فرانتسيادا «جاھاندىق قاۋىپسىزدىك تۋرالى» زاڭ جوباسىنا قارسى دەمونستراتسيا كەزىندە زارداپ شەككەن پوليتسيا قىزمەتكەرلەرىنىڭ سانى 98-گە جەتتى. جۇرتتىڭ نارازىلىعىن تۋعىزعان ماسەلە – بيلىكتىڭ پوليتسيا قۇزىرەتىن كەڭەيتىپ، جۋرناليستەر قۇقىعىن شەكتەۋى.

28 قاراشادا وتكەن ميتينگتە پاريجدە قارسىلىق اكتسياسىنا 46 مىڭ ادام، ەل بويىنشا 133 مىڭ ادام قاتىسقان. پوليتسيا مالىمەتىنشە، پاريجدە بىرنەشە جەرگە ءورت قويىلعان، كولىكتەر مەن كيوسكىلەر ورتەنگەن. اكتسيا قاتىسۋشىلارى مەن پوليتسيا اراسىندا قاقتىعىس بولىپ، 37 پوليتسەي جاراقاتتانعان، 9 مانيفەستانت ۇستالعان.

نارازىلار زاڭنىڭ 24-بابىنا قارسى  شەرۋگە شىققان. بۇل باپ قىزمەتتىك مىندەتىن اتقارىپ جاتقان پوليتسيا قىزمەتكەرلەرىن سۋرەتكە تۇسىرۋگە تىيىم سالادى. بۇل زاڭدى قازىر فرانتسيا پارلامەنتىنىڭ تومەنگى پالاتاسى – ۇلتتىق اسسامبلەيا ماقۇلداپ، سەناتقا جىبەرىلگەن.

24-باپ اياسىندا قىزمەتتىك مىندەتىن اتقارىپ وتىرعان پوليتسەيلەردىڭ سۋرەتىن جەكە باسىنا قول سۇعۋ ماقساتىندا جاريالاۋ نە تاراتۋ ءبىر جىلعا دەيىن باس بوستاندىعىنان ايىرىلۋعا جانە 45 مىڭ ەۆرو (53 مىڭ دوللار) ايىپپۇلعا اكەلۋى مۇمكىن.

رەسپۋبليكانىڭ ىشكى ىستەر ءمينيسترى جەرالد دارمانەن: «قورىتىندى مالىمەتتەر: پوليتسيا مەن جاندارمداردىڭ اراسىندا 98 ادام جاراقات الدى. مەن ولارعا تولىق قولداۋ بىلدىرەمىن. بۇل زورلىق-زومبىلىققا كىنالى ادامدار جاۋاپقا تارتىلۋى كەرەك»، – دەپ مالىمدەدى.

سەنبىدە فرانتسيانىڭ 70 قالاسىندا «جاھاندىق قاۋىپسىزدىك تۋرالى» زاڭ جوباسىنا قارسى نارازىلىق اكتسيالارى ءوتتى، ونىڭ ەرەجەلەرى پوليتسيا مەن جاندارمەريا قىزمەتكەرلەرىنىڭ فوتو جانە ۆيدەو تۇسىرىلىمدەرىن جۇرگىزۋگە تىيىم سالادى. بۇقارالىق شەرۋلەردىڭ ۇيىمداستىرۋشىلارى قاتارىندا جۋرناليستەر كاسىپوداقتارى، «ادام قۇقىقتارىن قورعاۋ ليگاسى» جانە باسقا دا قوعامدىق بىرلەستىكتەر بار.

"The Qazaq Times"