كورنەكى سۋرەت. فوتو: ەuronews

وشاعى قىتايدان باستالىپ الەمگە تاراعان قاتەرلى كوروناۆيرۋس ىندەتىنەن 1775 كىسى كوز جۇمىپ، 71,3 مىڭ ادام جۇقتىرعان.

بۇگىن، دۇيسەنبى قحر-ءدىڭ گيگيەنا جانە دەنساۋلىق ساقتاۋ مەملەكەتتىك كوميتەتىنىڭ حابارلاۋىنشا، 10,8 مىڭ ادام  اۋرۋدان ايىققان كورىنەدى.

بۇعان دەيىن كۇنى كەشە، 16 اقپان، جەكسەنبى كۇنى ۆەدومستۆو 68,50 مىڭ ادام ينفەكتسيا جۇقتىرىپ، 1665 ناۋقاس ۆيرۋستان قايتىس بولعانىن حابارلاعان ەدى.

ەل اۋماعىندا ەڭ كوپ زارداپ شەككەن حۋبەي پروۆينتسياسىندا 58,1 مىڭ ادامعا دەرت جابىسسا، ونىڭ 1696 قازا تاۋىپ، 6639-ى ساۋىققان دەسەدى. ال وڭتۇستىك ايماقتاعى گۋاندۋندا 1,3 مىڭنان استام، ورتالىقتاعى حەناندا 1,2 مىڭ جانە شىعىستاعى چجەتسحياندا 1,1 مىڭ ناۋقاس تىركەلىپتى.

جەكسەنبى كۇنگى جاعداي بويىنشا، بەيجىڭدە 381 ناۋقاستىڭ ۆيرۋس جۇقتىرعانى انىقتالىپ، ونىڭ 114-ءى اۋرۋحانادان شىعارىلعان. سونىمەن قاتار ءتورت ازاماتتىڭ دەرتى دەندەپ كەتكەندىكتەن، اق حالاتتىلار اجالدان اراشالاي الماپتى.

سوڭعى رەسمي دەرەككە قاراعاندا، قىتايدا اۋرۋ جۇقتىرۋشىلارمەن قاتىناستا بولعان 150,5 مىڭ ادام دارىگەرلەردىڭ قاتاڭ باقىلاۋىنا الىنعان. تاعى 7,2 مىڭ ادام كوروناۆيرۋس كۇدىگىمەن كارانتينگە جاتقىزىلدى. مەديتسينا ماماندارىنىڭ باعالاۋىنشا، ەلدە 10,6 مىڭ ناۋقاستىڭ جاعدايى تىم اۋىر ەكەن.

"The Qazaq Times"