ەرتەڭ ياعىني 6 ساۋىردەن باستاپ قازاقستاندا مەكتەپ وقۋشىلارى قاشىقتان وقي باستاماق. قىتايدان باستاۋ العان كوروناۆيرۋس سالدارىنان ەلدە كارانتين جاريالانىپ ءبىلىم جانە عىلىم مينيسترلىگى «قاشىقتان وقۋ» جۇيەسىن ۇسىنعان.بۇعان دەيىن ءتۇرلى ايماقتارداعى مەكتەپ وقۋشىلارى قاشىقتان وقۋعا الدىن الا دايىندالعان. وسى دايىندىقتىڭ ناتيجەسىندە وتىز جىلدىق «جارقىن بولاشاعىمىزدىڭ» انىعى«تسيفرلى قازاقستان» ۇرانىنىڭ ارتى اشىلىپ قالدى. 

وتكەن جۇما كۇنگى ءبىلىم جانە عىلىم ۆيتسە ءمينيسترى رۇستەم بيعاري مەن «قازپوشتا» باسقارما تورەعاسى ساكەن سارسەنوۆ تسيفرلى قازاقستاننىڭ «تسيفرىنىڭ جەتپەي قالعان» جەرلەرىندەگى وقۋشىلاردى حات ارقىلى وقىتپاق بولىپ مەموراندۋعا قول قويىسقان.

تاراپتاردىڭ سوزىنە سەنسەك سيقىرلى مۇعالىم «قازپوشتا» وقۋ ماتەريالدارى مەن وقۋشىلاردىڭ تاپسىرمالارىن ۋاقتىلى جەتكىزىپ تۇرماق.

رەسمي دەرەكتەرگە ۇڭىلسەك جەر الەمدى ورمەكشىنىڭ تورىناندا ءجيى تورلاعان اۋە تولقىننىڭ ەلىمىزدە جەتپەي قالعان جەرى جەتەرلىك ەكەن. سونىڭ سالدارىنان 20  مىڭ وقۋشى «قازپوشتا» ارقىلى وقىماق. مىنە ساعان تسيفرلى قازاقستان. الىس اۋىلدار تۇگىلى كەشە عانا اتى ءماشھۇر ەكسپو وتكىزگەن استانا مەن عىلىم مەن تەحنيكانىڭ ورتاسى سانالاتىن الماتىنىڭ تۇبىندەگىلەردىڭ ءوزى ينتەرنەتكە جارىپ وتىرعان جوق.

وسىعان دەيىندە دە ءبىراز تۇرعىنى ينتەرنەت جەلىسىسىنىڭ ناشار نەمەسە مۇلدەم جوق ەكەنىنە شاعىمدانعان بولاتىن.

سونى قاپەرگە السا كەرەك اقپارات جانە قوعامدىق دامۋ ءمينيسترى اباەۆتىڭ 26 ناۋرىزداعى ايتقانىن ەسكەرسەك ونلايىن ساباقتار 30 مينۋتقا دەيىن بولاتىنىن، قوسىمشا كەسكىندى ساباقتار جەرگىلىكتى تەلەارنالار ارقىلى كورسەتىلەتىنىن ايتقان-دى.

اقپارات جانە قوعامدىق دامۋ ءمينيسترى اباەۆتىڭ «2017 جىلى  ەلىمىزدەگى ينتەرنەتتى پايدالانۋشىلاردىڭ سانى  78,8 پايىزعا جەتتى» دەگەنى وتىرىك ەكەنىن كوز كوردى. ەندى ءمينيستردىڭ «2021 جىلى تۇرعىندارىنىڭ سانى 50-دەن اساتىن 6 مىڭ اۋىلدىق مەكەن ينتەرنەتپەن قامتىلادى. قازىرگى ۋاقىتتا اۋىلدىق ەلدى مەكەندەردەگى تاپشىلىقتى وپتيكالىق بايلانىس جەلىلەرى تەحنولوگياسى بويىنشا كەڭ جولاقتى ينتەرنەتپەن قامتاماسىز ەتۋ جوباسى ىسكە قوسىلعان» دەگەن ءسوزىنىڭ اقىرىن كۇتە تۇرامىز.

ايتا كەتەرلىگى بۇعان دەيىن ءبىلىم جانە عىلىم ءمينيسترى ايماعامبەتوۆ قازاقستانداعى جوعارى وقۋ ورىندارىنىڭ 30 پايىزى قاشىقتان وقۋعا دايىن دەگەن. 16 ناۋرىزدان باستاپ جوعارى وقۋ ورىندارى مەن كوللەدجدىڭ قاشىقتان وقۋعا كىرىسكەن ستۋدەنتەرىنىڭ ءبىرازى اۋىل ماڭىنداعى تاۋ باسى مەن ءۇي-ءۇيدىڭ توبەسىندە «تسيفرلى قازاقستاننىڭ» تسيفرىن جەلىسىن قۋىپ ءجۇر. ەندىگى كەزەك مەكتەپ وقۋشىلارىندا. الدىدا ولاردان دا تالاي جامباستاپ جاتىپ الىپ ايتاتىن اڭگىمە تابىلار.

"The Qazaq Times"