وتكەن اپتادا پورتالىمىز  قىتاي سوتى ءومىر بويى باس بوستاندىعىنان ايىرۋعا ۇكىم ەتكەن وسپان باتىر ۇرپاقتارىنا قاتىستى ماسەلەنى العاش بولىپ كوتەردى جانە وسى ماسەلە بويىنشا قازاقستانداعى قىتاي ەلشىلىگىنە، قر سىرتقى ىستەر مينيسترلىگىنە اقپاراتتىق ساۋال حات جولداعان ەدىك. قىتاي ەلشىلىگىنە جولداعان حاتىمىز جاۋاپسىز قالعانىمەن، قر سىرتقى ىستەر مينيسترلىگى رەداكتسياعا ءوز جاۋابىن جولدادى.

قر ءسىم ءباسپاسوز قىزمەتى جولداعان حاتتا مينيسترلىك قر ازاماتتارى پاراسات نۇرلانۇلى، نازىكەن بىكەيقىزى جانە ءاشۋ احاتتىڭ تۋىستارى نۇرلان ءنابيۇلى، ناعىز مۇحامەتۇلى جانە تولقىن سوعىسايۇلى قاتارلى قحر ازاماتتارىنىڭ ماسەلەسىن ءوز قۇزىرەتى شەگىندە قاراستىرىپ جاتقانىن حابارلاعان.

«مينيسترلىك اتالعان تۇلعالاردىڭ تۋىستارىنىڭ قىتاي اۋماعىنان ەلىمىزگە شىعۋلارىنا رۇقسات بەرۋ جانە وڭ شەشۋ جونىندە نۇر-سۇلتان قالاسىنداعى قىتاي حالىق رەسپۋبليكاسىنىڭ ەلشىلىگىنە ءتيىستى نوتالار جولدادى»، – دەگەن سىرتقى ىستەر مينيسترلىگىنىڭ جاۋاپ حاتىندا.

سونداي-اق، اتالعان حاتتا: «قىتاي تاراپى ولاردىڭ ارىزدارىندا كورسەتىلگەن تۇلعالار قىتاي ازاماتتارى بولعاندىقتان سول ەلدىڭ قۇزىرەتتى ورگاندارى ولاردىڭ ماسەلەسىن قىتايدىڭ ىشكى زاڭناماسىنا سايكەس قاراستىراتىنىن مالىمدەدى. بۇعان قوسا، مينيسترلىك 1963 جىلعى 18 ساۋىردەگى كونسۋلدىق قاتىناستار تۋرالى ۆەنا كونۆەنتسياسىنىڭ 55-بابىنىڭ 1-تارماعى بويىنشا ءبىر مەملەكەت ەكىنشى مەملەكەتتىڭ ىشكى ىستەرىنە قول سۇعۋىنا قۇقىعىنىڭ جوق ەكەنىنە نازار اۋدارادى»، – دەگەن.

قازاقستان سىرتقى ىستەر مينيسترلىگى حات سوڭىندا قازاقستان ازاماتتارىنىڭ سۇراۋىن ادىلەتتى قاراستىرۋ ماقساتىندا، ءارى وتباسى مۇشەلەرىنىڭ بىرگە تۇرۋ،  اجىراپ قالماۋ تۋراسىنداعى حالىقارالىق جانە قىتاي زاڭدارىنداعى قاعيدالارعا ساي قىتاي جاقپەن جۇمىستى جالعاستىرىپ جاتقانىن جەتكىزگەن.

قر ءسىم جاۋاپ حاتى.

ەسكە سالا كەتەيىك، وسپان باتىردىڭ تىكەلەي جانە اتالاس اعايىندارىنىڭ ۇرپاقتارى – نۇرلان ءنابيۇلى، ناعىز مۇحامەتۇلى جانە تولقىن سوعىسايۇلى قاتارلى ازاماتتار شۇار التاي ايماعى، كوكتوعاي اۋدانىنىڭ قوعام قاۋىپسىزدىك مەكەمەسى (پوليتسيا) تارابىنان 2017 جىلدىڭ سوڭى مەن 2018 جىلدىڭ ناۋرىز ارالىعىندا قاماۋعا الىنعان. ولارعا قاتىستى العاشقى سوت وتىرىسى تەك بيىل 10 شىلدەدە بولعان.  ال، 24 قىركۇيەك كۇنى اۋداندىق ورتا سوت ولارعا «وتان تۇتاستىعىنا قاۋىپ توندىرگەن»، «اسىرە ۇلتشىل»، «قازاقستانمەن ءجيى بايلانىس ورناتقان، قازاقستان تاۋەلسىزدىك كۇنىن قۇتتىقتاعان» دەگەن ايىپتارمەن ءومىر بويى باس بوستاندىعىنان ايىرۋعا ۇكىم شىعارعان بولاتىن. قازاقستانداعى تۋىستارى ولاردىڭ جازىقسىز ەكەنىن ايتادى. اقوردا مەن حالىقارالىق ادام قۇقىقتارىن قورعاۋ ۇيىمدارىنان اراشا سۇراپ ءباسپاسوز جينىن دا وتكىزگەن بولاتىن.

“The Qazaq Times”