«ءىى تولقىن ەكپىن الا باستادى»: ارادا ءجۇز كۇن وتكەننەن كەيىن تاۋلىكتىك ەسەپ قايتادان 1 مىڭنان استى

قازاقستاندا 27 قاراشا 826 ادامنان كوروناۆيرۋس، ال بەيسەنبىدە 184 ادامنان كوروناۆيرۋس پنەۆمونياسى انىقتالدى. قازىرگى تاڭدا 23 مىڭنان استام (كۆي+ 11 975, كۆي- 11 078) ادام اۋىرىپ جاتىر. اۋىرىپ، ەمدەلىپ جاتقان بالالار كوبەيىپ كەلەدى. 

#كوروناۆيرۋس جۇما، قاراشانىڭ 27-ءسى كوروناۆيرۋس جۇقتىرعان 660 ادام ايىعىپ شىقسا, 7 ادام ومىردەن وتكەن. جاڭادان تىركەلگەن ناۋقاستاردىڭ ەڭ كوبى –  شقو (145) جانە سقو (119), پاۆلودار (117) وبلىستارى، الماتى قالاسى (84), قوستاناي وڭىرىندە (77). قىزىلوردا وبلىسىندا ۆيرۋس جۇقتىرعاندار مۇلدەم انىقتالماعان.

ءبىر ايدان بەرى ەپيدەميا احۋالى ۋشىعىپ تۇرعان شقو-داعى جۇقتىرعاندار سانى قاراشا ايى باستالعالى 6 مىڭنان استى. ەكىنشى قاتاردا پاۆلودار (1863), ودان كەيىن سولتۇستىك قازاقستان (1718) وبلىستارى ورنالاسقان. ازىرگە جاعداي تۇراقتى وڭىرلەر – قىزىلوردا (27), ماڭعىستاۋ (31), تۇركىستان (55) وبلىستارى. مۇنىڭ بارلىعى قاراشا ايىنداعى رەسمي جيىنتىق ەسەپ بويىنشا.

دەنمين-ءنىڭ رەسمي مالىمەتىنشە, ەمدەلىپ جاتقان 12 مىڭداي ناۋقاستىڭ 3294-ءى اۋرۋحانادا. تاعى 8681 ادام امبۋلاتورلىق تەراپيادا. ولاردىڭ اراسىندا 822 بالا ەمدەلىپ جاتىر. قاراشانىڭ سوڭعى دەكاداسىندا اۋىرىپ جاتقان بالالار كۇرت كوبەيدى. 1 قىركۇيەكتەن بەرى اۋىرعان 1741 وقۋشىعا كۆي+, كەمىندە 1 مىڭ بالاعا كۆي- دياگنوزى قويىلعان. قازىر اۋرۋ وشاعى رەتىندە 66 مەكتەپ ۋاقىتشا كارانتيندە، جابىق تۇر.

احۋالى ناشار 199 ناۋقاستىڭ اراسىندا 35 ادامنىڭ جاعدايى قاتتى قيىنداعان. جانە 31 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

رەسپۋبليكا بويىنشا بارلىعى 130 مىڭنان استام ادام كوروناۆيرۋس ينفەكتسياسىن جۇقتىرسا، ەمدەلىپ جازىلعاندارى – 116 مىڭنان ءسال اسادى. بۇل جالپى ناۋقاستاردىڭ 90%-عا جۋىعى. قازان ايىنىڭ ورتاسىنان بەرى ەلدە كوروناۆيرۋس قايتا ەكپىن الا باستادى. دەسە دە پرەزيدەنت توقاەۆ 16 قاراشا كۇنگى مالىمدەمەسىندە سولتۇستىك جانە شىعىس ايماقتاردا ستاتيستيكانىڭ بۇرمالانعانىن ايتقان. رەداكتسيا پاۆلودار وبلىسىندا 59, قوستاناي وڭىرىندە 57, اقمولادا 100, سقو-دا 200, شقو-دا 300 جاعدايدىڭ جاسىرىلعانىن انىقتاعان.

#كوروناۆيرۋس_پنەۆمونياسى سونىمەن قوسا، بەيسەنبى كۇنى كوروناۆيرۋس پنەۆمونياسىنا شالدىققان 184 ادام تىركەلگەن. تاعى 60 ادام ايىعىپ شىققان، ءبىر ادام قايتىس بولعان. پنەۆمونياعا شالدىققان 42 مىڭعا تارتا ادامنىڭ 30 مىڭنان استامى جازىلىپ شىققان.

