قازاقستاننىڭ قازىرگى پرەزيدەنتى توقاەۆتىڭ باسپاسءوز حاتشىسى بەرىك ۋءالي ءوزىنىڭ كوروناۆيرۋس جۇقتىرعانىن حابارلادى.

ول Facebook جەلىسىندەگى جەكە پاراقشاسىندا 5 ماۋسىمدا تاپسىرعان تەستىنەن ۆيرۋس تابىلعانىن، اۋرۋحانادا ەمدەلىپ جاتقانىن جازدى. جازبا سوڭىنا جەلى قولدانۋشىلارى 1,5 مىڭداي پىكىر قالدىرىپ، 200-گە جۋىق مارتە بولىسكەن. كوبىنە «ساۋىعىپ كەتۋىنە» تىلەك بىلدىرگەن.

«قازىر اۋرۋحانادا، دارىگەرلەردىڭ قاراۋىندا جاتىرمىن. جاعدايىم ءبىر قالىپتى. اسا الاڭدايتىنداي ەمەس» دەپ جازدى.

سونداي-اق حاتشى ءۋالي باستىعى توقاەۆتىڭ دەنساۋلىعى جونىندە دە ءسوز ەتكەن.

«باسىن اشىپ ايتاتىن ماسەلە، پرەزيدەنت بەلگىلەنگەن كەستەگە سايكەس جۇمىس ىستەپ جاتىر. مەملەكەت باسشىسىنىڭ دەنساۋلىعىنا ەشقانداي قاۋىپ ءتونىپ تۇرعان جوق. قاسىم-جومارت كەمەلۇلى ۇنەمى تەست تاپسىرىپ، قورىتىندىسىن الىپ وتىر»، – دەگەن شەنەۋنىك اقوردادا سانيتارلىق رەجيم كۇشەيتىلىپ، قاۋىپسىزدىك شارالارى قاتايتىلعانىن دا حابارلادى.

43 جاستاعى بەرىك ءۋالي 2019 جىلدىڭ ناۋرىزىنان بەرى اۋەلى تاعايىندالىپ، كەيىننەن سايلانعان توقاەۆتىڭ ءباسپاسوز حاتشىسى ءارى بيلىك پارتياسى نۇر وتاننىڭ «ەڭ ءجۇزى جىلى» مۇشەسى.

– وسى ىندەت باستالعالى بارلىعىمىز دابىل قاعىپ، ساقتانۋعا، دەرتتى جۇقتىرماۋدىڭ جولدارىن قاراستىرۋعا شاقىرىپ كەلەمىز. بىراق پاندەمياعا سەنبەيتىن، اۋرۋدى جوق دەۋشىلەر ازايماي تۇر. وندايدا «اۋىرعان ادامدى كورسەتىڭدەرشى»، «مەنىڭ تانىسىمنىڭ بىردە-ءبىرى اۋىرعان جوق. سوندا ونىمەن كىم اۋىرىپ جاتىر؟»، «اۋىرعان ادامداردىڭ اتتارىن نەگە اتامايدى؟» دەگەن سياقتى پىكىرلەردى ءجيى ەستيتىنبىز. مىنە، مەن دەرت جۇقتىردىم، ونى جاسىرماي جاريالاپ وتىرمىن. مۇنداعى ماقسات الاڭسىز جۇرگەن ازاماتتار ويلانسىن، سەنبەي جۇرگەن كىسىلەردىڭ كوزى جەتسىن دەگەنىم. اۋرۋ بار. ونى جۇقتىرۋشىلاردىڭ سانى كۇن سايىن ارتىپ جاتىر. قانشا جەردەن ساقتىق شارالارىن قاتاڭ ساقتاپ جۇرسەك تە، ءبىز دە جۇقتىردىق. ەندى ەمدەلۋ كەرەك، – دەيدى ءۋالي سەنبەيتىندەردىڭ كوزىن جەتكىزگىسى كەلىپ.

بۇعان دەيىن الەمنىڭ دامىعان، وركەنيەتتى ەلدەرىندە ءبىرىنشى باسشىلار مەن جوعارى لاۋازىمداعى شەنەۋنىكتەردىڭ كوروناۆيرۋس جۇقتىرعانى حابارلانعان. قازاقستاننىڭ دەنساۋلىق ساقتاۋ مينيسترلىگى مەن باس مەملەكەتتىك سانيتاردىڭ كارانتين كەزىندە مەديا جانە باق قىزمەتىن شەكتەۋ شەشىمىنەن سوڭ، ەلدە اقپارات جەتىسپەۋشىلىگى تۋىپ، ونىڭ ورنىن كۇمان مەن جالعان مالىمەت تولتىرىپ، ۆيرۋستىڭ بارىنا سەنبەيتىندەر كوبەيگەن.

"The Qazaq Times"