قازاقستاندا 30 قاراشا 689 ادامنان كوروناۆيرۋس، ال جەكسەنبىدە 68 ادامنان كوروناۆيرۋس پنەۆمونياسى انىقتالدى. قازىرگى تاڭدا 24,5 مىڭنان استام (كۆي+ 13 444, كۆي- 11 210) ادام اۋىرىپ جاتىر. 

#كوروناۆيرۋس كۇزدىڭ سوڭعى كۇنى، قاراشانىڭ 30-ى كوروناۆيرۋس جۇقتىرعان 402 ادام ايىعىپ شىقسا, 7 ادام ومىردەن وتكەن. جاڭادان تىركەلگەن ناۋقاستاردىڭ ەڭ كوبى – سقو (110), پاۆلودار (94), اقمولا (90), قوستاناي (88), شقو (73) وبلىستارىندا. ماڭعىستاۋ وبلىسىندا ۆيرۋس جۇقتىرعاندار مۇلدەم انىقتالماعان.

ءبىر ايدان بەرى ەپيدەميا احۋالى ۋشىعىپ تۇرعان شقو-داعى جۇقتىرعاندار سانى قاراشا ايى باستالعالى 6,3 مىڭنان استى. ەكىنشى قاتاردا پاۆلودار (2198), ودان كەيىن سولتۇستىك قازاقستان (2041) وبلىستارى ورنالاسقان. ازىرگە جاعداي تۇراقتى وڭىرلەر – قىزىلوردا (31), ماڭعىستاۋ (32), تۇركىستان (65) وبلىستارى. مۇنىڭ بارلىعى قاراشا ايىنداعى رەسمي جيىنتىق ەسەپ بويىنشا.

دەنمين-ءنىڭ رەسمي مالىمەتىنشە, ەمدەلىپ جاتقان 13,4 مىڭنان اسا ناۋقاستىڭ 3586-سى اۋرۋحانادا. تاعى 9858 ادام امبۋلاتورلىق تەراپيادا. ولاردىڭ اراسىندا 912 بالا ەمدەلىپ جاتىر. قاراشانىڭ سوڭعى دەكاداسىندا اۋىرىپ جاتقان بالالار كۇرت كوبەيدى. 1 قىركۇيەكتەن بەرى اۋىرعان 1741 وقۋشىعا كۆي+, كەمىندە 1 مىڭ بالاعا كۆي- دياگنوزى قويىلعان. قازىر اۋرۋ وشاعى رەتىندە 66 مەكتەپ ۋاقىتشا كارانتيندە، جابىق تۇر.

احۋالى ناشار 232 ناۋقاستىڭ اراسىندا 30 ادامنىڭ جاعدايى قاتتى قيىنداعان. جانە 31 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

رەسپۋبليكا بويىنشا بارلىعى 132 مىڭنان استام ادام كوروناۆيرۋس ينفەكتسياسىن جۇقتىرسا، ەمدەلىپ جازىلعاندارى – 116,5 مىڭنان اسادى. بۇل جالپى ناۋقاستاردىڭ 90%-عا جۋىعى. قازان ايىنىڭ ورتاسىنان بەرى ەلدە كوروناۆيرۋس قايتا ەكپىن الا باستادى. دەسە دە پرەزيدەنت توقاەۆ 16 قاراشا كۇنگى مالىمدەمەسىندە سولتۇستىك جانە شىعىس ايماقتاردا ستاتيستيكانىڭ بۇرمالانعانىن ايتقان. رەداكتسيا پاۆلودار وبلىسىندا 59, قوستاناي وڭىرىندە 57, اقمولادا 100, سقو-دا 200, شقو-دا 300 جاعدايدىڭ جاسىرىلعانىن انىقتاعان.

#كوروناۆيرۋس_پنەۆمونياسى سونىمەن قوسا، جەكسەنبى دەمالىس كۇنى بولعاندىقتان، كوروناۆيرۋس پنەۆمونياسىنا شالدىققان 68 ادام تىركەلگەن. تاعى 27 ادام ايىعىپ شىققان. پنەۆمونياعا شالدىققان 42 مىڭ ادامنىڭ 30,5 مىڭنان استامى جازىلىپ شىققان.

