ەۋرووداق قۇرامىنداعى ەل باسشىلارى، ۇلىبريتانيا پرەمەر-ءمينيسترى بوريس دجونسون مەن فرانتسيا پرەزيدەنتى ەممانۋەل ماكرون رەسەيلىك وپپوزيتسيونەر ناۆالنىيدىڭ ۋلانۋىن تالقىلادى. بريتان كابينەت باسشىسىنىڭ كەڭسەسى تاراتقان مالىمدەمەدە تاراپتار ماسكەۋدەن تۇسىنىكتەمە بەرۋدى تالاپ ەتكەنى ايتىلادى.

پرەمەر-مينيستر مەن پرەزيدەنت ماكرون الەكسەي ناۆالنىيعا جاسالعان شابۋىلعا نارازىلىق ءبىلدىرىپ، رەسەي وپپوزيتسيا جەتەكشىسىنىڭ نەلىكتەن ۋلانعانىن زەرتتەۋدى تالاپ ەتكەن. ماكرون ءوزىنىڭ Twitter پاراقشاسىندا: «ءبىز ميگرانتتار تاسىمالداۋشىلارىمەن كۇرەس سالاسىنداعى ىنتىماقتاستىعىمىزدى نىعايتۋعا نيەتتىمىز. ءبىز الەكسەي ناۆالنىيدىڭ ۋلانۋ جاعدايىن، ليۆانداعى احۋالدى جانە ەو مەن ۇلىبريتانيا اراسىنداعى قارىم-قاتىناستى تالقىلادىق»، – دەپ جازدى.

وتكەن اپتادا گەرمانيا ۇكىمەتى نەمىس اسكەري توكسيكولوگتارى الەكسەي ناۆالنىي «نوۆيچوك» جۇيكە-سال اۋرۋىن تۋدىرۋشى زاتتەگىدەن ۋلانعانىن حابارلادى. كەيىننەن گەرمانيا كانتسلەرى انگەلا مەركەل رەسەيدىڭ بۇل وقيعاعا بايلانىستى مالىمدەمە جاساۋىن تالاپ ەتتى.

20 تامىز تومسك قالاسىنان ماسكەۋگە بەت العان وپپوزيتسيونەر ساياساتكەر الەكسەي ناۆالنىي بورتتا جاعدايى ناشارلاپ، ۇشاق دەرەۋ ومبى قالاسىنا قونۋعا تۋرا كەلگەن. كەيىن جەدەل جاردەممەن وپپوزيتسيونەردى ومبىداعى اۋرۋحاناعا جەتكىزگەن. كەيىن گەرمانيا ناۆالنىيدى بەرليندەگى اۋرۋحاناعا اكەتۋ ءۇشىن ارنايى ساناۆياتسيا جىبەرگەن. باسىندا ومبى دارىگەرلەرى ناۆالنىيدى ورنىنان قوزعاۋعا بولمايدى دەپ ونى گەرمانياعا جىبەرۋدەن باس تارتقان. كەيىن ومبىلىق دارىلەرلەر ناۆالنىيدى اۋرۋحانادان اكەتۋگە رۇقسات بەرىپ، ناۆالنىي 22 تامىزدا بەرلينگە جەتكىزىلگەن.

وسى وقيعادان كەيىن كەشكىسىن ناۆالنىيدى قولداۋ ماقساتىندا ماسكەۋ، پەتەربۋرگ، نوۆوسيبيرسك، تومەنگى نوۆگورود قالالارىندا ونداعان ادام نارازىلىق وتكىزگەن. باق وكىلدەرى تاراتقان اقپارات بويىنشا، ولاردىڭ كوبىن پوليتسيا ۇستاپ اكەتكەن.

2018 جىلى 4 ناۋرىزدا رەسەي فەدەراتسياسى بارلاۋ قىزمەتىنىڭ بۇرىنعى قىزمەتكەرى سەرگەي سكريپال مەن قىزى يۋليا سكريپال «نوۆيچوك» جۇيكە-سال اۋرۋىن تۋدىرۋشى زاتتەگى ارقىلى ۋلانعان بولاتىن. اسا قاۋىپتى حيميالىق قارۋدىڭ رەسەيدە جاسالىنعانى انىقتالىپ، اقش پەن ۇلىبريتانيا بۇل ىستە تىكەلەي رەسەيدى ايىپتادى.

"The Qazaq Times"