قازاقستاننىڭ جاس ءانشىسى قاراقات باشانوۆا 29 قاراشادا وتكەن بالالار اراسىنداعى ەۆروۆيدەنيە (Junior Eurovision-2020) كونكۋرسىندا 2-ورىن الدى. ول ءان بايقاۋىندا «Forever» («ماڭگىلىك») ءانىن ورىندادى. فرانتسيالىق ءانشى ۆالەنتينا جەڭىمپاز اتانسا، ءۇشىنشى ورىندى يسپانيالىق ءانشى سوليا يەلەندى.

قاراقات – 152 ۇپاي (83 ۇپاي ادىلقازىلاردان، 62 ۇپاي كورەرمەندەردىڭ داۋىسىنان), ۆالەنتينا 200 ۇپاي (88/112) جينادى.

جارىس پولشادا وتكەنىمەن، پاندەمياعا بايلانىستى قاراقات باشانوۆا پولشاعا بارماي قازاقستانداعى ستۋديادان قاتىستى.

كونكۋرس ەرەجەسىنە ساي، كەلەسى بايقاۋ جەڭىمپاز بولعان ەلدە ءوتۋى ءتيىس. دەمەك 2021 جىلعى Junior Eurovision كونكۋرسىن فرانتسيا ۇيىمداستىرادى.

بيىلعى بايقاۋعا نيدەرلاند، بەلارۋس، گرۋزيا، ۋكراينا، مالتا، پولشا، رەسەي، سەربيا، گەرمانيا قاتىستى.

قازاقستان بۇل كونكۋرسقا 2018 جىلدان بەرى قاتىسىپ كەلەدى. 2018 جىلى دانەليا تۋلەشوۆا 6-ورىن السا، بىلتىر ەرجان ماكسيم 2-ورىن يەلەنگەن.

ازاتتىقتىڭ مالىمەتىنشە، Junior Eurovision - ەۋروپالىق حابار تاراتۋ وداعى (European Broadcasting Union – EBU) ۇيىمداستىراتىن ءان بايقاۋى.

ەرەجەگە ساي، بالالار اراسىنداعى ەۆروۆيدەنيە (Junior Eurovision) مەن نەگىزگى ەۆروۆيدەنيە (Eurovision song contest) كونكۋرسىنا ەۋروپا حابار تاراتۋ ايماعىنا كىرەتىن ەلدەر عانا ەش كەدەرگىسىز قاتىسادى. ال ەۋروپادان تىسقارى ەلدەر EBU قۇرامىنا سەرىكتەس مۇشە بولا الادى. قازاقستان جانە مەملەكەتتىك "حابار" تەلەارناسى 2016 جىلى ەۋروپالىق حابار تاراتۋ وداعىنا سەرىكتەس مۇشە رەتىندە كىرگەن. قازاقستان بۇل وداققا سەرىكتەس مۇشە بولماي تۇرىپ-اق، Eurovision بايقاۋىن كورسەتە باستاعان.

سەرىكتەس مۇشەلەر Eurovision بايقاۋلارىنا تۇراقتى تۇردە قاتىسا المايدى. قاتىسۋ ءۇشىن EBU تاراپىنان شاقىرتۋ الىپ، بايقاۋ جارناسىن جانە تەلەترانسلياتسيا قارجىسىن تولەۋ كەرەك. قازىرگە دەيىن قازاقستان EBU تاراپىنان تەك بالالار اراسىنداعى بايقاۋعا شاقىرتۋ الدى.

"The Qazaq Times"