لۋيزا گليۋك – نوبەل سىيلىعىنىڭ يەگەرى

ادەبيەت بويىنشا 2020 جىلعى نوبەل سىيلىعى امەريكالىق اقىن لۋيزا گليۋككە بۇيىردى. ماراپاتتاۋ ءراسىمى نوبەل كوميتەتىنىڭ YouTube ارناسىندا كورسەتىلەدى، – دەپ حابارلايدى The Guardian.

شۆەتسيا اكادەمياسى نوبەل كوميتەتىنىڭ وكىلدەرى لۋيزا گليۋككە بۇل پرەميانىڭ «قايتالانباس پوەتيكالىق داۋىس، ادامنىڭ جەكە ۋايىمىن ادامزاتتىق دارەجەگە جەتكىزگەنى» ءۇشىن تاعايىندالعانىن ايتتى.

گليۋك – امەريكانىڭ ونەر جانە ادەبيەت اكادەمياسىنىڭ مۇشەسى، امەريكا اقىندارى اكادەمياسىنىڭ كانتسلەرى (1999), كوپتەگەن ماراپات يەسى، ونىڭ ىشىندە پوەزياسى ءۇشىن پۋليتتسەر سىيلىعى (1993) مەن ۋوللەس ستيۆەنس پرەمياسىن (2008) يەلەنگەن. ول «باق» (1976) جانە «اۋىل ءومىرى» (2009) جىر جيناقتارىمەن وقىرمانعا جاقسى تانىس. العاش جيناعى 1968 جىلى «تۇڭعىش» اتاۋىمەن جارىق كورگەن.

ول 1943 جىلى نيۋ-يوركتە اۋستريا-ۆەنگريادان شىققان ەۆرەي وتباسىندا تۋعان. ول ساررا لوۋرەنس كوللەدجىندە جانە كولۋمبيا ۋنيۆەرسيتەتىندە وقىدى، بىراق  ديپلوم الا الماعان. كەيىنىرەك ۋيليامستاۋنداعى ۋيليامس كوللەدجىندە اعىلشىن تىلىنەن ساباق بەرگەن، سونىمەن قاتار يەلس، بوستون جانە ايوۆ ۋنيۆەرسيتەتتەرىندە وقىتۋشى بولعان.

نوبەل سىيلىعى 1901 جىلدان بەرى 597 رەت تاعايىندالعان. 950 ادام مەن ۇيىم لاۋرەات اتانعان. سالتاناتتى تابىستاۋ ءراسىمى ءداستۇرلى تۇردە عالىم نوبەلدىڭ تۋعان كۇنىنە وراي 10 جەلتوقسان كۇنى وتەدى. ادەتتە ستوكگولم فيلارمونياسىندا وتەتىن جيىن بيىل پاندەمياعا بايلانىستى ديپلوم مەن مەدال ونلاين فورماتتا تابىستالماق.

بۇل جولى ءار نوميناتسيا بويىنشا جۇلدە قورى 10 ملن شۆەد كرونىنا (شامامەن $1,11 ملن) باعالانعان.

"The Qazaq Times"