الەكساندر لۋكاشەنكونىڭ قانعا بويالعان ءمۇسىنى. فوتو: Nexta

9 تامىزدا بەلارۋستە پرەزيدەنتتىك سايلاۋ ءوتىپ، ناتيجەسىندە ورتالىق سايلاۋ كوميسسياسى شيرەك عاسىر بيلىك ەتكەن الەكساندر لۋكاشەنكونىڭ جەڭىسىن جاريالادى. وپپوزيتسيا پرەزيدەنت سايلاۋىنىڭ رەسمي قورىتىندىسىن مويىنداۋدان باس تارتىپ، ەلدە ساياسي داعدارىس ۋشىعا ءتۇستى. پوستكەڭەستىك كەزەڭدە بولماعان ءىرى نارازىلىق شەرۋلەر بەلارۋستە ءوتىپ جاتىر. قازىرگى پرەزيدەنتتىڭ لاۋازىمىنان وڭايلىقپەن باس تارتپايتىنىن بىلگەن وپپوزيتسيا وكىلدەرى 23 تامىزعا جالپىۇلتتىق نارازىلىق شەرۋىن ۇيىمداستىرماق. بيلىك بەلسەندىلەردى كۇشپەن باسۋعا تالپىنعانمەن، كەرى شەگىنبەگەن بەلارۋس حالقىنىڭ دەموكراتيا جولىنداعى كۇرەسى قالاي ءوتتى؟ فوتودەرەك ۇسىنامىز.

الەكساندر لۋكاشەنكو پرەزيدەنتتىك سايلاۋدا داۋىس بەرۋ كەزىندە. مينسك، 9 تامىز. فوتو: ار

سايلاۋعا وپپوزيتسيا اتىنان قاتىسقان سۆەتلانا تيحانوۆسكايا. مينسك، 9 تامىز، 2020 جىل. فوتو: ەرا

11 تامىزدا تيحانوۆسكايا ەلدەن ليتۆاعا كەتكەنىن مالىمدەدى. ول العاش جاريالاعان ۆيدەوسىندا بالالارىنىڭ بولاشاعى ءۇشىن وسىنداي شەشىم قابىلداعانىن ايتتى. كەيىن تاعى ءبىر ۆيدەو جاريالانىپ، وندا تيحانوۆسكايا جۇرتتى ميتينگىگە شىقپاۋعا شاقىرادى.

فوتو: تاسس

سايلاۋ ناتيجەسى شىققان كۇن. ەلدى شيرەك عاسىر باسقارعان الەكساندر لۋكاشەنكونىڭ كەزەكتى جەڭىسىنەن كەيىن ازاماتتىق بەلسەندىلەر سايلاۋ قورىتىندىسى بۇرمالانعانىن ايتىپ، قارسىلىق ءبىلدىردى. لۋكاشەنكونىڭ وتستاۆكاسىن تالاپ ەتكەن نارازىلىق شارالارى ەلدىڭ ءتۇرلى قالالارىندا بۇگىنگە دەيىن جالعاسىپ جاتىر.

9 تامىزداعى نارازىلىق شەرۋىندە. مينسك، 2020 جىل. فوتو: East News

لۋكاشەنكونىڭ جەڭىسىنەن كەيىن اقش پەن ەۋروپالىق وداق ەلدەرى بەلارۋستەگى پرەزيدەنتتىك سايلاۋ ناتيجەسىن «ادىلەتسىز» دەپ باعالاپ، بيلىكتىڭ جاپپاي نارازىلىقتاردى كۇشپەن باسۋىن قاتاڭ سىنعا الدى. تەك دە-فاكتو تۇرعىسىندا اۆتوريتارلى، پوستكەڭەستىك كەزەڭنەن ورتاق جۇيە ورنىققان مەملەكەت باسشىلارى لۋكاشەنكونى جەڭىسىمەن قۇتتىقتادى. ءبىرىنشى بوپ قىتاي توراعاسى، كەيىننەن رەسەي، قازاقستان، ءازىربايجان، وزبەكستان، تاجىكستان باسشىلارى قۇتتىقتاۋ لەبىزىن ءبىلدىردى.

