رەسەي پرەزيدەنتى ۆلاديمير پۋتين الەكسەي ناۆالنىيمەن بولعان وقيعانىڭ ءمان-جايىن تەرگەۋ ءۇشىن ارنايى كوميسسيا قۇرماق. بۇل تۋرالى پۋتينمەن سويلەسكەن يتاليا پرەمەر-ءمينيسترى دجۋزەپپە كونتە حابارلادى.

Il Foglio گازەتىنە سۇحبات بەرگەن كونتە: «پرەزيدەنت پۋتين رەسەيدە تەرگەۋ كوميسسياسىن قۇرۋعا نيەت ءبىلدىرىپ، وپپوزيتسيونەرگە كىمنىڭ قاستاندىق جاساعانىن انىقتايمىن دەپ سەندىردى. سونىمەن قاتار گەرمانيا بيلىگىمەن جۇمىس ىستەۋگە دايىن ەكەنىن ءبىلدىردى»، – دەيدى.

يتاليا پرەمەر-ءمينيسترىنىڭ ايتۋىنشا، ناۆالنىيمەن بولعان وقيعانى تەرگەۋدە رەسەي مەن ەۋروپالىق وداقتىڭ ىنتىماقتاستىعى ماڭىزدى. مۇنداي ءوزارا ءىس-قيمىل رەسەي مەن ەو اراسىنداعى قاتىناستاردىڭ تەرىس سالدارىنان ساقتايدى. «ىنتىماقتاستىق – بۇل ەۋرووداق پەن رەسەي اراسىنداعى قارىم-قاتىناس ءۇشىن وسى درامالىق وقيعانىڭ جاعىمسىز سالدارىن بولدىرماۋ ءۇشىن ەڭ جاقسى قۇرال»، – دەدى كونتە. ول يتاليا بارلىق ەۋروپالىق سەرىكتەستەر سياقتى بولعان وقيعانىڭ ەگجەي-تەگجەيىن تولىق انىقتاپ، جاۋاپتىلاردى تابۋ كەرەك دەپ سانايدى.

پۋتين مەن كونتە سوڭعى رەت 26 تامىزدا تەلەفون ارقىلى سويلەسكەن. سودان كەيىن تاراپتار بەلارۋس پەن ليۆياداعى جاعدايدى تالقىلاپ، كوروناۆيرۋسپەن كۇرەستە ىنتىماقتاستىقتى جانداندىرۋعا كەلىسكەن. سونىمەن قاتار پۋتين ناۆالنىي توڭىرەگىندەگى جاعدايعا بايلانىستى نەگىزسىز ايىپتاۋلارعا جول بەرىلمەيتىنىن اتاپ ءوتتى جانە رەسەي بولعان وقيعانى وبەكتيۆتى تەرگەۋگە مۇددەلى ەكەنىن ايتتى.

20 تامىز تومسك قالاسىنان ماسكەۋگە بەت العان وپپوزيتسيونەر ساياساتكەر الەكسەي ناۆالنىي بورتتا جاعدايى ناشارلاپ، ۇشاق دەرەۋ ومبى قالاسىنا قونۋعا تۋرا كەلگەن. كەيىن جەدەل جاردەممەن وپپوزيتسيونەردى ومبىداعى اۋرۋحاناعا جەتكىزگەن. كەيىن گەرمانيا ناۆالنىيدى بەرليندەگى اۋرۋحاناعا اكەتۋ ءۇشىن ارنايى ساناۆياتسيا جىبەرگەن. باستاپقىدا ومبى دارىگەرلەرى ناۆالنىيدى ورنىنان قوزعاۋعا بولمايدى دەپ ونى گەرمانياعا جىبەرۋدەن باس تارتقان. كەيىن ومبىلىق دارىلەرلەر ناۆالنىيدى اۋرۋحانادان اكەتۋگە رۇقسات بەرىپ، ناۆالنىي 22 تامىزدا بەرلينگە جەتكىزىلدى.

وتكەن اپتادا گەرمانيا ۇكىمەتى نەمىس اسكەري توكسيكولوگتارى الەكسەي ناۆالنىي «نوۆيچوك» جۇيكە-سال اۋرۋىن تۋدىرۋشى زاتتەگىدەن ۋلانعانىن حابارلادى. كەيىننەن گەرمانيا كانتسلەرى انگەلا مەركەل رەسەيدىڭ بۇل وقيعاعا بايلانىستى مالىمدەمە جاساۋىن تالاپ ەتتى.

"The Qazaq Times"