اعادىلوۆ قازاسى: الماتى بەلسەندىلەرى پرەزيدەنت اتىنا تالاپ ارىز جازدى

دۋلات اعادىلوۆتىڭ قازاسىنا بايلانىستى جينالعان الماتى ازاماتتارى پرەزيدەنت پەن مينيستر، پروكۋروردىڭ اتىنا تالاپ ارىز جازدى.

الماتىداعى تسەليننىي كينوتەاترىنىڭ ماڭىنا جينالعان 50-60 شاقتى بەلسەندى پرەزيدەنت قاسىم-جومارت توقاەۆ، قالا پروكۋرورى باۋىرجان جۇرەكباەۆ مەن ىشكى ىستەر ءمينيسترى ەرلان تۇرعىمباەۆتىڭ اتىنا ارىز جازىپ وتكىزدى. تالاپ ارىز جازۋشىلار جاۋاپتى ۆەدومستۆونىڭ  باق ارقىلى رەسمي تۇردە جاۋاپ بەرۋىن سۇرايدى. نارازىلار اينالاسىندا پوليتسەيلەر توراۋىلداپ تۇر.

الماتى قالالىق پوليتسيا دەپارتامەنتىنىڭ ماڭىنا جينالعاندار «تەرگەۋدىڭ ءادىل ءارى ءمولدىر جۇرگىزىلۋىن» تالاپ ەتىپ، ازاماتتىق پىكىرىنە بولا «قۋعىنداماۋدى» سۇرادى. سونداي-اق «ازاماتتىق بەلسەندىلەردى زاڭسىز قۋدالاۋدى دوعارىپ، ساياسي تۇتقىندار مەن بيىلعى ميتينگتە قامالعانداردى دەرەۋ بوساتۋى كەرەك» دەپ سانايدى.

بەلسەندىلەر «بوستاندىق!»، «ويان، قازاق، كوتەر باستى!» دەپ ۇرانداستى. سونىمەن قاتار ولار ءىس بارىسىن الداعى ۋاقىتتا تۇراقتى ءارى تاباندى تۇردە باقىلايتىنىن، دۋلات اعادىلوۆتى ەسكە الۋ جيىنىن ۇيىمداستىراتىنىن ايتىپ تارقاستى.

مارقۇم اعادىلوۆتى بۇرىن سوڭدى «جۇرەك تالماسىمەن» اۋىرماعانىن ايتقان بەلسەندىلەر بۇگىن تۇستە استانادا، الماتى جانە شىمكەنت قالاسىندا نارازىلىققا شىقتى. ەلوردادا ەلۋگە جۋىق بەلسەندىنى پوليتسيا دەپارتامەنتى باستىعىنىڭ ءبىرىنشى ورىنباسارى باقىتجان مالىباەۆ باستاعان جاساق ءتورت اۆتوبۋسقا  كۇشپەن تيەپ الىپ كەتكەن ەدى.

پروتوكول تولتىرماعان، كۋاگەر تارتىلماعان، ادۆوكات شاقىرتپاي كۇشتەپ ۇستاپ اكەتتى دەيدى اشىنعان ازاماتتىق بەلسەندىلەر. ايماقتاعى نارازىلار «نۇرسۇلتان جانە  داريعا نازارباەۆتاردىڭ، ەرلان تۇرعىمباەۆتىڭ وتستاۆكاسىن»، «اعادىلوۆتىڭ ءولىمىن ءادىل تەكسەرسىن» دەگەن تالاپتار قويدى. قۇرال سەيىتحانۇلى «بيلىك مارقۇم ءوز اۋرۋىنان نەمەسە سپيرتتىك ىشىمدىك ءىشىپ ءولدى دەگەن جالعان جەلەۋمەن اقتالۋعا تىرىسادى» دەپ ويلايدى. بەلسەندىنىڭ ءبىرى  «حالىقتىق رەپرەسسياعا قاتىسقان، اتسالىسقان مينيستردەن قاتارداعى ساربازعا دەيىن جازالاناتىنى حالىقارالىق قۇقىقتىق قاتىناس قۇجاتتارىندا قاراستىرىلعان» دەيدى. جينالعاندار اعادىلوۆتى ءوزىنىڭ التى بالاسىنا بارىنا قاراماستان، «تاپقان تيىن-تەبەنىن كوپبالالى ءارى الەۋمەتتىك ءحالى مۇشكىل وتباسىلارعا ءبولىپ بەرەتىنىن»، ونىڭ «كەڭ جۇرەكتى، مەيىربان» ادام بولعانىن كوزىنە جاس الىپ ايتتى.

اعادىلوۆتىڭ قازاسىنا قايعىرعان الماتى قالاسىنىڭ بەلسەندىلەرى پرەزيدەنت اتىنا تالاپ ارىز جولدادى. 25 اقپان 2020 جىل. فوتو: QT

پوليتسيا دەپارتامەنتى ءباسپاسوز قىزمەتىنىڭ جازۋىنشا «بيىل قاڭتار ايىندا دۋلات اعادىلگە ايىپ تاعىلىپ، «ەشقايدا كەتپەۋ» تۋرالى شارا قولدانىلعان. تەرگەۋگە كەلمەگەنىنە بايلانىستى سوت شەشىمىمەن 24 اقپاندا قاماۋعا الىنعان».

قۇزىرلى ورگاندار بۇگىن كەشكىسىن وتكەن بريفينگتە ازاماتتىق قۇقىق پەن دەموكراتيالىق قۇندىلىقتاردىڭ ورىندالۋىن تالاپ ەتە ءجۇرىپ بىرنەشە رەت سوتتالعان بەلسەندى اعادىلوۆ ءولىمىنىڭ سەبەبىن «جۇرەك قان تامىرلارىنىڭ جەتىسپەۋشىلىگى» دەپ اتادى.

اعادىلوۆتىڭ ولىمىنە بايلانىستى الماتى قالاسىندا وتكەن نارازىلىق. 25 اقپان 2020 جىل. فوتو: QT

"The Qazaq Times"