تۇتىنگە ورانعان مينسك. فوتو: Handelshblatt

پوليتسيا قىزمەتكەرلەرى نارازىلىقتى باسۋ ءۇشىن كوز جاساۋراتاتىن گاز قولداندى. مينسك، 10 تامىز، فوتو: ار

نارازىلاردى كۇشپەن باسۋ كەزىندە جۇزدەگەن ادام جاراقاتتانعان، شامامەن 7 مىڭ ادام ۇستالعان. ولاردىڭ ءبىر بولىگى بۇعان دەيىن تۇرمەدە وزدەرىن اياۋسىز ۇرىپ-سوققانىن ايتقان. مينسكىدەگى نارازىلىق كەزىندە – ءبىر ادام، گومەلدەگى ۇستاۋ كەزىندە ءبىر ادام قايتىس بولدى.

فوتو: Reuters

بەلارۋستە 9 تامىزدا پرەزيدەنت سايلاۋى ادىلەتسىز ءوتتى دەگەن مىڭداعان ازاماتتىڭ نارازىلىق اكتسياسى سول كۇنى كەشكىسىن باستالعان. جەكسەنبى 16 تامىزعا مينسكىدە جانە وزگە قالالاردا جالپىۇلتتىق ازاتتىق شەرۋى جوسپارلانعان.

فوتو: ەرا

16 تامىزدا ءبىر مينسكتىڭ وزىندە «زا سۆوبودۋ!» («ازاتتىق ءۇشىن!») جالپىۇلتتىق شەرۋىنە 200 مىڭنان استام ادام قاتىستى. ال ءدال وسىدان بىرەر ساعات بۇرىن لۋكاشەنكونى قولداۋعا باعىتتالعان ميتينگتە 7 مەن 30 مىڭ ارالىعىندا جاقتاسى ء(ىىم 65 مىڭ، لۋكوشەنكو 50 مىڭ دەپ جاريالاعان) الاڭنان تابىلدى.

فوتو: DW

بەلارۋستەگى نارازىلىق كەزىندە بەلسەندىلەر امەريكادا وتكەن «Black lives matter» ميتينگىنىڭ ۇرانى رەتىندە «ءار بەلورۋستىڭ ءومىرى ماڭىزدى» لوزۋنگتارىمەن شىقتى.

فوتو: ۆۆس

سايلاۋ بولعالى مينسكىدە ستيحيالىق ميتينگ توقتاماي تۇر. الاڭعا شىققان استانا حالقى سايلاۋدىڭ ءادىل وتپەگەنىن، جۇيەدەن شارشاعانىن ايتادى. ولار سۆەتلانا تيحونوۆسكاياعا بيلىكتى تابىستاۋدى تالاپ ەتتى.

بەلسەندىلەردى سوققىعا جىققان ساربازدار. فوتو: Google

ارنايى جاساق پەن پوليتسيا نارازىلاردى سويىلمەن سوعىپ، كوزدەن جاس اعىزاتىن گازبەن، قۇلاق تۇندىراتىن گراناتامەن تاراتپاق بولدى.

نارازىلار الاڭعا سوققىعا جىعىلعان تۋىستارىنىڭ سۋرەتتەرىن ۇستاپ شىقتى. فوتو: ۆۆس

سايلاۋ قارساڭىندا وپپوزيتسيا ساياساتكەرلەرىنىڭ مىڭداعان جاقتاستارى ۇستالىپ، عالامتور قىزمەتى السىرەگەن. حالىقارالىق ۇيىمدار باقىلاۋشى رەتىندە تولىق قۇراممەن قاتىستىرىلماي، «پاندەمياعا بايلانىستى» شەتەلدىك باق وكىلدەرىن اككرەديتاتسيالاۋدان وتكىزبەدى.

قاماۋدان شىققان تۋىسقان قىزدار. مينسك، 13 تامىز. فوتو: Reuters

16 تامىزدا نارازىلار تاۋەلسىزدىك الاڭىن تولتىردى. مەديازونا ءتىلشىسى  «كەلىپ جاتقان ادامداردا ەسەپ جوق»، — دەيدى. نارازىلىق شاراسىنا قاتىسۋشىلار «ءبىز 97%-بىز»، «بىزگە ەشكىم تولەگەن جوق»، «لۋكاشەنكو — اۆتوزاكقا»، «سۆەتلانا تيحانوۆسكايا — ءبىزدىڭ پرەزيدەنتىمىز»، «لۋكاشەنكو، كەت»، «جىبەر، بوسات» دەگەن ۇراندار ايتىپ جاتتى. مينيسترلىكتەر ءۇيى ورنالاسقان الاڭدا ۇيالى بايلانىس پەن ينتەرنەت قىزمەتى ناشارلادى.

