اقش كونگرەسىنىڭ وكىلدەر پالاتاسى رەسەيلىك وپپوزيتسيالىق ساياساتكەر الەكسەي ناۆالنىيدىڭ ۋلانۋىنا بايلانىستى رەزوليۋتسيا قابىلداپ، ۋاشينگتوندى رەسەيگە سانكتسيا سالۋعا شاقىردى.

20 تامىزدا تومسكىدەن ماسكەۋگە ۇشىپ بارا جاتقان جولدا ۇشاقتا ساياساتكەردىڭ جاعدايى كۇرت ناشارلاپ، ۇشاق ومبىعا قونعان بولاتىن. باستاپقىدا ناۆالنىي ومبى اۋرۋحاناسىنا جاتقىزىلدى. ەكى كۇننەن سوڭ تۋىستارى مەن جاقتاستارىنىڭ تالابىمەن بەرلين كلينيكاسىنا اۋىستىرىلدى.

2 قىركۇيەكتە گەرمانيا ۇكىمىنىڭ رەسمي وكىلى شتەففەن زايبەرت زەرتحانا ماماندارىنىڭ قورىتىندىسىنا سۇيەنە وتىرىپ، ناۆالنىيدىڭ اعزاسىنان "نوۆيچوك" توبىنا جاتاتىن ۋ قالدىقتارى تابىلدى دەپ مالىمدەگەن. گەرمانيا كانتسلەرى انگەلا مەركەل رەسەيدەن وقيعانى تۇسىندىرۋدى تالاپ ەتتى. فرانتسيا مەن شۆەتسيانىڭ تاۋەلسىز زەرتحانالارى دا بۋندەسۆەر زەرتحاناسىنىڭ قورىتىندىسىن راستاپ، ناۆالنىيدىڭ "نوۆيچوك" توبىنا جاتاتىن ۋدان ۋلانعانىن ايتتى. ال ماسكەۋ وقيعاعا قاتىسى جوعىن ايتادى.

ۋلانعاننان كەيىن ءبىر ايدان استام ۋاقىت اۋرۋحانادا كومادا جاتىپ، كەيىننەن ەسىن جيعان ناۆالنىي كلينيكادان شىققاننان كەيىن بەرگەن سۇحباتىندا «ۋ بەرۋ ىسىنە» پرەزيدەنت ۆلاديمير ءپۋتيننىڭ قاتىسى بارىنا سەنىمدى ەكەنىن جەتكىزگەن.

15 قازاندا ەۋرووداق پەن ۇلىبريتانيا الەكسەي ناۆالنىيدىڭ ۋلانۋىنا بايلانىستى رەسەيگە سانكتسيا سالعان. سانكتسيا سالىنعان التى شەنەۋنىك اراسىندا فسب ديرەكتورى الەكساندر بورتنيكوۆ، پرەزيدەنت اكىمشىلىگى جەتەكشىسىنىڭ ءبىرىنشى ورىنباسارى سەرگەي كيريەنكو، ءسىبىر فەدەرالدىق وكرۋگى پرەزيدەنتىنىڭ ۋاكىلەتتى وكىلى سەرگەي مەنيايلو بار.

"The Qazaq Times"