تازا التىننان سۇڭقارعا ەسكەرتكىش قۇيدىرعان ۇلى ءامىرشى وزىدە سول ەسكەتكىشكە اينالدى.

ءبىر كۇنى تاڭەرتەڭ شىڭعىسحان نوكەرلەرىن ەرتىپ ساياتقا شىعادى. نوكەرلەرىنىڭ قولىندا ساداق، قورامساعى تولى جەبە. شىڭعىسحاننىڭ ءوزى قولىنا ەڭ جاقسى كورەتىن سۇڭقارىن قوندىرىپ العان. سۇڭقارعا ەشبىر مەرگەن تەڭ كەلمەس ەدى. ويتكەنى، قىراعى قۇس جەمتىگىن قۇزار شىڭنان كورىپ، ادام اياعى جەتپەس جەرگە وڭاي جەتەر ەدى. ساياتشىلار كوڭىلدى بولعانمەن، الدىلارىنان كولدەنەڭ اڭ شىعا قويمايدى. بۇعان قىنجىلعان شىڭعىسحان قوسقا قانجىعاسى بوس كەلە جاتادى. اشۋمەن بىرەۋدى رەنجىتەرمىن دەپ، نوكەرلەرىنەن بولەكتەنىپ، كوپشىلىكتەن جالعىز سۋىرىلىپ شىعادى. ورمان ىشىندە ۇزاق ءجۇرىپ قالادى. شارشاپ-شالدىعىپ، كەنەزەسى كەۋىپ كەرى قايتادى. سول جىلى قۋاڭشىلىق بولىپ، وزەندەردىڭ ارناسى كەۋىپ قالعان ەكەن. ءبىر جۇتىم سۋعا زار بولىپ كەلە جاتقاندا، و، ءتاڭىرىم، قارسى الدىنداعى جارتاستان تامشىلاپ اعىپ تۇرعان بۇلاقتى كورەدى. قولىنداعى سۇڭقاردى شەشىپ، كۇمىس توستاقتى تامشىلاپ اققان بۇلاققا توسادى. توستاق كەنەرەسىنەن اسىپ، شۇپىلدەپ تولعانشا اسىقپاي كۇتەدى. تولعان توستاقتى ابايلاپ ۇستاپ اۋزىنا جاقىنداتا بەرگەندە، جانىنداعى سۇڭقارى قاناتىن قاعىپ-قاعىپ جىبەرەدى دە، توستاقتاعى سۋ توگىلىپ، ىدىسى انادايعا دومالاپ كەتەدى. شىڭعىسحان كارىنە مىنەدى. بىراق ءوزى قاتتى جاقسى كورەتىن سۇڭقارى دا شولدەگەن بولار دەپ ويلاپ، سابىرعا كەلەدى. توستاقتى كوتەرىپ، قايتادان تامشىنىڭ استىنا توسادى. توستاق تولا سالىسىمەن سۇڭقار ونى تاعى دا قاعىپ جىبەرەدى. شىڭعىسحان بۇل قۇستى ەرەكشە باعالايتىن، بىراق مىناۋ قىلىعى شىمبايىنا باتادى قىلىشىن قىننان سۋىرىپ الادى دا، ەكىنشى قولىمەن توستاقتى قايتادان تامشىنىڭ استىنا توسادى. ءبىر كوزىمەن سۋدى باقسا، ەكىنشى كوزىمەن سۇڭقاردى قاداعالاپ تۇر. توستاق تولعان كەزدە سۇڭقار قايتادان قاناتىن قاعادى. بىراق شىڭعىسحان لەزدە قۇستىڭ باسىن شاۋىپ تاستايدى. ءدال سول كەزدە سۋ تامشىسى دا توقتاپ قالادى. نەدە بولسا سۋدىڭ باستاۋىن كورۋىم كەرەك دەپ شەشەدى. جارتاستىڭ باسىنا شىعادى. جارتاستىڭ ەڭ بيىگىندە قاينار بار ەكەن. ىشىندە وسى جەردى مەكەندەيتىن وتە ۋلى جىلان ءولىپ جاتىر ەكەن. جاڭاعى سۋدى ىشسە، ءتىل تارتپاي كەتەتىنىن ءتۇسىندى. شىڭعىسحان قوسقا ءولى قۇسىن ۇستاپ كەلەدى. كەلە سالىسىمەن تازا التىننان سۇڭقاردىڭ ەسكەرتكىشىن قۇيدىرادى. التىن سۇڭقاردىڭ ءبىر قاناتىنا «ەگەر دوسىڭ ساعان ۇنامسىز مىنەز تانىتسا دا، ول ساعان دوس بولىپ قالا بەرەدى» دەپ جازدىرتادى. ەكىنشى قاناتىنا «اشۋمەن جاسالعان ءىس جاقسىلىققا اپارمايدى» دەپ جازىپتى.

اۋدارعان شىنار ءابىلدا

“The Qazaq Times”