وتكەن اپتا سوڭىندا اقش مەملەكەتتىك دەپارتامەنتى جەتەكشىسىنىڭ ەكونوميكالىق ءوسۋ، ەنەرگەتيكا جانە قورشاعان ورتانى قورعاۋ جونىندەگى ورىنباسارى كەيز كراچ (Keith Krach) تايۋانعا (تايۆان) ساپارلاي بارعان بولاتىن. ول ۋاشينگتون مەن بەيجىڭ ديپلوماتيالىق قاتىناس ورناتقاننان كەيىن تايۋانعا بارعان ەڭ جوعارى امەريكالىق لاۋازىمدى تۇلعا. ونىڭ ساپارىنا بەيجىڭ تارابى كۇشتى قارسىلىق رەاكتسياسىن تانىتتى. ايتالىق، تايۋان بۇعازىندا اسكەري ۇشاقتارىن ۇشىردى جانە جۇما كۇنى (18 قىركۇيەك) تايۋان ارالى جاقىن ماڭدا اسكەري جاتتىعۋلارىن دا وتكىزدى. قىتايدىڭ بۇل ارەكەتىن اقش مەملەكەتتىك حاتشىسى مايكل پومپەو ايىپتاعنا بولاتىن.

كراچ تايۋان ساپارىنان ورالا سالا قىتايدىڭ جاڭا تەحنولوگيا جابدىقتارىنان باس تارتۋعا ناسيحاتتاۋ ءۇشىن بىردەن ەۋروپا ەلدەرىنە اتتاندى. ول كەزەكتى ساپارىنىڭ ماقساتىن «قاۋىپسىز جەلى» جاھاندىق باستاماسىن العا جىلجىتۋ دەپ كورسەتكەن. ساپار بارىسىندا ەو جەتەكشىلەرمەن كەزدەسۋ جانە بريتانيادان تىس گەرمانيا، اۆستريا، بەلگيا، پورتۋگاليا جانە يسپانيا قاتارلى ەلدەرگە بارۋدى جوسپارلاعان.

قۇراما شتاتتار بيىل جىل باسىندا «قاۋىپسىز جەلى» باستاماسىن جاريالادى جانە الەم ەلدەرىن بۇل باستامانى قولداۋعا شاقىردى. وندا بايلانىس وپەراتورلارى، ءموبيلدى قوسىمشالار، قولدانبالار دۇكەنى، جەلىدەگى ساقتاۋ بوستىقتارى جانە سۋ استى كابەلدەرى سەكىلدى جەلىگە قاتىستى بەس نەگىزگى باقىتتى «سەنىمسىز» قىتايلىق تەحنيكالار مەن جاڭا تەحنولوگيالاردان تازارتۋدى ناسيحاتتايدى.

اقش-تىڭ بۇل باستاماسى الەمدە، اسىرەسە بايىرعى وداقتاستارى ەۋروپا ەلدەرىندە كەڭ قولداۋ تاپقانى بايقالادى. ايتالىق، ۇلىبريتانيا، چەحيا، پولشا، شۆەتسيا، ەستونيا، رۋمىنيا، دانيا، لاتۆيا جانە باسقا دا ەلدەر وزدەرىنىڭ 5G جەلىلەرىندە «سەنىمسىز» جەتكىزۋشىلەردىڭ ونىمدەرىن پايدالانباۋ تۋرالى كەڭەستى قابىلداعانى بەلگىلى. ال فرانتسيا، ءۇندىستان، اۆستريا، وڭتۇستىك كورەيا، جاپونيا جانە ۇلىبريتانياداعى ءىرى بايلانىس وپەراتورلارى «قىتاي كوممۋنيستىك پارتياسىنىڭ باقىلاۋ جۇيەسىندەگى قۇرالداردى» قولدانۋدان تۇبەگەيلى باس تارتىپ وتىر. بۇلارعا قوسا، كاناداىڭ ءۇش ءىرى تەلەكوممۋنيكاتسيالىق كومپانياسى Huawei ونىمدەرىن 5G جەلىلەرىندە قولدانبايتىنىن مالىمدەدى.

“The Qazaq Times”