دەنساۋلىق ساقتاۋ ءمينيسترى ەلجان ءبىرتانوۆ 5 ناۋرىز كۇنگى بريفينگتە «ەلدە كوروناۆيرۋس كۇدىگىمەن مىڭعا تارتا ادام كارانتينگە جاتقىزىلعانىن»، ونىڭ 601-ءى ۇيدە، قالعانى ستاتسيوناردا ەكەنىن حابارلادى.

«ءبارىن قوسقاندا 992 ادام كارانتيندە جاتىر، وڭاشا ەمدەلىپ جاتقاندار دا بار، ۇيدە كارانتيندە وتىرعاندار دا بار. بىزدە كارانتينگە جىبەرەتىن ورىندار جەتكىلىكتى» دەدى مينيستر.

ونىڭ ايتۋىنشا، بۇعان قوسا 7 515 ادام تۇرعىلىقتى جەرى بويىنشا دارىگەرلەر باقىلاۋىندا.

«دەنساۋلىق ساقتاۋ مينيسترلىگى كوروناۆيرۋس تابىلعان ەلدەردەن كەلگەن شامامەن 8 مىڭ ادامدى باقىلاپ وتىر. بۇل قازاقستان جانە شەتەل ازاماتتارى. اۋرۋ بەلگىلەرى انىقتالعان جاعدايدا اۋرۋحاناعا جاتقىزىلادى. قازىر 60 ادام اۋرۋحاناعا تۇسكەن، 18-ءى اۋرۋحانادان شىعارىلدى. ولار تەكسەرۋ، دياگنوستيكادان ءوتىپ جاتىر» دەدى ءبىرتانوۆ.

ءبىرتانوۆتىڭ ايتۋىنشا، قازاقستاندا ۆيرۋستى انىقتايتىن قاجەتتى جابدىقتار بار. رەسمي دەرەك بويىنشا، قازاقستان اۋماعىندا كوروناۆيرۋس تابىلماعان.

بەيسەنبى كۇنى 8 ناۋرىزدان باستاپ ۆيرۋس جىلدام تاراپ جاتقان قىتاي، يران، وڭتۇستىك كورەيا ازاماتتارىنىڭ قازاقستانعا كىرۋىنە تىيىم سالىناتىنى بەلگىلى بولدى. يندۋستريا جانە ينفراقۇرىلىمدىق دامۋ ۆيتسە-ءمينيسترى بەرىك كاماليەۆتىڭ سوزىنشە، ءۇشىنشى ەل ارقىلى كەلەتىن ا ساناتىنداعى ەلدەردەن، ياعني قىتاي، وڭتۇستىك كورەيا، يران ازاماتتارىنا دا ەلگە كىرۋىنە تىيىم سالىنباق.

"The Qazaq Times"