الەم بويىنشا كارانتين قايتادان ەنگىزىلۋى مۇمكىن بە؟ بۇل سۇراققا دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس گەبرەيەسۋس جەنەۆادا وتكەن ەۋروپالىق بيۋرو وتىرىسىندا جاۋاپ بەردى.

رەسمي وكىلدىڭ ايتۋىنشا، قازىرگى ۋاقىتتا ۆيرۋس جۇقتىراتىندار سانى ناۋرىزداعى كورسەتكىشتەن اسقان. سول سەبەپتى الەم ەكونوميكاسىنا اۋىر زاردابىن تيگىزگەن كارانتينبىك شەكتەۋ شارالارى قايتادان ەنگىزىلۋى مۇمكىن.

دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى: «كوروناۆيرۋس جۇقتىرعانداردىڭ سانى ارتىپ جاتىر. ءبىر قۋانىشتىسى، ءولىم كورسەتكىشى تومەندەدى. بىراق ءبىز ءۇشىن كوروناۆيرۋستىڭ ءار قۇربانى جايلى حابار – ۇلكەن قايعى. ەگەر ۆيرۋستىڭ تارالۋىن تەجەمەسەك، جاعداي تىپتەن قيىنداي تۇسەدى. الەمدىك ەكونوميكانى السىرەتكەن جاپپاي كارانتيندىك شارالاردى قايتا ەنگىزۋگە ءماجبۇر بولامىز»، – دەيدى.

ونلاين فورماتتا وتكەن حالىقارالىق جيىنعا قازاقستاننىڭ دەنساۋلىق ساقتاۋ ءمينيسترى الەكسەي تسوي دا قاتىسىپ، ەۋروپالىق وڭىرلىك كوميتەتى 70-ءشى سەسسياسىنىڭ توراعاسى بولىپ سايلانعان. جيىندا ەۋروپانىڭ 2025 جىلعا دەيىنگى جاڭا دەنساۋلىق ساقتاۋ باعدارلاماسى مەن پاندەميامەن كۇرەس شارالارى تالقىلاندى.

Bloomberg ستاتيستيكاسى بويىنشا، ەپيدەميا باستالعالى الەمدە كوروناۆيرۋس جۇقتىرعاندار سانى 29 006 033 ادامعا جەتتى. COVID-19 دەرەگى راستالعاندار سانى بويىنشا اقش انتيرەكورد ورناتقان. مۇندا 6 519 979 ادام دەرتكە شالدىققان. ەكىنشى ورىندا – ءۇندىستان (4 846 427 ادام). ۇشتىكتى برازيليا قورىتىندىلايدى – 4 330 455 كەيس.

"The Qazaq Times"