فوتو: voxpopuli.kz/

8 ساۋىردە  شتاب-پاتەرى پاريجدە ورنالاسقان  «ادام قۇقىقتارى جونىندەگى حالىقارالىق فەدەراتسياسى (FIDH)» الەم ەلدەرىنىڭ ۇكىمەتتەرىن كوروناۆيرۋس پاندەمياسى كەزىندە تۇرمەدەگى قۇقىق قورعاۋشىلار مەن ساياسي تۇتقىنداردى بوساتۋعا شاقىرىپ مالىمدەمە جاسادى دەپ جازدى ورتالىق ازيا جاڭالىقتار قىزمەتى.

بۇۇ-نىڭ ادام قۇقىقتارى جونىندەگى جوعارعى كوميسسارى ميشەل باچەلەتتىڭ مالىمشەۋىنشە، ۇكىمەتتەر نەگىزسىز قاماۋعا الىنعاندار مەن جازىقسىز قۋدالانعانداردى بوساتۋى ءتيىس. كامەلەت جاسقا تولماعاندار، ميگرانتتار، بوسقىندار، ساياسي باقتالاستار، جۋرناليستەر، قۇقىق قورعاۋشىلار تۇرمەلەردەن شىعۋى ءتيىس دەلىنگەن مالىمدەمەدە.

ۇيىمنىڭ ۆەب-سايتىندا تۇرمەدە وتىرعان ونداعان قۇقىق قورعاۋشىنىڭ ەسىمىدەرى جاريالاندى.

كوروناۆيرۋس پاندەمياسى باستالعان ۋاقىتتا الەمنىڭ بىرقاتار ەلى، سونىڭ ىشىندە تۇركيا مەن باحرەين، تۇرمەدەگى تۇتقىنداردىڭ ءبىر بولىگىن بوساتتى. بىراق تەرروريزمگە قاتىسى بار ايىپتارمەن سوتتالعاندار بۇل تىزىمگە كىرمەي قالعان. FIDH قاماۋداعى قۇقىق قورعاۋشىلاردىڭ دەنى تەرروريزمگە قاتىستى جالعان ايىپتارمەن وتىرعانىن اتاپ ءوتتى.

بۇعان دەيىندە بەلگىلى قۇقىق قورعاۋشى، زاڭگەر ابزال قۇسپان ەل پرەزيدەنتى قاسىم-جومارت توقاەۆقا اشىق حات جازىپ ەلدەگى تەرگەۋ يزولياتورلارى مەن تۇرمەلەردەگى جاعدايدىڭ حالىقارالىق تالاپتارعا مۇلدە ساي كەلمەيتىنى سەبەپتى تۇرمەلەر مەن تەرگەۋ يزولياتورلارىنداعى جازاسى اسا اۋىر ەمەس، كىسى ولتىرمەگەن، قوعامعا قاۋىپ توندىرمەيتىن نەمەسە جازا مەرزىمى اياقتالۋعا جاقىن، ەكونوميكالىق قىلمىستار بويىنشا سوتتالعان ازاماتتاردى، سونىڭ ىشىندە زەينەتكەرلەر مەن ايەلدەردىڭ جازالارىن جەڭىلدەتىپ، ۇيقاماققا جىبەرۋ تۋرالى ۇسىنىسىن ايتقان بولاتىن.

"The Qazaq Times"