شىعىس قازاقستان وبلىسىنىڭ اكىمى دانيال احمەتوۆ ايماقتاعى ەپيدەميا جاعدايى باقىلاۋدا ەكەنىن مالىمدەدى.

«وبلىستا كوروناۆيرۋس دەرتىنە بايلانىستى جاعداي وڭاي بولماي تۇر. بۇگىنگە دەيىن بارلىعى 14 مىڭنان استام ناۋقاس انىقتالدى. قازىر 659 ادام اۋرۋحانادا ەمدەلىپ جاتىر. ناۋقاستاردىڭ اپتالىق ءوسىمى 1,7%»، – دەپ حابارلادى اكىم احمەتوۆ.

ونىڭ ايتۋىنشا، شەكتەۋ شارالارىنىڭ ارقاسىندا جاعداي وڭ جاققا وزگەرە باستاعانى بايقالادى.

قاراشا ايى باستالعالى بەرى R رەپرودۋكتيۆتى كورسەتكىش 1,85-تەن 0,97-گە دەيىن كەمىگەن. ال قولدانىلىستاعى توسەك-ورىن سانى بويىنشا 31,1%-دان 17,6%-عا دەيىن بوساعان. كوروناۆيرۋستىڭ تارالۋىن الدىن الۋ جانە جەدەل شارالار قابىلداۋ ماقساتىندا  ۆيرۋس وشاقتارىن وقشاۋلاۋ جانە زالالسىزداندىرۋ ورتالىعى قۇرىلعانىن ايتادى. وبلىستا 15 كومپيۋتەرلىك توموگرافيا تاۋلىك بويى جۇمىس ىستەيدى. 1 جەلتوقساننان باستاپ قوسىمشا 3 اپپارات ىسكە قوسىلادى دەپ جوسپارلانعان. پاندەميا باستالعالى وڭىردە 355 مىڭ پتر-تەستى جۇرگىزىلگەن. وقۋ باستالعالى بەرى 410 وقۋشىدان كوروناۆيرۋس انىقتالعان.

اكىمنىڭ سوزىنە سەنسەك، وبلىستا تولىق مەديتسينالىق قۇرالدارمەن جابدىقتالعان 6,2 مىڭ توسەك-ورىن دايىن. ىندەتتىڭ ءبىرىنشى تولقىنىنا قاراعاندا توسەك-ورىن سانى 12 ەسەگە، رەانيماتسيالىق توسەك-ورىن سانى 10 ەسەگە ارتقان. جەدەل جاردەم قىزمەتىنىڭ پاركى 216 كولىكپەن تولىقتىرىلعان.

دانيال احمەتوۆ وڭىردە كارانتيندى قاتاڭداتۋ جوسپاردا جوعىن ايتادى. وسى ەنگىزىلگەن شەكتەۋ شارالارىن جەتكىلىكتى دەپ سانايدى.

ول ەكى اپتا ىشىندە كوروناۆيرۋستىڭ جۇقتىرۋ دەڭگەيىن ازايتۋعا بولاتىنىنا سەنىمدى.

«ءبىز تاۋلىك بويى جۇمىس ىستەپ جاتىرمىز. 7 قاراشادا 353 جاعداي انىقتالسا، بۇگىن 242. اۋرۋشاڭدىق كورسەتكىشىنىڭ كۇرت تومەندەگەنىن ايعاقتايتىن ءپوزيتيۆتى ستاتيستيكا دەسەك بولادى. سوندىقتان مەنىڭ تۇجىرىمدارىم دارىگەرلەر مەن بارلىق اۋدان اكىمدەرىنىڭ جۇرگىزگەن جۇمىسىنىڭ ناتيجەسىنە نەگىزدەلگەنىن ايتقىم كەلەدى»، – دەيدى ول.

16 قاراشا كۇنى پرەزيدەنت توقاەۆ «بىرقاتار وبلىستاردا  كوروناۆيرۋس ىندەتىنە قاتىستى جاڭا جاعدايلاردى جاسىرۋ دەرەكتەرى انىقتالعانىن» مالىمدەگەن. پرەزيدەنتتىڭ سوزىنشە، ستاتيستيكا بۇرمالانعان ايماقتاردىڭ قاتارىندا شقو، سقو، پاۆلودار،  اقمولا،  قوستاناي وبلىستارى بار. احمەتوۆ ءوزى باسقاراتىن ايماقتا جاسىرىلعان فاكتىلەر جايلى ناقتى دەرەك ايتپادى. «مەن وسى جاۋاپقا تاپسىرما بەردىم. بىرىنشىدەن، قازىر كوروناۆيرۋسقا قارسى كۇرەس ءجۇرىپ جاتىر. از ۋاقىتتان سوڭ، ماسەلە دۇرىستالعاننان كەيىن تەكسەرەمىز» دەدى رەداكتسيا ءتىلشىسىنىڭ سۇراعىنا.

ىندەت وشاعىنا اينالعان شقو-دا اۋرۋدىڭ بەتى قايتپاي تۇرعانى بەلگىلى. 20 كۇننەن بەرى لوكداۋنعا الىنسا دا وڭىردەگى احۋال الدە دە تاۋلىگىنە كەمىندە 200-دەن استام ناۋقاس انىقتالعان، جاعداي جاقسارماعان. الەۋمەتتىك جەلىدە جاسىرۋ فاكتىسىنە قاتىستى تاراعان قازان ايىنىڭ سوڭىنداعى رەسمي ەسەپتە كورسەتىلگەندەي 200 ەمەس، ودان الدەقايدا كوپ بولۋى ىقتيمال دەگەن دولبار-پىكىردىڭ راس-وتىرىگىن سۇرادىق.

اكىم شامدانىڭقىراپ جاۋاپ بەردى: «ءسىز كەلىڭىز. مەن سىزگە اۆتوكولىك بەرەمىن. بارلىق اۋرۋحانالارعا بارىڭىز. بۇگىنگى تاڭدا 659 ناۋقاس جاتىر. بارىڭىز، كورىڭىز. ونداي ەشقانداي قۇپيا ماسەلە جوق. مەن ءسىزدى توسامىن».

«ءبىزدىڭ مىندەتىمىز ايىپتىلاردى ىزدەۋ ەمەس، پرەزيدەنت تاپسىرماسىن ورىنداۋ. مەن از ۋاقىت ارالىعىندا اتقارعان جۇمىس پەن ناتيجەسىن اشىق ايتتىم. ءبىز قازىر وسى ماسەلەنى شەشۋمەن اينالىسىپ جاتىرمىز. وسىدان سوڭ بۇل جاعداي مىندەتتى تۇردە ەگجەي-تەگجەيلى انىقتالىپ، كىنالىلەر جاۋاپقا تارتىلاتىن بولادى»، – دەپ جاۋاپ بەردى Vlast ءتىلشىسى تامارا ءۆاالدىڭ ساۋالىنا.

“The Qazaq Times”