كارانتين كەزىندە قانشا كاسىپكەر شىعىنعا ۇشىرادى، قانشاۋى نارىقتان شىعىپ قالدى؟ ەكونوميكانىڭ كۇرە تامىرى ورتا جانە شاعىن كاسىپكەرلىك سالاعا مەملەكەت تاراپىنان قانداي قولداۋ بولىپ جاتىر؟ بەيسەنبى كۇنگى ورتالىق كوممۋنيكاتسيا قىزمەتىندە «بيزنەستى دامىتۋ جانە قولداۋ» تاقىرىبىندا  وتكەن بريفيننتە رەداكتسيا سۇراعىنا جارتىلاي جاۋاپ بەرىلدى.

قوعامداعى نەگىزگى سەرۆيس سالاسى بولىپ سانالاتىن شاشتاراز، حيميالىق تازالاۋ، ءسان سالوندارى جانە جەتكىزۋ قىزمەتى قاراستىرىلماعان قوعامدىق تاماقتانۋ ورىندارى، كاسىپكەرلەرگە قانداي ناقتى قولداۋ ءتۇرى جوسپارلانعان دەگەن ساۋالعا «دامۋ» قورى اق باسقارما توراعاسىنىڭ ورىنباسارى فارحات سارسەكەەۆ:

«بيزنەستىڭ جول كارتاسى – 2025» باعدارلاماسى بويىنشا 14,5% مولشەرىندەگى نەسيەنىڭ  8,5%-ىن ءبىز سۋبسيديالايمىز. كەپىلدىك كولەمى جەتىسپەسە، ءبىز بەرە الامىز. تج رەجيمى كەزىندە قىزمەت كورسەتۋ جانە باسقا دا سالالار شەڭبەرىندە 1128 جوبا سۋبسيديالاندى. 35 جوباعا كەپىل بولۋعا كومەكتەستىك»، – دەپ قىسقا قايىردى.

ەلىمىزدە 1,2 ملن-عا جۋىق دارا كاسىپكەرلىك نىسانى بار. سونىڭ نەبارى 1200-دەيىنە عانا قولداۋ جاسالعان.

شەنەۋنىكتىڭ سوزىنشە، «دامۋ» قورىنان قايتارىمسىز نەسيە بەرىلمەيدى. تەك وزگە مەملەكەتتىك باعدارلامامەن يننوۆاتسيالىق جوبالارعا عانا گرانت تاعايىندالاتىن كورىنەدى.

ەكونوميكا مينيسترلىگىنە قاراستى كاسىپكەرلىكتى دامىتۋ دەپارتامەنتiنiڭ ديرەكتورى شىڭعىس احمەتوۆ:

– «بيزنەستىڭ  جول كارتاسى – 2020» باعدارلاماسى اياسىندا ارنايى، ءىسىن جاڭادان باستاۋعا ىنتالى كاسىپكەرەلەرگە قولداۋ رەتىندە بەرىلەتىن تولەم جالعاسادى. بۇگىنگى تاڭدا تولەم كولەمى 750 مىڭ تەڭگە ۇلعايىپ وتىر. گرانتتاردىڭ بيىلعى بيۋدجەتى – 1 ملرد 200 ملن تەڭگەگە جەتكەن. مۇنى جەرگىلىكتى اتقارۋشى بيلىك جۇرگىزەدى. جوسپارعا سايكەس كونكۋرس ارقىلى ەكىنشى جارتى جىلدىقتا بەرىلمەك. بۇل جونىندە وڭىرلەردەگى كاسىپكەرلەردى قولداۋ پالاتاسى ارقىلى اقپارات الىپ، كونكۋرسقا قاتىسۋعا مۇمكىندىك بار، – دەيدى.

«كارانتين شەكتەۋىنەن جۇمىسى توقتاپ-تۇرالاپ تۇرعان جشس جانە جەكە كاسىپكەرلەردىڭ شاما سانى قانشا؟»، «بيزنەس بىلىكتىلىگى بويىنشا ءبىلىم الىپ، كاسىپتىك جوسپارىن قورعاپ شىققان بولاشاق كاسىپكەرلەرگە 550 مىڭ ₸  كولەمىندە قايتارۋسىز قارجى بەرۋ نەگە باسەڭدەپ قالدى؟ بۇل كورسەتكىش 2020 جىلدىڭ ءى جارتىجىلدىعىندا نەشەگە جەتتى؟ بىلتىر وسىنداي قولداۋعا قول جەتكىزگەندەر سانى قانشا بولىپ ەدى؟» دەگەن ساۋالدار الدىن-الا جولدانعانىنا قاراماستان، جاۋاپتى شەنەۋنىكتەر جاۋاپ بەرۋدەن قاشقاقتادى.

;t=725s

"The Qazaq Times"