قاراعاندى وبلىستىق سوتى بىلتىر قاڭتار ايىندا «درەۆني ريم» كافەسىندەگى اتىشۋلى توپتىق جانجالدا قازا تاپقان راقىمجان جانسەيتتىڭ ءىسى بويىنشا اپەللياتسيالىق شاعىمدى وزگەرىسىز قالدىردى.

جابىرلەنۋشى تاراپ ايىپتالۋشى جۇمامۇراتوۆ، ششۋركا، ستەپانيان، وگاننيسياندارعا كەسىلگەن ۇكىمدى قاتاڭداتۋدى سۇراعان.

سوت القاسىنىڭ تۇسىندىرمەسىنە سايكەس، «ۇكىم قۇقىق بۇزۋشىلىقتىڭ قوعامعا كەلتىرگەن قاۋپى مەن سيپاتىن، دارەجەسىن جانە جاۋاپتىلىقتى جەڭىلدەتەتىن ءمان-جايلاردى، ونىڭ ىشىندە بۇرىن ولاردىڭ قىلمىستىق جاۋاپكەرشىلىككە تارتىلماعانىن، كىناسىن مويىنداپ، جاساعان ىسىنە وكىنگەنىن ەسكەرە وتىرىپ تاعايىندالعان».

بۇعان دەيىن 2019 جىلدىڭ قاراشاسىندا قاراعاندى وبلىستىق سوتى توبەلەس كەزىندە پىشاق جاراقاتىنان كوز جۇمعان راقىمجان جانسەيىتتىڭ ءىسى بويىنشا يۋسيفا نۋرۋلۋدى كىنالى دەپ تانىپ، ونى 19 جىلعا باس بوستاندىعىنان ايىرعان. باسقا ءتورت ايىپتالۋشى ارقايسى 3 جىلعا سوتتالعان. سونىمەن قاتار، التى ادامعا شارتتى مەرزىم بەرىلگەن، تاعى ەكى ازامات تاراپتاردىڭ تاتۋلاسۋىنا بايلانىستى باس بوستاندىعى شەكتەلگەن.

2019 جىلدىڭ ءبىرىنشى قاڭتارىندا «درەۆني ريم» مەيرامحاناسىندا جاستار توپقا ءبولىنىپ توبەلەسكەن. مەيرامحانا قوناقتارى مەن سول مەكەمەنىڭ باسشىلارى اراسىندا تۋعان جانجال 23 جاستاعى جانسەيىتتىڭ قازاسىمەن اياقتالعان. بۇل جاعداي قوعامدا ۇلكەن رەزونانس تۋدىرىپ، ءتىپتى كەي ساراپشىلار مۇنى «ۇلتارالىق قاقتىعىس» (قازاق-ارميان) دەڭگەيىندە قاراستىرۋ كەرەكتىگىن ايتقان.

“The Qazaq Times”