اباي مۇراسى قازاق مادەنيەتىن الىس-جاقىن شەتەلگە تانىتقان التىن كوپىر ىسپەتتى. ادامزاتتىڭ اقىلمانىنا اينالعان ابايدىڭ 175 جىلدىق مەرەيتويى ەۋروپا ەلدەرىندە دە اتالىپ ءوتتى. اقىن شىعارمالارىن كەڭىنەن ناسيحاتتاۋ ماقساتىندا پولشاداعى ادام ميتسكەۆيچ اتىنداعى وقۋ ورنىنا اباي ءبيۋستى تابىستالدى.

ءال-فارابي اتىنداعى قازاق ۇلتتىق ۋنيەرسيتەتىنىڭ ۇستازدارى مەن ستۋدەنتتەرى مۇرىندىق بولعان شارادا ساياسي عىلىمدار جانە جۋرنا­ليس­تيكا فاكۋلتەتىنىڭ كىتاپ­حا­نا­سىنا فارابي ورتالىعى باسپادان شىعارعان تۋىندىلار، ءال-فارابي بەينەسى سالىن­عان كىلەمشە، شىعىس تىلدەرى فاكۋل­تەتى­نىڭ ۇجىمىنا اباي قۇنان­بايۇلىنىڭ ءبيۋستى تابىس ەتىلدى. جيىن كەزىندە وقۋ ورنىنىڭ پرورەكتورى، پروفەسسور تادەۋش مىرزا: «ابايدىڭ ومىرشەڭ پوەزياسىنىڭ ورنى بولەك. ونىڭ ادەبي تۋىندىلارىنىڭ استارىنا ءۇڭىلىپ قاراساڭىز ۇلكەن ماعىنا جاتىر. ونىڭ پالساپالىق وسيەتتەرى مەن شىعارمالارى ۋاقىتپەن ۇندەس»،– دەدى.

اباي تويىنىڭ پوزنان قالاسىنداعى ميتسكەۆيچ وقۋ ورنىندا اتالىپ ءوتۋى بەكەردەن بولماسا كەرەك-ءتى. پولياك اقىنى ادام ميتسكەۆيچتىڭ ولەڭدەرىن شىعىس اقىندارىنان ءبىرىنشى بولىپ اۋدارعان دا اباي بولاتىن. جالىندى پاتريوت، دەموكرات، رەۆوليۋتسيونەر، حالىقتار ىنتىماعى مەن دوستىعىنىڭ جارشىسى بولعان ميتسكەۆيچتىڭ ادەبي ءمۇراسىن پروگرەسشىل ادامزات قادىر ءتۇتادى. اقىننىڭ گۋمانيستىك، حالىققا دەگەن سۇيىسپەنشىلىك رۋحى اباي قۇنانباەۆ ارقىلى قازاق دالاسىنا سوناۋ وتكەن عاسىردا-اق جەتكەن.

ميتسكەۆيچ پەن پۋشكيننىڭ ايىرىلماس دوستىعى، پۋشكيننىڭ پولياك دوسىنا ارناپ («ول ءبىزدىڭ ارامىزدا»، «فونتاندار سالقىن سامالىندا») جازعان ولەڭدەرى مەن بىرنەشە رومانتيكالىق پوەمالارىن اۋداردى، بۇعان قازاق اقىنىنىڭ دا ىقىلاسى اۋى، ءدال سول كەزدە ميناەۆ اۋدارعان، ن.پ. پولەۆوي رەداكتسيالاعان ميتسكەۆيچ شىعارماسىنىڭ ەكى تومدىعى 1882 جىلى سانكت-پەتەربۋرگتە باسىلىپ شىعۋى ابايعا كوپ كومەگىن تيگىزسە كەرەك. مىسالى، ميتسكەۆيچتەن اباي اۋدارعان «س.ب. البومىنا» ولەڭدەرى: «دۇرىلدەگەن ناجاعاي»، «بۇرقىراعان جاۋىن»، «باعى قايتقان قاۋىم» تەرىزدى بەينەلى سوزدەرى ارقىلى ولەڭگە قوعامدىق-ساياسي رەڭ بەرەدى. وسىلايشا قازاقتاردى باتىس ەۋروپا ادەبيەتىنىڭ كەيبىر ۇلگىلەرىمەن تانىستىرۋدا، ول شىعارمانىڭ ەل اراسىنا اۋىزشا ەڭگىمە تۇرىندە كەڭ تاراۋىندا ا.قۇنانباەۆ ۇلكەن ءرول اتقارعان.

"The Qazaq Times"