اقش كونگرەسى وكىلدەرىنىڭ پالاتاسى كەلەسى جىلعا ارنالعان بيۋدجەت جوباسىن بەكىتتى. قۇجاتتا قىتاي مەن رەسەيگە قارسى بىرقاتار جوبالار، رەسەيلىك «سولتۇستىك اعىن-2»، «تۇرىك اعىنى» گاز قۇبىرلارىنا قاتىستى سانكتسيالاردى كۇشەيتۋ سىندى بولىمدەر بار. جوسپار 1 قازاننان باستالادى. داۋىس بەرۋ زاڭ شىعارۋشى ورگاننىڭ تومەنگى پالاتاسىنىڭ سايتىندا جۇرگىزىلدى.
كونگرەسسمەندەردىڭ 295-ءى $740,5 ملرد بيۋدجەت جوباسىن قولداپ داۋىس بەرسە، 125-ءى قارسى شىقتى. قۇجات ۋاشينگتون اكىمشىلىگىنىڭ «سولتۇستىك اعىن-2» رەسەيلىك گاز قۇبىرىنا قاتىستى قولدانىستاعى سانكتسيالارىن كۇشەيتەدى. 2019 جىلدىڭ جەلتوقسانىندا اقش پرەزيدەنتى دونالد ترامپ رەسەيلىك جوبالارعا قاتىستى سانكتسيالار ەنگىزۋ تۋرالى اسكەري بيۋدجەتكە قول قويعان. ەندى «سولتۇستىك اعىن-2» جانە «تۇرىك اعىنى» قۇرىلىسىنا ارنالعان قۇبىرلاردى سالۋ ءۇشىن كومەكتەسەتىن شەتەلدىك تۇلعالارعا قارسى سانكتسيا ەنگىزىلەدى.
كەلەسى جىلعا قاراستىرىلعان بيۋدجەت كولەمىنە زەر سالساق. ۋاشينگتون قابىلداعان جوباداعى «رەسەيدى تەجەۋ» ءبولىمى بويىنشا 3,8 ملرد دوللار بولىنگەن. سونىمەن قاتار كەلەسى جىلى امەريكا ۋكرايناعا 250 ملن دوللار كولەمىندە اسكەري كومەك بەرمەك.
زاڭ شىعارۋشىلار «ءۇندى جانە تىنىق مۇحيتى ايماعىنداعى قىتاي ىقپالىن تەجەۋ» ماقساتىندا 3,6 ملرد دوللار بولمەك. بۇل قىتايدىڭ بىرقاتار جوبالارىنا، يادرولىق سىناقتار جۇرگىزۋ قادامدارىنا قارسى باعىتتالعان. سونىمەن قاتار كونگرەسسمەندەر ەلدىڭ مەملەكەتتىك ورگاندارىنىڭ ەلەكتروندىق قۇرىلعىلارىندا TikTok قوسىمشاسىن پايدالانۋعا تىيىم سالدى. ال كوروناۆيرۋس پاندەمياسىمەن كۇرەسۋگە پەنتاگونعا بيۋدجەتتەن $1 ملرد قاراستىرىلعان.
رەسەيلىك «گازپروم» «سولتۇستىك اعىس-2» كونسورتسيۋمىن باسقارادى. 11 ملرد دوللار بولاتىن قۇرىلىس بىلتىر اياقتالۋى كەرەك ەدى. قۇبىر جۇمىستارى رەسەي گازىنىڭ گەرمانياعا ۋكراينا اۋماعىن اينالىپ ءوتۋ كولەمىن ەكى ەسە ارتتىرۋ ماقساتىندا قولعا الىنعان. بىراق جوبا امەريكا سانكتسياسىنان كەيىن ۋاقىتشا توقتاتىلدى. قۇرىلىس تولىعىمەن اياقتالۋى ءۇشىن ءالى 100 شاقىرىمنان استام جەرگە قۇبىر جۇرگىزۋ كەرەك. بۇعان دەيىن رەسەي بيلىگى 2020 جىلدىڭ سوڭى نەمەسە 2021 جىلدىڭ اياعىندا جوبانىڭ قۇرىلىسى اياقتالادى دەپ حابارلاعان.
پرەزيدەنت ۆەتوسى
سەيسەنبىدە اق ءۇي حابارلاعانداي، ترامپ بىرقاتار ەرەجەلەرگە بايلانىستى قۇجاتقا ۆەتو قويماق. بۇل رەتتە ءبىرىنشى كەزەكتە اقش-تا ازاماتتىق سوعىس كەزەڭىندە (1861-1865) قۇل يەلەنۋشىلىك بولعان وڭتۇستىك شتاتتار كونفەدەراتسياسى قايراتكەرلەرىنىڭ قۇرمەتىنە اتالعان اسكەري وبەكتىلەردى قايتا اتاۋ تۋرالى تارماق بار.
«بيلىكتىڭ اتقارۋشى تارماعى وكىلەتتىكتەرىن باقىلاۋعا، اۋعانستانداعى قاراجاتتى پايدالانۋعا قاتاڭ شەكتەۋلەر ەنگىزۋگە، پرەزيدەنتتىڭ ۇلتتىق مۇددەلەردى قورعاۋ جونىندەگى وكىلەتتىكتەرىن وزگەشە تۇردە شەكتەۋگە باعىتتالعان زاڭ جوباسىنىڭ ەرەجەلەرىنە قاتىستى ماڭىزدى ماسەلەلەر بار»، – دەپ اتاپ ءوتتى اق ءۇي اكىمشىلىگى. بۇل جەردە اڭگىمە پرەزيدەنتتىڭ اۋعانستان، گەرمانيا، كورەيا رەسپۋبليكاسى، افريكا ەلدەرىنەن اسكەرلەردى شىعارۋ جونىندەگى وكىلەتتىكتەرىن شەكتەۋ تۋرالى بولىپ وتىر.
نەگىزىنەن اقش-تىڭ اسكەري بيۋدجەت جوباسى ءالى دە تولىق بەكىتىلگەن جوق. وسى اپتادا جوبانىڭ نۇسقاسىن كونگرەسس سەناتى ماقۇلداۋى كەرەك. كەيىننەن ەكى جوبانىڭ ەرەجە-تالاپتارىن رەتتەۋ ءۇشىن ارنايى كوميسسيا شاقىرىلادى.
قوس پالاتا دا كەلىسىلگەن قۇجاتقا قايتادان داۋىس بەرۋى ءتيىس، سودان كەيىن ول اق ءۇي باسشىسىنا قول قويۋعا جىبەرىلەدى. بۇل پروتسەسس ادەتتە كۇزگە دەيىن سوزىلادى.
استانادا قالعان جاڭاوزەندىك جۇمىسسىزدار "قازمۇنايگاز" كەلىسسوزدى توقتاتىپ تاستادى دەيدى
فبر پەنتاگوننىڭ قۇپيا قۇجاتتارىنىڭ جاريالانۋىنا قاتىسى بار كۇدىكتىنى قامادى
بىشكەكتە كاسىپكەرلەر جاڭا سالىق ەرەجەلەرىنە قارسى اكتسيا وتكىزدى
موڭعوليا استاناسىندا جاپپاي نارازىلىق شەرۋلەرى ءوتتى
ەكىباستۇزدا جىلۋ جەلىسىندەگى اقاۋعا "ستانتسيا قىزمەتكەرىنىڭ قاتەلىگى" سەبەپ بولعانى ايتىلدى