كورەيا رەسپۋبليكاسىنىڭ ۇلتتىق قورعانىس ءمينيسترى چون گەن دۋ 23 اقپاندا اقش-قا رەسمي ىسساپارمەن بارىپ، امەريكانلىق ارىپتەسى مارك ەسپەرمەن كورەي تۇبەگىندەگى احۋالدى تالقىلاماق. بۇل تۋرالى سەۋلدە وتكەن بريفينگتە وڭتۇستىك كورەيا قورعانىس ۆەدومستۆوسىنىڭ رەسمي وكىلى ءمالىم ەتتى.

مالىمدەمەدە: «جوسپارلانعان كەزدەسۋ بارىسىندا ەكىجاقتى اسكەري بايلانىستارعا قاتىستى ماڭىزدى ماسەلەلەر، ونىڭ ىشىندە وڭتۇستىك كورەياداعى اقش اسكەرلەرىن ۇستاۋعا جۇمسالاتىن شىعىنداردى ءبولۋ تاقىرىبى دا تالقىلانادى»، – دەلىنگەن.

سونداي-اق، قورعانىس مينيسترلىگىنىڭ وكىلى چون گەن دۋ 1950-1953 جىلدارداعى كورەي سوعىسىنا قاتىسقان امەريكالىق ارداگەرلەرمەن كەزدەسىپ، كونگرەسسمەندەرمەن كەلىسسوزدەر جۇرگىزەدى جانە تەڭىز جاياۋ اسكەرلەرىن دايىندايتىن كاليفورنياداعى اسكەري بازاعا بارادى.

قاڭتاردا كورەي تۇبەگىندە امەريكالىق اسكەري كونتينگەنتكە بولىنەتىن قارجى ماسەلەسىن رەتتەۋ ماقساتىندا وتكەن التىنشى كەلىسسوز ناتيجەسىز اياقتالدى. الدىڭعى كەلىسىمنىڭ مەرزىمى 2019 جىلى 31 جەلتوقساندا اياقتالدى.

2018 جىلدان باستاپ ۋاشينگتون سەۋلدەن كورەيا رەسپۋبليكاسىنداعى اقش كونتينگەنتىن ۇستاۋعا ارنالعان جارنالاردىڭ ۇلەسىن ارتتىرۋدى تالاپ ەتىپ كەلەدڭ. 2019 جىلى وڭتۇستىك كورەيالىق بىرلەسكەن قورعانىس شىعىندارى 8,2%-عا ياعني 1,04 ترلن ۆونعا (915 ملن دوللار) دەيىن ارتتى. 2019 جىلدىڭ قاراشاسىندا ۋاشينگتون سەۋلدەن جارنالاردى بەس ەسەگە ($ 4,7 ملرد-قا) دەيىن ارتتىرۋدى تالاپ ەتكەن.

اقش اسكەرلەرى وڭتۇستىك كورەيادا 1950-1953 جىلدارى بولعان. ەكى ەل اراسىنداعى كەلىسىمگە 1950 جىلى 26 قاڭتاردا قول قويىلعان.

قۇراما شتات پەن وڭتۇستىك كورەيا بىرلەسكەن اسكەري جاتتىعۋلاردى جىلىنا ەكى رەت كورەي تۇبەگىندە وتكىزىپ كەلگەن. تۇبەكتە شيەلەنىستەردىڭ ارتۋىنا بايلانىستى، پحەنيان تاراپى بىرنەشە رەت نارازىلىق بىلدىرگەن بولاتىن. سەبەبى، كورەي تۇبەگىندە اسكەري جاتتىعۋ وتكىزەتىن ەلدەر اراسىندا كەلىسپەۋشىلىكتەر ءجيى ورىن العاندىقتان، قوس كورەيا سوعىس رەجيمىنە ءوتۋى مۇمكىن دەگەن كۇدىك ۇيالادى. بىراق، وڭتۇستىك كورەيا پرەزيدەنتى ءمۇن جا-ين جەرگىلىكتى ارنالارعا سۇحبات بەرىپ: «وڭتۇستىك كورەيانىڭ ءبىر نيەت، ءبىر تىلەكتە كۇش جۇمىلدىرۋ ۇستانىمى، كورەي تۇبەگى داعدارىسىنىڭ سوعىسقا ۇلاسپاۋىنىڭ نەگىزگى كەپىلى. ءبىز سوعىس تۋدىرماۋعا تىرىسامىز. ەگەر تاعى ءبىر مارتە سوعىس تۋاتىن بولسا بارلىعى كۇلگە اينالادى. كورەي تۇبەگىنىڭ اسكەري ءىس-قيمىلىنا تەك وڭتۇستىك كورەيا شەشىم قابىلداي الادى. ەگەر وڭتۇستىك كورەيا كەلىسپەسە، باسقا ەشبىر تاراپ كورەي تۇبەگىندە سوعىس باستامايدى»، – دەپ كەسىمدى جاۋاپ قايتارعان.

بۇگىنگى كۇنگە دەيىن ايماقتاعى ەلدەر عانا ەمەس، الەم ەلدەرى دە كورەي تۇبەگىندە تۋى مۇمكىن يادرولىق سوعىسقا الاڭداپ كەلگەن بولاتىن. دەگەنمەن، قازىرگى ءار تاراپتىڭ قادامدارى بۇل قاۋىپتىڭ اۋىلىن ءبىرشاما الىستاتتى. وڭتۇستىك كورەيا باسشىسى كورەيلەردىڭ تاعدىرىنا قاۋىپ تۋدىراتىن قادامعا بارمايتىنىن اتاپ ءوتتى.

"The Qazaq Times"