كەشە، 18 قاراشا كۇنى اقش، اۋستراليا، كانادا، جاڭا زەلانديا جانە بريتانيا قاتارلى ەلدەردىڭ ۇكىمەتتەرى قىتايعا قاراتا بىرلەسكەن مالىمدەمە جاسادى. ولار گونكونگ پارلامەنتىندەگى دەموكراتيالىق زاڭ شىعارۋشىلاردىڭ ورنىن قالپىنا كەلتىرۋدى تالاپ ەتكەن.

بىرلەسكەن مالىمدەمەنى اتالعان ەلدەردىڭ سىرتقى ىستەر مينيسترلىكتەرى جاساعان. ولار ءبىر اۋىزدان بەيجىڭنىڭ گونكونگتا «ۇلتتىق قاۋىپسىزدىك تۋرالى جاڭا زاڭ» جوباسىن ەنگىزۋى، زاڭ شىعارۋ كەڭەسىن سايلاۋدى كەيىنگە قالدىرۋى، سونداي-اق زاڭ شىعارۋ كەڭەسىندەگى دەموكراتتاردى شەتتەتۋى قىتايدىڭ حالىقارالىق كەلىسىمدەرگە ساي مىندەتتەرىن بۇزادى دەپ ەسكەرتكەن. سونداي-اق، بۇنداي ارەكەتتەر گونكونگتىڭ ەركىندىگى مەن جوعارى دەڭگەيدەگى اۆتونوميالىق ستاتۋسىن بۇزادى دەگەن الاڭداۋشىلىقتارىن جەتكىزگەن.

سارسەنبىدە گونكونگ پوليتسياسى زاڭ شىعارۋ كەڭەسىنىڭ بۇرىنعى 3 مۇشەسىن قاماۋعا الدى. گونكونگ بۇقارالىق اقپارات قۇرالدارىنىڭ حابارلاۋىنشا، سوڭعى ايلاردا كوپتەگەن دەموكراتيالىق پارلامەنتشىلەر مەن ولاردىڭ كومەكشىلەرى قاماۋعا الىنعان. بىرلەسكەن مالىمدەمەدە بەجىڭ گونكونگتىڭ زاڭ شىعارۋ كەڭەسىندەگى دەموكرات توپتاردى ماقساتتى ىعىستىرىپ وتىر دەپ ايىپتاعان. ولار گونكونگ تۇرعىندارىنىڭ سايلاۋ قۇقىعىن بۇزباۋعا شاقىرعان.

بەس ەلدىڭ بىرلەسكەن مالىمدەمەسىندە، قىتاي ورتالىق بيلىگىن گونكونگ تۇرعىندارىنىڭ ازاماتتىق وي پىكىرىن ءبىلدىرۋ بوستاندىعى قۇرمەتتەۋگە دە شاقىرعان. بىراق، قىتايدىڭ بۇل ارەكەتتەرىنە قارسى قولدانىلاتىن قانداي دا ءبىر شارالار تۋرالى ايتپاعان.

اشىعىن ايتۋ كەرەك، گونكونگ ماسەلەسىنە كەلگەندە بريتانيا باستاپ، اقش جاقتاپ، كانادا، اۋستراليا، جاڭا زەلانديا سەكىلدى اعىلشىن ەلدەرى قوستاعان قىتايعا قارسى قانداي دا ءبىر ەسكەرتۋ، ايىپتاۋ، سانكتسيالاۋ، ت.ب. ارەكەتتەرىنەن كەرەمەتتەي وڭ ناتيجەسى بولعان جوق، بولمايتىنداي. كەرىسىنشە، قىتاي بيلىگى بارعان سايىن گونكونگتاعى تەگەۋرىنىن قاتايتىپ، ميلليونداعان دەمونسترانتاردىڭ نارازىلىق شاراسىن باسىپ تاستادى.  دەموكراتيان قورعاۋشى، قۋاتتاۋشى اتالمىش ەلدەر بەيجىڭنىڭ اۆتوريتارلىق جۇيەسىنىڭ الدىندا السىزدىك تانىتقانى جاسىرىن ەمەس.

“The Qazaq Times”