ددسۇ تۋىستاس دەرتتىڭ قاۋپى بىردەي ەكەنىنە باسا نازار اۋدارسا دا قازاقستاننىڭ دەنساۋلىق ساقتاۋ مينيسترلىگى كوروناۆيرۋس پەن ونىڭ پنەۆمونيالىق تۇرىنە ەكى ءتۇرلى كوزقاراسپەن قارايدى. ونىڭ انىق دالەلى – كۆي+ تۋرالى اقپاراتتىق ينديكاتورلار (ايماقتارعا تارالۋى، ناۋقاستاردىڭ احۋالى، ونىڭ ىشىندەگى ستاتسيونار مەن امبۋلاتورلىق باقىلاۋداعىلار سانى، بالالار سانى، ءوججا-مەن تىنىستاپ جاتقاندار، ايىققاندار، جاڭا كەيستەر، قايتقاندار) كۇندەلىكتى جاريالانسا، ال كۆي- دەرەگى سوڭعى ءۇش كورسەتكىشتەن وزگە مالىمەت بەرىلمەيدى. قازىر كوروناۆيرۋس پنەۆمونياسىنىڭ ايماقتارعا تارالۋى جونىندەگى دەرەگى مينيستر ءاۋ باستا ايتقانداي كۇندەلىكتى نە اپتاسىنا ەمەس، ەندى ون كۇندە ءبىر-اق بەرىلەدى. ونىڭ وزىندە قۇجات فورماتىندا سايتقا جۇكتەلەدى، ۆەدومستۆو رەسۋرستارىندا اشىق ءارى تۇسىنىكتى جاريالانبايدى.

قوعامدا بيىلعى 256 مىڭ پنەۆمونيا جاعدايىن ەسەپكە قوسپاي، جالپى ستاتيستيكانى شىلدەدەگى قىرعىننان كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوبەيگەن.

#سويتسە... قازاقستاندا كوروناۆيرۋس ءولىمى ازايماي تۇر. قاراشا ايىندا 21,5 مىڭنان استام ادام اۋىرعان جانە 200-دەن اسا ادام ومىردەن وتكەن. بۇل قازان ايىندا تىركەلگەن تولىق جيىنتىقتان دا كوپ. رەسمي دەرەككە سايكەس، وتكەن ايدا 9,5 مىڭداي قازاقستاندىق اۋىرعان (4439 ادام كۆي+, 4984 ادام كۆي-) جانە 165 ادام ومىردەن وتكەن (118 ادام كۆي+, 47 ادام كۆي-). 

وسىلايشا ءبىرىنشى تولقىننىڭ شارىقتاۋ شەگى – «ماۋسىم-شىلدە قىرعىنان» كەيىنگى تامىز ايىنان بەرى قازاقستاندا دەرت جۇقتىرىپ اۋىرعاندار 111 مىڭنان اسقان. وسى ءتورت ايدىڭ ىشىندە ىندەتتەن 1,4 مىڭداي ادام ومىردەن وتكەن.

پنەۆمونيانىڭ كوروناۆيرۋستان باسقا تۇرلەرىنە شالدىققاندار سانى 358 مىڭعا جەتكەن. جيىنتىق ەسەبى، 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 130 مىڭنان اسسا، 1 تامىزدان بەرگى كوروناۆيرۋس پنەۆمونياسى 42 مىڭعا جاقىنداعان. ددسۇ مالىمەتىنشە، قازاقستاندا اۋىرعانداردىڭ سانى 171 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. پاندەميا باستالعالى جالپى ۆيرۋس جۇققانداردىڭ 3169-ى (كۆي+ / U07.1 – 2020, كۆي- / U07.2 – 440, ىلەسپە اۋرۋلاردان – 709) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 709 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

الماتى قالاسىنداعى باستى كوشەلەردىڭ بىرىندەگى قىسقى كورىنىس. فوتو: اشىق دەرەككوز

*تاقىرىپقا رەپليكا: سوڭعى رەت جازدا كوروناۆيرۋس پەن پنەۆمونيانىڭ تاۋلىك ىشىندەگى كورسەتكىشى مىڭنان اسقان. ناقتىراق ايتقاندا، تامىزدىڭ 19-ى كۇنى 1031 جاعداي تىركەلگەن ەدى.

"The Qazaq Times"