كەشە تۇندەلەتىپ پوليتسيا فورماسىنسىز كەلگەن ءبىر توپ ۇيىنەن كۇشتەپ اكەتىپ، بۇگىن تاڭدا تەرگەۋ يزولياتورىندا كوز جۇمعان دۋلات اعادىلوۆتىڭ قازاسىنا بايلانىستى الماتىلىقتار  جينالىپ، قۋدالاۋ مەن سۇرگىنگە قارسى نارازىلىق ءبىلدىرىپ جاتىر. 

الماتى قالالىق پوليتسيا دەپارتامەنتىنىڭ ماڭىنا جينالعان 30-عا تارتا بەلسەندىلەر «نۇرسۇلتان نازارباەۆ پەن داريعا نازارباەۆانىڭ وتستاۆكاسىن» تالاپ ەتىپ، ازاماتتىق پىكىرىنە بولا «قۋعىنداماۋدى» سۇرادى.

مارقۇم اعادىلوۆتى بۇرىن سوڭدى «جۇرەك تالماسىمەن» اۋىرماعانىن ايتقان بەلسەندىلەر بۇگىن تۇستە استانادا، الماتى جانە شىمكەنت قالاسىندا نارازىلىققا شىقتى. ەلوردادا ەلۋگە جۋىق بەلسەندىنى پوليتسيا دەپارتامەنتى باستىعىنىڭ ءبىرىنشى ورىنباسارى باقىتجان مالىباەۆ باستاعان جاساق ءتورت اۆتوبۋسقا  كۇشپەن تيەپ الىپ كەتكەن ەدى.

پروتوكول تولتىرماعان، كۋاگەر تارتىلماعان، ادۆوكات شاقىرتپاي كۇشتەپ ۇستاپ اكەتتى دەيدى اشىنعان ازاماتتىق بەلسەندىلەر. ايماقتاعى نارازىلار «نۇرسۇلتان جانە  داريعا نازارباەۆتاردىڭ، ەرلان تۇرعىمباەۆتىڭ وتستاۆكاسىن»، «اعادىلوۆتىڭ ءولىمىن ءادىل تەكسەرسىن» دەگەن تالاپتار قويدى. قۇرال سەيىتحانۇلى مارقۇم «ءوز اۋرۋىنان نەمەسە سپيرتتىك ىشىمدىك ءىشىپ ءولدى دەگەن جالعان جەلەۋمەن» اقتالۋعا تىرىسادى دەپ سانايدى. بەلسەندىنىڭ ءبىرى  «حالىقتىق رەپرەسسياعا قاتىسقان، اتسالىسقان مينيستردەن قاتارداعى ساربازعا دەيىن جازالاناتىنى حالىقارالىق قۇقىقتىق قاتىناس قۇجاتتارىندا قاراستىرىلعان» دەيدى.

پوليتسيا دەپارتامەنتى ءباسپاسوز قىزمەتىنىڭ جازۋىنشا «بيىل قاڭتار ايىندا دۋلات اعادىلگە ايىپ تاعىلىپ، «ەشقايدا كەتپەۋ» تۋرالى شارا قولدانىلعان. تەرگەۋگە كەلمەگەنىنە بايلانىستى سوت شەشىمىمەن 24 اقپاندا قاماۋعا الىنعان».

دۋلات اعادىل – الەۋمەتتىك پروبلەمالار جانە ازاماتتىق قۇقىقتى ساقتاۋ ماسەلەسىن كوتەرىپ جۇرگەن بەلسەندى. بيىل تامىز ايىنان بەرى بىرنەشە اكىمشىلىك جازاعا تارتىلىپ، كەم دەگەندە 60 تاۋلىك قاماۋدا وتىرعان.

ول 2019 جىلدىڭ 16 جەلتوقسانىندا رۇقسات ەتىلمەگەن اكتسياعا قاتىستى دەپ ايىپتالىپ، 10 تاۋلىككە قامالعان ەدى. قاراشانىڭ ورتاسىندا اكىمشىلىك قاماۋدا وتىرعان تسەلينوگراد اۋداندىق تەرگەۋ يزولياتورىنان قاشىپ شىعىپ، ول ارەكەتىن «زاڭسىز قۋدالاۋعا قارسىلىعىم» دەپ تۇسىندىرگەن. پوليتسيا ەكى كۇن بويى ىزدەگەن بەلسەندى 15 قاراشادا ءوزى باس پروكۋراتۋرا الدىنا كەلگەن. كەيىن ول «سوت قاۋلىسىن ورىنداماعانى ءۇشىن» تاعى 6 تاۋلىككە سوتتالعان.

"The Qazaq Times"