الەمدەگى ەڭ ءىرى ەكونوميكاسى اقش كوروناۆيرۋس ىندەتى كەزىندەگى جوعالتۋلارىنىڭ ورنىن بىرتىندەپ تولتىرا باستادى. كەيبىر امەريكالىق باق «داعدارىس باستالماي جاتىپ اياقتالدى» دەپ بورىگىن اسپانعا اتىپ جاتىر. الايدا، ەكونوميستەر ولاي قارامايدى.

ەكسپەرتتەردىڭ سوزىنە سەنسەك، ىندەت كەزىندەگى ەكونوميكاداعى جوعالتۋلاردىڭ ورنى تولۋ ءۇشىن كوپ ۋاقىت كەتەدى، سوندىقتان دا قۋانۋعا ءالى ەرتە. قازىر الەمدە ىندەت جۇقتىرعاندار ەڭ كوپ تىركەلگەن ەل دە قۇراما شتاتتار. بۇل جاعداي قاراشادا بولاتىن پرەزيدەنت سايلاۋىنا اسەر ەتپەي قالمايدى. اق ءۇي تارابى بۇل كەلەڭسىزدىكتەن ساتكە بولسا دا مۇرسات الۋ ءۇشىن ەكونوميكاداعى جاقسى جاڭالىقتى باسا كورسەتىپ جاتىر.

ترامپ ەكونوميكاداعى جاقسى جاڭالىقتى سايلاۋشىلارمەن ۇزاعىنان ءبولىستى. «سىزدەردىڭ كىرىستەرىڭىز ءبىراز ازايىدى. بىراق، ءبىز كەيىنگى توقساندا ءبارىن قايتا قايتا تولتىردىق. ءبىزدىڭ فۋدامەنتالدى ەكونوميكامىز بار. الداعى ءۇشىنشى توقساندا ءبىزدى كەرەمەتتەر كۇتىپ تۇر. ەگەردە 3 قاراشادا (سايلاۋ كۇنى) كەزدەيسوقتىق جاساماساق، وندا كەلەسى جىلى ءبىزدىڭ ەكونوميكامىز تاريحتاعى ەڭ عاجايىپ جاعدايدى جاسايدى»، – دەدى ترامپ سايلاۋشىلارمەن كەزدەسكەندە.

ونىڭ بۇلاي ايتۋىنا شىنىندا سەبەپتەر بار. سوڭعى 11 اپتادا جۇمىسسىزدار بىرتىندەپ ازايىپ، ءوندىرىس جاندانا ءتۇستى. بىراق، اقش ورتالىق بانكىنىڭ باسشىسى جەروم پاۋەلل ترامپقا ۇقساس قۋانعان جوق. ول ەكونوميكانىڭ قاشان تولىق قالپىنا كەلەتىنىن بولجاۋ مۇمكىن ەمەس دەپ قارايدى. ترامپ امەريكالىقتاردى سۇيىنشىلەگەن كورسەتكىشتەردىڭ وزىنەن پاۋەلل بىرقاتار تۇيتكىلدى تۇستاردى تاۋىپ شىقتىن. ول 45 ملن امەريكالىقتىڭ جاردەماقى سۇراپ وتىرعانىن العا تارتقان. ونىڭ ۇستىنە ءوندىرىس مامىر ايىندا جاندانا تۇسكەنىمەن بۇرىنعىداي 15 پايىز تومەن دەڭگەيدە قالىپ وتىر.

ترامپ بيلىككە كەلەردە ەل ەكونوميكاسىن 5-6 پايىزعا دەيىن ءوسىرۋدى ۋادە ەتكەن بولاتىن. 2018 جىلى ەكونوميكالىق ءوسىم 3 پايىزعا دا جەتپەي قالدى. 2019 جىلى بولسا 2,3 پايىز عانا ءوسىم كورسەتتى. بىراق، ترامپ بيلىك قۇرعان كەزدەگى الەمدىك جاعدايدى دا ەسكەرسە، سايلاۋ ناتيجەسىنە اسەر ەتۋى دە مۇمكىن. اقش ەكونوميكاسىندا قالپىنا كەلۋ پروتسەسى بايقالعانىمەن قۋاتتى ستيمۋلياتور بولماسا داعدارىستان وڭاي ءوتىپ كەتۋ مۇمكىن ەمەس دەيتىن ەكونوميستەر دە كوپ.

“The Qazaq Times”