كورنەكى سۋرەت: وكپەنى جاساندى جەلدەتۋ اپپاراتى. فوتو: الەكسەي سۋحورۋكوۆ / ريا نوۆوستي

COVID-19 ينفەكتسياسى كوبىنە تومەنگى تىنىس جولدارىنا اسەر ەتەدى جانە ۆيرۋس جۇقتىرعان ناۋقاستاردىڭ 20%-ىنا جۋىعىندا وكپەگە دەندەپ ەنەدى. ال جاعدايى وتە اۋىر ناۋقاستى دەرەۋ رەانيماتسياعا جاتقىزىپ، وعان وكپەنى جاسانى جەلدەتۋ اپپاراتىنا (ورىسشا يۆل – QT) قوسۋ قاجەتتىگى تۋادى.   

جەلدەتۋ اپپاراتىنىڭ كلاسسيافيكاتسياسى مىنا پارامەترلەر بويىنشا جىكتەلەدى:

  • ناۋقاستىڭ جاسىنا قاراي (1 جاسقا دەيىنگى نارەستەلەر، 1-6 جاس ارالىعىنداعى جانە 6 جاستان اسقان بالالار);
  • ارەكەت ەتۋ ادىسىنە بايلانىستى (تىنىستاۋدىڭ ەلەكترلى ستيمۋلياتورى، ىشكى-سىرتقى قولدانىسقا ارنالعان قۇرىلعىلارى);
  • تاسىمالداۋ-جەتكىزۋ ءتۇرى بويىنشا (ەلەكترلىك، قولمەن، پنەۆماتيكالىق، ارالاس);
  • باسقارىلۋىنا قاراي (ميكروپروتسەسسورمەن نەمەسە باسقاشا).

وكپەسى وزدىگىنەن تىنىستاۋعا، كومىرقىشقىل گازىن شىعارۋعا قينالاتىن پاتسيەنتتەر اتالعان قۇرىلعىسىنا مۇقتاج. مۇنداي جاعدايدا اپپارات تىنىستاۋ جۇيەسىن سۇيەمەلدەيدى.

ەگەر ناۋقاس دەر كەزىندە قۇرىلعىعا قوسىلماسا، وندا ىشكى اعزالار وتتەگى سىڭىرە الماۋىنىڭ سالدارىنان جۇرەك السىرەپ، قان ايداۋى توقتاپ، بىرنەشە مينۋتتا جان تاپسىرۋى مۇمكىن.

اپپارات وڭ قىسىمدى جەلدەتۋ ءپرينتسيپى بويىنشا جۇمىس ىستەيدى. بۇل وكپەگە وتتەگى اۋاسىن ايداپ، ودان سۇيىقتىق سورىپ شىعارادى. قاراپايىم ەستىلگەنىمەن، ءىس جۇزىندە كۇردەلى پروتسەسس. قازىرگى كەزدە ءوججا قۇرىلعىسىنىڭ پاتسيەنت احۋالىنا قاراي ءتۇرى كوپ. ماسەلەن، Pressure Controlled Ventilation, PCV اپپاراتتارى قىسىمدى باقىلاپ-رەتتەۋگە ارنالعان.

ءوججا قۇرىلعىسىندا جاتقان ادام نە سەزىنەدى؟

جاساندى جەلدەتۋدىڭ ەكى ءادىسى بار: ءينۆازيۆتى جانە ءينۆازيۆتى ەمەسى.

جاساندى تىنىستاۋدىڭ ءينۆازيۆتى ەمەس تۇرىندە ناۋقاستىڭ بەتىنە نىعىز بەتپەردەنى تاڭۋ ارقىلى اپپارات جەلىسى وكپەگە جالعانادى. بۇل كەزدە ادامنىڭ تىنىس جولدارىنداعى بارلىق قالىپتى تىنىستاۋ قىزمەتى تابيعي كۇيدە جۇرەدى.

ال ءينۆازيۆتى ءتۇرى ءبىرشاما كۇردەلىرەك. مۇندا پاتسيەنتتىڭ مۇرنى نەمەسە اۋىز ارقىلى تراحەياعا تۇتىك قويىلىپ ينتۋباتسيالانادى.

كەي جاعدايدا قاجەتىنە قاراي تراحەوتوميا دەگەن حيرۋرگيالىق وتا  دا جاسالىپ جاتادى. دارىگەر تراحەياعا جالعانبالى تۇتىكشەنى ورناتۋ ءۇشىن مويىننىڭ كەۋدەگە جاقىن تۇسىن كەسۋگە ءماجبۇر بولادى. تراحەياعا ورناتىلعان تۇتىك ءوججا-عا قوسىلادى. تيىسىنشە جۇيكە يمپۋلسىمەن سايكەستەندىرىلگەن قۇرىلعى وكپەگە وتتەگى بەرىپ، كومىرقىشقىلدى ايدايدى. الايدا اپپاراتقا جالعانعان ادامدار سويلەپ نە ءىشىپ-جەي المايدى. بولەك تۇتىك ارقىلى تاماقتاندىرىلادى. ءينۆازيۆتى جەلدەتۋ اسا اۋىر بولعاندىقتان، ناۋقاستار ادەتتە انەستەزيانىڭ كومەگىمەن ۋاقىتشا نە بەلگىلى ءبىر مەرزىمگە دەيىن كوماعا تۇسەدى.

COVID-19 جۇقتىرعان ناۋقاس اپپاراتتا قانشا ۋاقىت جاتادى؟

ناۋقاستىڭ اپپاراتتا جاتۋ مەرزىمى ونىڭ وكپەسى قانشالىقتى قابىنۋىنا، باسقا اۋرۋلارىنىڭ بارى-جوعىنا، دەنساۋلىق جاعدايىنا تاۋەلدى. ورتاشا ەسەپپەن ادام جاساندى جەلدەتۋ قۇرىلعىسىمەن 2 اپتاداي جاتادى. سونداي-اق اپپاراتتا جاتۋ ۋاقىتى پاتسيەنتتەر اراسىندا ايتارلىقتاي ايىرماشىلىقتا بولۋىن ەستە ۇستاعان ءجون. مەحانيكالىق جەلدەتۋ كەيبىر ناۋقاستارعا بىرنەشە كۇن بويى، باسقالارىنا 4 اپتادان ارتىق ۋاقىتقا قاجەت بولۋى ىقتيمال.

ءوججا-نىڭ تەحنيكالىق سيپاتتاماسى

قۇرىلعىلاردىڭ سيپاتتاماسى بارلىعىندا بىردەي بولا بەرمەيدى.  تىنىستاۋ كولەمى: ەرەسەكتەر مەن بالالارعا ارنالعان ءوججا قۇرىلعىسىنىڭ ستاندارتى 20-2000 مل مولشەرىندە. تىنىس الۋ جيىلىگى: ەرەسەكتەر مەن بالالاردىڭ جوعارى جاقتا ورنالاسقان قۇرىلىمىندا تىنىستاۋ جىلدامدىعى مينۋتىنا 60-80 رەتتەن كەم بولماۋى كەرەك. دەم الۋ-شىعارۋ (I: E)  قاتىناسىنا 2:1-1:9 كوەففيتسيەنتى جەتكىلىكتى. تريگگەر: قىسىم جانە اعىن. اعىن تريگگەرىنىڭ سەزىمتالدىعى 1-15 ل/مين جىلدامدىعىنان كەم ەمەس. وتتەگى فراكتسياسى: 21-100%.

"The Qazaq Times"