزيدەنتتىك سايلاۋ ءوتىپ، ناتيجەسىندە ورتالىق سايلاۋ كوميسسياسى شيرەك عاسىر بيلىك ەتكەن الەكساندر لۋكاشەنكونىڭ جەڭىسىن جاريالادى. وپپوزيتسيا پرەزيدەنت سايلاۋىنىڭ رەسمي قورىتىندىسىن مويىنداۋدان باس تارتىپ، ەلدە ساياسي داعدارىس ۋشىعا ءتۇستى. ازاماتتىق بەلسەندىلەر سايلاۋ قورىتىندىسى بۇرمالاندى دەپ سانايدى. لۋكاشەنكونىڭ وتستاۆكاسىن تالاپ ەتكەن نارازىلىق شارالارى ەلدىڭ ءتۇرلى قالالارىندا جالعاسىپ جاتىر.

"The Qazaq Times"