ەرەۋىلگە شىققان كاسىپورىن قىزمەتكەرلەرى. فوتو: East News

بەلارۋستە بىرقاتار كاسىپورىن جۇمىسشىلارى سايلاۋ قورىتىندىسىنا بويكوت رەتىندە نارازىلىققا شىقتى. East News

19 تامىزدا وپپوزيتسيانىڭ ۇيلەستىرۋ كەڭەسى بەلارۋس بيلىگىن تەز ارادا كەلىسسوز جۇرگىزۋگە شاقىردى. كەڭەس وكىلدەرى بيلىك كەلىسسوزدەن باس تارتسا، ەلدەگى ساياسي جانە ەكونوميكالىق داعدارىستىڭ ونان سايىن ۋشىعۋىنا جاۋاپ بەرەدى دەدى.

ميتينگ كەزىندە قازا تاپقان الەكساندر تارايكوۆسكيمەن قوشتاسۋ ساتىنەن. ءىىم وكىلدەرى ميتينگ كەزىندە مارقۇمنىڭ قولىندا جارىلعىش زات بولعان دەپ مالىمدەدى. الايدا ۆيدەدودا ونىڭ قولىندا ەشتەڭە جوق ەكەنى انىق كورسەتىلگەن. فوتو: ۆۆس

فوتو: Reuters

بەلارۋس وپپوزيتسياسى 23 تامىزدا پرەزيدەنت سايلاۋىنىڭ رەسمي قورىتىندىسىمەن كەلىسپەيتىندەردىڭ باسىن قوسىپ، «جاڭا بەلارۋس مارشىن» وتكىزبەك. Telegram-داعى Nexta.Live ارناسىندا جاريالانعان حابارلاماعا سايكەس، اكتسيا مينسك ورتالىعى مەن وزگە قالالاردا جەكسەنبى كۇندىز وتپەك. بۇعان قوسا، پرەزيدەنت سايلاۋىنا قاتىسقان سۆەتلانا تيحانوۆسكايانىڭ باستاماسىمەن قۇرىلعان وپپوزيتسيانىڭ ۇيلەستىرۋ كەڭەسىنىڭ جەتەكشىلەرى ميتينگ كەزىندە ماڭىزدى مالىمدەمە جاساماق.

فوتو: NEXTA

گرودنو قالاسىنداعى ميتينگ. فوتو: https://censoru.net

لۋكاشەنكونىڭ جەڭىسىنە كۇمان كەلتىرگەن ەۋرووداق ەلدەرى عانا ەمەس. اقش بيلىگى دە الەمدى ەلەڭ ەتكىزگەن جاعدايدان كەيىن بەلارۋسپەن ديپلوماتيالىق بايلانىس السىرەۋى مۇمكىن دەگەن ءۋاج ايتتى. الايدا كوپتەگەن ساراپشىلار امەريكا مەن ەۋرووداق ەلدەرىنىڭ بەلارۋستى سىنعا الىپ، سانكتسيا ەنگىزۋى «ەۋروپانىڭ سوڭعى ديكتاتورى» – لۋكاشەنكونىڭ ويىن وزگەرتە قويمايدى دەپ سانايدى.

ازىرگە، بەلارۋستەگى گرودنو قالاسىنىڭ اتقارۋ كوميتەتى عانا وپپوزيتسيا كانديداتى سۆەتلانا تيحانوۆسكايا شتابى مەن ەرەۋىلگە شىققان زاۋىت جۇمىسشىلارىنىڭ تالاپتارىن ورىنداۋعا كەلىستى.

ميسكتە ساربازداردىڭ حالىق جاعىنا وتكەن ساتىنەن. فوتو: TUT.BY

باتىس ساراپشىلارى بەلارۋستەگى احۋال ودان بەتەر ۋشىقسا، ۋكرايناداعى مايدان قايتالانۋى مۇمكىن دەيدى. ال بەلارۋس وپپوزيتسيونەرلەرى قازىرگى جاعدايدى مايدانمەن پارا-پار دەپ باعالاپ، بۇل جاعداي باسقا دا پوستكەڭەستىك-اۆتوريتار جۇيەمەن ءومىر سۇرەتىن مەملەكەتتەرگە دابىل بولۋى ءتيىس دەپ سانايدى.

"The Qazaq Times"