دەليدە ساۋداگەرلەر قىتايمەن شەكارادا بولعان قاقتىعىسقا نارازىلىق ءبىلدىرىپ، قىتاي تاۋارلارىن ورتەدى. ءۇندىستان بيىل جىل سوڭىنا دەيىن قىتايدان يمپورتتالاتىن تاۋار كولەمىن 13,5 ميلليارد دوللارعا قىسقارتپاق.

The Indian Express باسىلىمىنىڭ حابارلاۋىنشا، «قىتايعا بويكوت» شاراسىن ءۇندىستان ساۋداگەرلەرىنىڭ كاسىپقوي بىرلەستىگى ۇيىمداستىرعان. شەرۋشىلەر بيلىكتەن قىتايدان اكەلىنەتىن بارلىق تاۋارعا بويكوت جاريالاپ، وسى ەلدىڭ مەملەكەتتىك كومپانيالارىمەن جاسالعان كەلىسىمشارتتاردى جويۋعا شاقىردى.

19 ماۋسىمدا ءۇنجىستاننىڭ بىرقاتار قالالارىندا قىتاي بيلىگىنە قارسى نارازىلىق شەرۋلەرى وتكەن. شەرۋشىلەر قىتاي تۋىنا ورالعان تابىتتى جاعىپ، سۋعا لاقتىردى. نيۋ-دەليدە بىرنەشە ارداگەر قىتاي ەلشىلىگىنىڭ الدىنا جينالىپ نارازىلىعىن ءبىلدىردى.

17 ماۋسىمدا قىتاي مەن ءۇندىستان شەكاراسىندا اتىس بولىپ، 20 سارباز وققا ۇشقان. باتىس باسىلىمدارى بۇل سوڭعى 45 جىل ىشىندە ورىن العان العاشقى قارۋلى قاقتىعىس دەپ باعالادى. ءۇندى ارمياسىنىڭ مالىمدەمەسىندە ەكى ەلدىڭ قورعانىس مينيسترلىك وكىلدەرى شيەلەنىستى رەتتەۋ ماقساتىندا كەزدەسۋ وتكىزەدى دەلىنگەن. قىتاي تاراپى مۇنداي كەزدەسۋ وتكىزىلىپ جاتقانىن راستادى جانە ءۇندىستاندى «مەملەكەتتىك شەكارانى بۇزدى» دەپ ايىپتادى. ءوز كەزەگىندە ءۇندىستاننىڭ سىرتقى ىستەر مينيسترلىگى قىتايعا وتكەن اپتادا جاسالعان شەكارا سىزىعى تۋرالى كەلىسىمدى بۇزدى دەپ ايىپتاپ وتىر. ءۇندى ءسىم مالىمدەمەسىنە سايكەس، «قيان-كەسكى قاقتىعىس قىتاي تاراپىنىڭ وڭىردەگى شەكارالىق باقىلاۋدى وزگەرتپەك بولعانى ءۇشىن ورىن العان».

"The Qazaq Times*