اۋعانستان پرەزيدەنتى اشراف عاني ساياسي قارسىلاسى ابدۋللامەن پرەزيدەنتتىك بيلىكتى بولىسۋگە كەلىسىم بەردى. قىركۇيەك ايىنداعى سايلاۋدان بەرى ابدۋللا مەن پرەزيدەنت عاني وزدەرىن جەكە-جەكە پرەزيدەنت رەتىندە اتاپ كەلە جاتقان بولاتىن. ەلدە رەسمي ۇكىمەت پەن بىرگە تالىپتەردە ەل اۋماعىنىڭ باسىم كوبىنە بيلىك جۇرگىزۋدە، بۇل جاعدايدان كەيىن ەلدە ەكى بيلىك جانە رەسمي ۇكىمەتتە ەكى پرەزيدەنت پايدا بولدى. 

پرەمەر-مينيستر بولىپ تۇرعان كەزىندە ابدۋللا ابدۋللا پرەزيدەنت سايلاۋعا قاتىسىپ، اشراف عانيدان ءسال عانا پارىقپەن جەڭىلىپ قالعان ەدى. ەلدەگى ورتالىق سايلاۋ كوميسسياسى وسىنداي قورىتىندى شىعارعان. الايدا، ابدۋللا سايلاۋ قورتىندىسى بۇرمالاندى دەپ ايىپتاپ، ءوزىن پرەزيدەنت رەتىندە اتاپ كەلدى. ءتىپتى، ناۋرىز ايىندا عاني مەن ابدۋللا ءبىر ۋاقىتتا پرەزيدەنتتىك يناۋگۋراتسيا وتكىزدى.

ال، قازىر پرەزيدەنت اشراف عاني پرەزيدەنتتىك بيلىكتى ابدۋللامەن ءبولىسۋ تۋرالى كەلىسىمگە قول قويدى. ناتيجەسىندە عاني پرەزيدەنت رەتىندە قالا بەرەدى، ال ۇكىمەت ۇيىستىرۋ، مينيسترلەردى باسقارۋ قىزمەتىن ابدۋللا اتقارماق.

اۋعان جۇرتىندا پرەزيدەنت سايلاۋعا دەيىن دە وسىنداي ەكىگە جارىلعان بيلىك ءومىر ءسۇرىپ كەلگەن ەدى. سايلاۋدان كەيىن رەسمي بيلىكتىڭ قۇزىرەتى ءبىر ورتالىققا قاراي شوعىرلانادى دەپ ۇمىتتەنگەن، بىراق، ولاي بولماي شىقتى. ەگەر رەسمي بيلىك پەن «تاليبان» ۇيىمى (كوپتەگەن ەلدە تەررورلىق ۇيىم رەتىندە تانىلعان) اراسىندا كەلىسسوزدەر باستالسا، كەلىسسوز دەلەگاتسياسىن ابدۋللا باسقاراتىنى بەلگىلى بولىپ وتىر.

“The Qazaq Times”