فوتو: https://i.ytimg.com

وشاعى قىتايدان باستالعان كوروناۆيرۋس قاۋىپتى دەرتى الەمدى جايلاپ بارادى. وسىعان بايلانىستى قازاقستان پرەزيدەنتى قاسىم-جومارت توقاەۆ مالىمدەمە جاسادى.

پرەزيدەنت ءوزىنىڭ Twitter پاراقشاسىندا: «كوروناۆيرۋستىڭ بۇكىل الەمگە تارالۋى اسا قاۋىپتى. ۇكىمەتكە ازاماتتاردىڭ دەنساۋلىعىن قورعاۋ ماقساتىندا مەملەكەتتىك مەكەمەلەر مەن شارۋاشىلىق نىسانداردىڭ قىزمەتىنە نۇقسان كەلمەيتىندەي جان-جاقتى شارالار قابىلداۋ تاپسىرىلدى»، – دەپ جازدى.

اتالعان دەرتتى جۇقتىرعاندار سانى الەم بويىنشا ارتا تۇسكەن. فرانتسيادا ناۋقاستار سانى 38-گە جەتسە، يتاليادا ءبىر تاۋلىكتە اۋرۋ جۇقتىرعاندار سانى 323-تەن 453-كە دەيىن كوبەيگەن. 12 ادام كوز جۇمعان. ۇلىبريتانيادا ساقتىق شارالارى ماقساتىندا 6 مەكتەپ كارانتينگە جابىلدى. وڭتۇستىك كورەيادا ناۋقاستار سانى 1700-دەن اسادى. 13 ادام كوز جۇمعان. وسى رەتتە وڭتۇستىك كورەيا مەن اقش ساربازدارىنىڭ ورتاق وقۋ-جاتتىعۋلارى كەيىنگە شەگەرىلدى. ويتكەنى وڭتۇستىك كورەيا اسكەرىندە ۆيرۋستى جۇقتىرۋدىڭ 21 دەرەگى تىركەلگەن. تاعى 9500 سارباز كارانتيندە. ىندەتتى جۇقتىرۋدىڭ جاڭا دەرەكتەرى دانيا، نورۆەگيا، گرەكيا، رۋمىنيا، شۆەتسيا، ەستونيا، پولشا مەن گرۋزيادا انىقتالعان. جاقىندا اقش-تىڭ كاليفورنيا شتاتىندا كوروناۆيرۋس جۇقتىرعان العاشقى ادام تىركەلدى. ءدال وسى جەردەگى اسكەري بازاعا ونداعان ادام كارانتينگە ورنالاسقان.

سوڭعى تىڭ مالىمەت بويىنشا، بەلارۋس دەنساۋلىق ساقتاۋ مينيسترلىگى كوروناۆيرۋستىق ينفەكتسيانىڭ العاشقى جاعدايى انىقتالعانى تۋرالى حابارلادى. 22 اقپاندا باكۋدەن ۇشىپ كەلگەن يراندىق ستۋدەنتتەن تابىلعان. ناۋقاس جانە ونىمەن بايلانىستا بولعان ادامدار مينسك جۇقپالى اۋرۋحاناسىندا جابىق قوراپتارعا جاتقىزىلدى. سونداي-اق ليتۆادا كوروناۆيرۋستىق ينفەكتسيانىڭ العاشقى جاعدايى راستالدى. ناۋقاس اۋرۋحاناعا وقشاۋلاندىرىلدى. ول ۆيرۋستى يتاليانىڭ ۆەرونا قالاسىندا جۇقتىرعان.

كوۆيد-19 ۆيرۋسىنىڭ تاراۋى سەبەپتى كوپتەگەن حالىقارالىق شارالار كەيىنگە شەگەرىلۋى مۇمكىن. ماسەلەن، يتاليانىڭ ىشكى بىرىنشىلىگى – ا سەرياسىنىڭ 26 كەزەڭىنىڭ بارلىق ويىندارى كورەرمەندەرسىز وتەتىن بولدى. سوڭعى ۋاقىتتا 2020 جىلعى ەۋروپا چەمپيوناتى وتپەي قالۋى مۇمكىن دەگەن بولجامدار ايتىلىپ جاتىر. ۋەفا وكىلدەرى ويىنداردى قابىلدايتىن ەلدەردىڭ نۇسقاۋلارىنا ساي ارەكەت ەتەمىز دەگەندى ايتادى. 12 ناۋرىزدا گرەكيانىڭ وليمپيا قالاسىندا باستالىپ، 26 ناۋرىزدا جاپونيا اۋماعىندا اياقتالۋ جوسپارلانعان وليمپيادا جوسپارىنا دا وزگەرىستەر ەنگىزىلۋى مۇمكىن.

"The Qazaq Times"