الەكساندر لۋكاشەنكو بەلارۋس پرەزيدەنتى رەتىندە قىزمەتىنە كىرىستى. شيرەك عاسىردان استام ۋاقىت ەل باسقارعان پرەزيدەنتتىڭ كەزەكتى ۇلىقتاۋ ءراسىمى ءدال قازىر مينسكتەگى تاۋەلسىزدىك سارايىندا ءوتىپ جاتىر. ال اقش، كانادا جانە ەۋروپالىق وداق ەلدەرى سايلاۋ ناتيجەسىن جانە لۋكاشەنكونى لەگيتيمدى پرەزيدەنت رەتىندە مويىنداۋدان رەسمي تۇردە باس تارتتى.

بەلتا اگەنتتىگىنىڭ حابارلاۋىنشا، پرەزيدەنت ۇلىقتاۋ راسىمىنە جۇزدەن استام ادام شاقىرىلعان. ولاردىڭ قاتارىندا جوعارى لاۋازىمدى شەندىلەر، وكىلدەر پالاتاسىنىڭ دەپۋتاتتارى جانە رەسپۋبليكا كەڭەسىنىڭ مۇشەلەرى، مەملەكەتتىك ورگاندار مەن ۇيىمداردىڭ، جەرگىلىكتى اتقارۋشى جانە وكىمشى ورگانداردىڭ، رەسپۋبليكالىق بۇقارالىق اقپارات قۇرالدارىنىڭ باسشىلارى، عىلىم، مادەنيەت جانە سپورت قايراتكەرلەرى بار.

ەل كونستيتۋتسياسىنا سايكەس پرەزيدەنت مىناداي مازمۇنداعى انت بەرگەننەن كەيىن قىزمەتىنە كىرىسەدى: «بەلارۋس رەسپۋبليكاسىنىڭ پرەزيدەنتى قىزمەتىنە كىرىسە وتىرىپ، حالىققا ادال قىزمەت ەتۋگە، ادام مەن ازامات قۇقىقتارى مەن بوستاندىقتارىن قۇرمەتتەۋگە جانە قورعاۋعا، بەلارۋس رەسپۋبليكاسىنىڭ كونستيتۋتسياسىن ساقتاۋعا، وزىمە جۇكتەلگەن جوعارى مىندەتتەردى ابىرويمەن جانە ادال اتقارۋعا سالتاناتتى تۇردە انت ەتەمىن».

كونستيتۋتسياعا وڭ قولىن قويىپ، الەكساندر لۋكاشەنكو بەلارۋس تىلىندە انت بەردى. سودان كەيىن ول انت بەرۋ تۋرالى اكتىگە قول قويدى. بەلارۋستىڭ سايلاۋ جانە رەسپۋبليكالىق رەفەرەندۋمدار جونىندەگى ورتالىق كوميسسياسىنىڭ توراعاسى ليديا ەرموشينا الەكساندر لۋكاشەنكوعا بەلارۋس رەسپۋبليكاسى پرەزيدەنتىنىڭ كۋالىگىن تابىس ەتتى.

الەكساندر لۋكاشەنكونىڭ وتستاۆكاسىن تالاپ ەتكەن نارازىلىق شارالارى 9 تامىزدان بەرى ءوتىپ كەلەدى. نارازىلار پرەزيدەنت سايلاۋىنىڭ قورىتىندىسى بۇرمالاندى دەپ ەسەپتەيدى. بەلارۋس ورتالىق سايلاۋ كوميسسياسىنىڭ مالىمەتى بويىنشا، قازىرگى مەملەكەت باسشىسى الەكساندر لۋكاشەنكو 80,10% داۋىسپەن جەڭىسكە جەتكەن. ونىڭ باستى باسەكەلەسى، وپپوزيتسيا اتىنان قاتىسقان سۆەتلانا تيحانوۆسكايا 10,12% داۋىسقا يە بولعان.

كەيىننەن تيحانوۆسكايا سايلاۋ قورىتىندىسى بويىنشا ورتالىق سايلاۋ كوميسسياسىنا شاعىم ءتۇسىردى. ەكزيت-پولدىڭ ناتيجەلەرى 9 تامىز كەشكە جاريالانعاننان كەيىن مينسكتىڭ ورتالىعىندا جانە رەسپۋبليكانىڭ كەيبىر باسقا قالالارىندا جاپپاي نارازىلىق شەرۋلەرى باستالدى. شەرۋگە شىققانداردى قۇقىق قورعاۋ ورگاندارىنىڭ قىزمەتكەرلەرى سوققىعا جىعىپ، كوز جاساۋراتاتىن گاز قولدانعان.

اقش پەن ەۋرووداق بەلورۋس بيلىگىنىڭ ارەكەتىن سىناپ، داۋىس ۇرلاۋ مەن كۇش قولدانۋعا قاتىسى بار شەنەۋنىكتەرگە سانكتسيا قولدانۋ ماسەلەسىن قاراستىرىپ جاتىر. سانكتسيا 21 قىركۇيەكتە كۇشىنە ەنۋى ءتيىس ەدى. الايدا تاراپتاردىڭ پىكىرلەرى ورتاق بولماعاندىقتان، بەلارۋسكە سانكتسيا ەنگىزۋ ماسەلەسى تاعى كەيىنگە شەگەرىلدى. ال بەلارۋس وپپوزيتسياسىنىڭ وكىلى سۆەتلانا تيحانوۆسكايا لۋكاشەنكو مەن ونىڭ توبىنا (زاڭدى جانە جەكە تۇلعالار) قارسى قاتاڭ قاۋلى قابىلداۋدى ۇسىنىپ كەلەدى.

لۋكاشەنكونى «كەزەكتى ايقىن جەڭىسىمەن» ءبىرىنشى بوپ قۇتتىقتاعان مەملەكەتتەر قاتارىندا قىتاي، رەسەي، قازاقستان ءازىربايجان، وزبەكستان، تاجىكستان باسشىلارى بار.

"The Qazaq Times"