قازاقستاننىڭ دەنساۋلىق ساقتاۋ جۇيەسىن ەسەڭگىرەتكەن بيىلعى پاندەميا تۇسىندا قان اينالىمى جۇيەسى، تىنىس الۋ ورگاندارى، جۇقپالى اۋرۋلاردان بولەك پنەۆمونيا دەرتى العاشقى ون ايدا 3,5 ەسەگە وسكەن.  

دەنساۋلىق ساقتاۋ ۆيتسە-ءمينيسترى اجار عينياتقىزى مەن مەديتسينالىق كومەكتى ۇيىمداستىرۋ دەپارتامەنتىنىڭ باستىعى ازامات دۇيسەنوۆ The Qazaq Times رەداكتسياسىنىڭ پنەۆمونيامەن اۋىرعاندار تۋرالى سۇراۋ حاتىنا جاۋاپ بەردى. ءبىر عانا قازان ايىندا پنەۆمونيا ورشىگەن ايماقتار قاتارىندا شقو (3191), استانا (1607), پاۆلودار (1390), قوستاناي وبلىسى (1328) كوش باستاپ تۇر. سونداي-اق، كوروناۆيرۋس پنەۆمونياسىنا شالدىققاندار سانى شقو (1439), استانا (844), الماتى قالاسىندا (722) ايتارلىقتاي كوبەيگەن.

قاۋىپتى اۋرۋلاردىڭ تارالۋى بويىنشا رەسپۋبليكاداعى ءبىرىنشى ايماق – شىعىس قازاقستان وبلىسى. وڭىردە وتكەن ايدا 1300-دەي ادامنان كوروناۆيرۋس، 1400-دەن استام ادامنان كوروناۆيرۋس پنەۆمونياسى جانە 3191 ادامنان پنەۆمونيانىڭ باسقا تۇرلەرى انىقتالعان.

بىلتىر پنەۆمونياعا شالدىققاندارعا قاراعاندا بيىل جاعداي ەداۋىر كۇردەلەنگەن. 2019 جىلدىڭ ماۋسىم-تامىز ارالىعىنداعى كورسەتكىش 2020 جىلى جازدىگۇنى 10,4 ەسەگە كۇرت وسكەن. كەيىنگى ەكى جىلدىڭ قىركۇيەك ايلارىنداعى ايىرماشىلىق تا – 2,6 ەسە. ال وتكەن قازان ايىندا تىركەلگەن ناۋقاستار قاتارى ادەتتەگىدەن 5 مىڭعا ارتىق. قاڭتار جانە قازان ايلارىندا تىركەلگەن 357,6 مىڭ ناۋقاستىڭ 156 مىڭنان استامى تەك شىلدە ايىنا تيەسىلى.

بۇعان 1 تامىزدان باستاپ ەسەپتەلە باستاعان «كوروناۆيرۋستىق ينفەكتسيا بەلگىلەرى بار پنەۆمونيا» دەپ اتالاتىن نەمەسە  U07.2 كودىمەن بەلگىلەنەتىن «كوروناۆيرۋس پنەۆمونياسىنا» شالدىققان 38 مىڭداي (31 قازانداعى جاعداي بويىنشا – QT) ناۋقاستى قوسا ەسەپتەسەك، جىل باسىنان بەرگى ەسەپ 396 مىڭعا جۋىقتايدى. بۇل بىلتىرعىدان 3,8 ەسە كوپ.