بۇگىن ساعات 15:00-دە استانا پروكۋراتۋراسىندا قالا پروكۋرورىنىڭ ورىنباسارى ەلدوس توقتاسىنۇلى باستاعان رەسمي توپ تۇرمەدە قازا بولعان قوعام بەلسەندىسى دۋلات اعادىلدىڭ ولىمىنە بايلانىستى ءباسپاسوز بريفينگىن وتكىزدى.  

اعادىلدىڭ ءولىمى تۋرالى اشىپ ايتپاعان قالا پروكۋرورىنىڭ ورىنباسارى ەلدوس كيلىمجانوۆ «الەۋمەتتىك جەلىلەردە تاراعان مايىتەگى جاراقاتتى» اقتاۋ مانىندە مالىمدەمە جاسادى. ول:

– بىردەن ايتايىن مارقۇمنىڭ دەنەسى تۋرالى ۆيدەونى تۋىستارىنىڭ رۇقساتىنسىز تاراتۋ مورالعا، ەتيكالىق نورماعا قايشى. دەنەنى زەرتتەۋدىڭ ناتيجەسى بويىنشا، ەشقانداي زورلىق ارەكەتىنىڭ بەلگىلەرى انىقتالمادى. اعادىلدىڭ ءولىمىنىڭ سەبەبى – جۇرەك قان تامىرىنا وتتەگىنىڭ جەتىسپەۋى. دەنەدەگى داقتار مايىتتە بولاتىن قالىپتى قۇبىلىس. شىندىققا جاناسپايتىن اقپارات تاراتپاۋلارىڭىزدى سۇرايمىن. مارقۇمنىڭ اناسى بىزگە ۆيدەونى ءتۇسىرىپ تاراتقاندارعا شارا قولدانۋدى سۇراپ شاعىندى، – دەدى.

پروكۋرور ورىنباسارىنىڭ سوزىنشە، زەرتحانالىق زەرتتەۋ-ساراپتاۋ جۇمىسىنان كەيىن ءبىر ايدا ناقتى قورىتىندى شىعارىلادى. تەرگەۋ وبەكتيۆتى-وپەراتيۆتى تۇردە ايعاقتاردى فيكساتسيالاۋمەن ءجۇرىپ جاتىر دەسەدى.

بەس سپيكەر قاتىسقان بريفينگتە تەك ەكەۋى عانا قىسقا قايىرا سويلەدى.

301 سەكۋندقا (5,1 مينۋت) «سوزىلعان» ءباسپاسوز جيىنىندا جاۋاپتى ماماندار تىلشىلەردىڭ سۇراقتارىنا جاۋاپ بەرمەي شىعىپ كەتتى. ارتىنان جۇگىرگەن جۋرناليستەردىڭ «سۋديانى تىلدەدى دەگەن سەبەپپەن ءتۇن ىشىندە فورماسىز بارعان ءبىر توپ پوليتسەي ارەكەتىنىڭ زاڭدىلىعى»، «ولاردىڭ كىم ەكەنى» تۋرالى سۇراقتارى جاۋاپسىز قالدى.

Facebook جەلىسىندە «دۋلات اعادىلدىڭ قاماۋدان كەيىنگى احۋالى» دەپ تاراعان ۆيدەودا كۋاگەرلەر ارقا جاۋىرىن تۇسى مەن اياق سانىنىڭ كوگەرىپ-قارايعانى كورىنەدى. الەۋمەتتىك جەلى قولدانۋشىلارى «زاڭ ورگاندارى مەن سوت جۇيەسىنە سەنىم جوعالعاندىقتان ەل شىندىق ءۇشىن ءوز بەتىنشە وسىنداي ارەكەتكە بارۋعا ءماجبۇر بولاتىنىن» ايتادى.

 “The Qazaq Times”