كورەيادان ورالعان ءجۇز شاقتى قازاقستاندىق كارانتينگە جاتقىزىلدى

كەشە، 6 ناۋرىز سەۋلدەن استاناعا جەتكىزىلگەن قازاقستاننىڭ  93 ازاماتى كارانتينگە جاتقىزىلدى.

دەنساۋلىق ساقتاۋ مينيسترلىگىنىڭ رەسمي وكىلى دياس احمەتشارىپ:.

– 6 ناۋرىزدا سەۋلدەن استاناعا 178 جولاۋشى ۇشىپ كەلدى. ونىڭ 85-ءى – ترانزيت جولاۋشى. ياعني، رەسەيدەن – 31, وزبەكستاننان – 51, گرۋزيادان – ءۇش جولاۋشى. ولار اۋەجايدان شىقپادى، قازاقستان شەكاراسىن كەسىپ وتكەن جوق. كەلەسى رەيستى كۇتىپ وتىر. ەلدەرىنە قايتادى. قازاقستاننىڭ 93 ازاماتى، ەكەۋى بالا، ەلورداداعى كوپسالالى اۋرۋحاناعا 14 كۇنگە كارانتينگە جاتقىزىلدى، – دەپ مالىمدەدى.

بەيسەنبى كۇنى دەنساۋلىق ساقتاۋ ءمينيسترى ەلجان ءبىرتانوۆ بريفينگتە «ەلدە كوروناۆيرۋس كۇدىگىمەن مىڭعا تارتا (ناقتى 992) ادام كارانتينگە جاتقىزىلعانىن», ونىڭ 601-ءى ۇيدە، قالعانى ستاتسيوناردا ەكەنىن حابارلاعان. ولاردىڭ اراسىندا قىتاي ازاماتتارى دا بار.

بىرقاتار الماتىلىق بەلسەندىلەر مەن الەۋمەتتىك جەلى قولدانۋشىلارى قالا اۋرۋحاناسىندا جاتقان «جۇزگە جۋىق» قىتاي ازاماتتارىن دەرەۋ ءوز ەلىنە قايتارۋىن تالاپ ەتىپ كەلەدى.

بۇعان دەيىن وڭتۇستىك كورەيا زاڭسىز جۇرگەن يمميگرانتتارعا ناۋرىزدىڭ سوڭىنا دەيىن ەش كەدەرگىسىز، ايىپپۇلسىز، دەپورتاتسيالاۋسىز جانە قارا تىزىمگە ەنگىزىلمەي ەلدەن كەتۋگە "جاسىل ءدالىز" مۇمكىندىگىن جاريالاعان.

"The Qazaq Times"