كورەيا رەسپۋبليكاسىنىڭ بۇرىنعى پرەزيدەنتى لي ميون باك 17 جىلعا باس بوستاندىعىنان ايىرىلدى. بۇل تۋرالى Yonhap اگەنتتىگى حابارلادى.

سەۋلدىڭ جوعارعى سوتى ەكس-پرەزيدەنتتى 2008-2013 جىلدارى اسا ءىرى كولەمدە پارا العانى جانە بيۋدجەت قارجىسىن جىمقىرعانى ءۇشىن كىنالى دەپ تاپتى. سونىمەن قاتار، 78 جاستاعى لي ميون باك $15,7 ملن كولەمىندە ايىپپۇل تولەۋى ءتيىس.

پروكۋراتۋرا بۇرىنعى مەملەكەت باسشىسىن اۆتوموبيل بولشەكتەرىن شىعاراتىن DAS كومپانياسىنىڭ قارجىسىن قالتاسىنا باستى جانە پرەزيدەنت بولىپ تۇرعاندا Samsung Electronics-تەن پارا الدى دەگەن كۇدىككە ىلىنگەن. اتالعان كومپانيانىڭ اكتسيونەرى بولعان لي ميون باك بۇعان دەيىن دە جەمقورلىققا بايلانىستى تەمىر تورعا جابىلعان.

2018 جىلدىڭ  22 ناۋرىزىندا تۇتقىنعا الىنىپ، 5 قازاندا سەۋلدىڭ جوعارعى سوتى ونى 15 جىلعا تۇرمەگە قاماۋ تۋرالى ۇكىم شىعارعانىمەن، 2019 جىلدىڭ ناۋرىزىندا دەنساۋلىعىنا بايلانىستى اباقتىدان بوساتىلعان.

ەسكە سالا كەتەيىك، 2017 جىلى وڭتۇستىك كورەيانىڭ تاعى ءبىر ەكس-پرەزيدەنتى پاك كىن حە بيلىكتى تەرىس ماقساتتا پايدالاندى جانە كومپانيالاردان قارجى جىمقىردى دەگەن ايىپپەن 24 جىلعا باس بوستاندىعىنان ايىرىلعان بولاتىن.

"The Qazaq Times"