جاڭادان شىمىلدىعىن اشقان «قارادالا» حالىق تەاترى ابايدىڭ «ەسكەندىر» پوەماسىن ساحنالادى.

2 قاراشادا  ب.ريموۆا اتىنداعى تالدىقورعان دراما تەاترىندا ۇيعىر اۋدانىندا شىمىلدىعىن اشقان «قارادالا» حالىق تەاترى  ا.قۇنانباەۆتىڭ پوەماسىنىڭ جەلىسىمەن «ەسكەندىر» قويىلىمىنىڭ پرەمەراسىنا ارنالعان پرەسس-كونفەرەنتسيا وتكىرىپ قويىلىمدى كورسەتتى. اتاۋلى شاراعا قر حالىق ءارتيسى تۇڭعىشباي جامانقۇلوۆ، قر ەڭبەك سىڭىرگەن قايراتكەرى بەكجان تۇرىس، سونداي-اق الماتى وبلىسى ءماسليحاتىنىڭ دەپۋتاتى - ىزعاربەك بەكتۇرسىنوۆ، قويۋشى-رەجيسسەر - اسقار نايمانتاەۆ جانە اۋدان اكىمىنىڭ ورىنباسارى قادىرجان يساحانوۆ قاتىسادى.

«ەسكەندىر» - ابايدىڭ گۋمانيستىك كوزقاراسىن تەرەڭىرەك تانىتاتىن ەلەۋلى سيۋجەتتى تۋىندىسى. شىعارما شىعىستا ەسكەندىر زۇلقارنايىن دەگەن اتپەن بەلگىلى، ەۋروپادا الەكساندر ماكەدونسكي اتالاتىن ەجەلگى گرەك قولباسشىسىنىڭ ءومىرى جايىنداعى اڭىزعا قۇرىلعان. اۆتور ەسكەندىردىڭ ومىرباياندىق دەرەكتەرىن ءدال كەلتىرەدى دە، ونىڭ دۇنيە ءجۇزىن جاۋلاپ الماق بولعان شاپقىنشىلىق ساياساتىن سىناۋعا اۋىسادى. پەسادا جاۋىزدىققا جەتەلەيتىن تويىمسىزدىق ەكەنىن كورسەتە كەلىپ، ادىلدىك، دانالىقتى سوعان قارسى قويادى.

الماتى وبلىسى ءماسليحاتىنىڭ دەپۋتاتى ىزعاربەك بەكتۇرسىنوۆ اقساقال نارىنقولدا «ءحانتاڭىرى حالىق تەاترىن» قايتا اشىپ جاتقانىن ەستىپ، «قارادالا وڭىرىندە دە وسىنداي ونەر وشاعى اشىلسا، سوعان ءجون سىلتەپ، جول كورسەتىپ جىبەرشى؟»-دەپ اسقار نايمانتاەۆ پەن بەلگىلى پروديۋسەر ەدىگە قوجاحمەتتى شونجىعا شاقىرادى. اۋدان اكىمىنىڭ ورىنباسارى قادىرجان يساحانوۆ، اۋداندىق ءماسليحاتتىڭ توراعاسى نۇراكىم ەسجانوۆ،  مادەنيەت ءۇيىنىڭ ديرەكتورى سالتانات ەرمۇحامەتوۆا، ونەر جاناشىرلارى جاننەت كەرىمقۇلوۆ، قانات سارتولوۆتار قاتىسقان اقىلداسۋ جيىنى اسقار نايمانتاەۆتىڭ وسى تەاتردى اشۋ ءۇشىن العاشقى قويىلىمدى قويۋعا كەلىسىم بەرۋىمەن اياقتالادى. سول كۇننەن باستاپ ىزعاربەك اقساقال «قارادالا حالىق تەاترى» - دەپ ات قويعان تەاتر دايىندىق جۇمىستارىن باستاپ، اباي قۇنانباەۆتىڭ «ەسكەندىر» پوەماسىن ساحنالاۋ جۇمىسى باستالىپ كەتەدى.

شىعارمانىڭ اۆتورى – اباي قۇنانبايۇلى. سپەكتاكلدىڭ قويۋشى-رەجيسسەرى – اسقار نايمانتاەۆ.

"The Qazaq Times"