ددسۇ تۋىستاس دەرتتىڭ قاۋپى بىردەي ەكەنىنە باسا نازار اۋدارسا دا قازاقستاننىڭ دەنساۋلىق ساقتاۋ مينيسترلىگى كوروناۆيرۋس پەن ونىڭ پنەۆمونيالىق تۇرىنە ەكى ءتۇرلى كوزقاراسپەن قارايدى. ونىڭ انىق دالەلى – كۆي+ تۋرالى اقپاراتتىق ينديكاتورلار (ايماقتارعا تارالۋى، ناۋقاستاردىڭ احۋالى، ونىڭ ىشىندەگى ستاتسيونار مەن امبۋلاتورلىق باقىلاۋداعىلار سانى، بالالار سانى، ءوججا-مەن تىنىستاپ جاتقاندار، ايىققاندار، جاڭا كەيستەر، قايتقاندار) كۇندەلىكتى جاريالانسا، ال كۆي- دەرەگى سوڭعى ءۇش كورسەتكىشتەن وزگە مالىمەت بەرىلمەيدى. قازىر كوروناۆيرۋس پنەۆمونياسىنىڭ ايماقتارعا تارالۋى جونىندەگى دەرەگى مينيستر ءاۋ باستا ايتقانداي كۇندەلىكتى نە اپتاسىنا ەمەس، ەندى ون كۇندە ءبىر-اق بەرىلەدى. ونىڭ وزىندە قۇجات فورماتىندا سايتقا جۇكتەلەدى، ۆەدومستۆو رەسۋرستارىندا اشىق ءارى تۇسىنىكتى جاريالانبايدى.

قوعامدا بيىلعى 256 مىڭ پنەۆمونيا جاعدايىن ەسەپكە قوسپاي، جالپى ستاتيستيكانى شىلدەدەگى قىرعىننان كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوبەيگەن.

#سويتسە... قازاقستاندا كوروناۆيرۋس ءولىمى ازايماي تۇر. 1 قىركۇيەكتەن 1 جەلتوقسانعا دەيىن، بيىلعى كۇزدە قازاقستاندا 43 مىڭداي ادام ىندەتكە شالدىعىپ، 600 ادام قايتىس بولعان (كۆي+ 26 476 كەيس، 447 ءولىم / كۆي- 16 491 كەي، 151 ءولىم).

وتكەن قاراشا ايىندا 24 مىڭنان استام ادام اۋىرعان جانە 230-داي ادام ومىردەن وتكەن. بۇل قازان ايىندا تىركەلگەن تولىق جيىنتىقتان دا كوپ. رەسمي دەرەككە سايكەس، قازان ايىندا 9,5 مىڭداي قازاقستاندىق اۋىرعان (4439 ادام كۆي+ / 4984 ادام كۆي-) جانە 165 ادام ومىردەن وتكەن (118 ادام كۆي+ / 47 ادام كۆي-). 

وسىلايشا ءبىرىنشى تولقىننىڭ شارىقتاۋ شەگى – «ماۋسىم-شىلدە قىرعىنان» كەيىنگى تامىز ايىنان بەرى قازاقستاندا دەرت جۇقتىرىپ اۋىرعاندار 114 مىڭنان اسىپ ءتۇستى. وسى ءتورت ايدىڭ ىشىندە ىندەتتەن 1,4 مىڭ ادام ومىردەن وتكەن.

پنەۆمونيانىڭ كوروناۆيرۋستان باسقا تۇرلەرىنە شالدىققاندار سانى 358 مىڭعا جەتكەن. جيىنتىق ەسەبى، 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 131 مىڭنان، 1 تامىزدان بەرگى كوروناۆيرۋس پنەۆمونياسى 42 مىڭنان اسقان. ددسۇ مالىمەتىنشە، قازاقستاندا اۋىرعانداردىڭ سانى 173 مىڭعا جاقىنداعان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. پاندەميا باستالعالى جالپى ۆيرۋس جۇققانداردىڭ 3193-ءى (كۆي+ / U07.1 – 2041, كۆي- / U07.2 – 443, ىلەسپە اۋرۋلاردان – 709) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 709 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

27 قاراشاداعى احۋالعا باعا بەرگەن مينيستر الەكسەي تسويدىڭ سوزىنشە، وتكەن ايمەن سالىستىرعاندا جۇققاندار سانى 3,7 ەسە وسكەن قازاقستانداعى جاعداي «ورتاشا قاۋىپتى» دەڭگەيدە. بۇگىنگى تاڭدا اۋرۋ جۇقتىرۋ قاتەرى جاعىنان شقو، سقو، پالودار، قوستاناي جانە اقمولا وبلىستارى قىزىل، ال الماتى قالاسى مەن استانا سارى ايماقتا.

"The Qazaq Times"