فوتو: newsroom.kz

جاقىندا رەسەي ۇكىمەتى وتستاۆكاعا كەتتى، كوپ ۇزاماي كورشى وزبەك ەلىندە دە وسىنداي جاعداي ورىن الدى. ونىڭ الدىندا ۋكراينا ۇكىمەتى دە وتستاۆكاعا كەتكەن بولاتىن. بۇل قۇبىلىس بىزگە دە كەلە جاتقان سىڭايلى. ويتكەنى سوڭعى جىلدارى ۇكىمەتتىڭ كەڭەيتىلگەن ورىسى الدىندا وتستاۆكا جايلى الىپ-قاشپا اڭگىمەلەر بىزدە دە تاراي باستادى. مەملەكەت باسشىسى مەرزىمىنەن بۇرىن سايلاۋ وتپەيدى دەپ قاداپ ايتقانىمەن ۇكىمەت وتستاۆكاعا كەتەدى دەگەن اڭگىمە تاراۋىن قويماي جاتىر.
ەلىمىزدە «قازاقستان – 2050» ستراتەگياسى، 5 رەفورما، يندۋستريالىق-يننوۆاتسيالىق دامۋدىڭ مەملەكەتتىك باعدارلاماسى سىندى كوپتەگەن جوسپارلى باعدارلامالار بار. ولاردى ورىنداۋ ءۇشىن تالاپشىل ءارى ايتقانىن ىستەتە الاتىن ادام كەرەك.
2019 جىلى يندۋستريالىق-يننوۆاتسيالىق دامۋدىڭ مەملەكەتتىك باعدارلاماسىنىڭ ەكىنشى بەسجىلدىعى اياقتالدى. TENGENOMIKA تەلەگرام-كانالىنىڭ جازۋىنشا، بۇل باعدارلاما بويىنشا كوزدەلگەن 4 ماقساتتى ينديكاتوردىڭ تەك 2-نە عانا قول جەتكىزىلگەن. 2015-2019 جىلدار ارالىعىندا وڭدەۋ كاسىپورىندارىنىڭ ەكسپورتى تەك 8,2% عانا وسكەن، نەگىزگى مەجە 19% بولۋ كەرەك ەدى. ال ەڭبەك ونىمدىلىگى 4,2% قۇراعان، جوسپار بويىنشا ول 22% كەرەك ەدى. قاراپ وتىرساق بۇل باعدارلامانىڭ ناتيجەسى كوڭىل كونشىتەرلىك ەمەس. بۇگىنگى پرەمەر مينيستر اسقار مامين ۇكىمەت باسىنا كەيىن كەلگەنىن ەسكەرسەك ول اياقتالىپ جاتقان يدمب-2 باعدارلاماسىنىڭ ءتيىمدى جۇمىس ىستەۋىنە مۇمكىنشىلىگى دە بولماعانىن اڭعارامىز. ونىمەن اسىرەسە ەكس-پرەمەر مينيستر باقىتجان ساعىنتاەۆ پەن ونىڭ مينيسترلەرى اينالىسقان.
جاقىندا قازىرگى مينيسترلەر كابينەتىمەن 2020-2025 جىلدارعا رنالعان يدمب-3 باعدارلاماسى قابىلداندى. بۇل باعدارلامانىڭ الدىڭعى يندۋستريالىق باعدارلاما نۇسقالارىنا قاراعاندا ماقساتى دا، قۇرالدارى دا وزگەشە. مىنە، وسى باعدارلامانى ىسكە اسىرۋ ناتيجەسى قازىرگى ۇكىمەتتىڭ قانشالىقتى ءتيىمدى جۇمىس ىستەگەنىن ايقىنداپ بەرەتىن بولادى. الايدا ول ءۇشىن اسقار مامين باسقاراتىن ۇكىمەتتىڭ جوق دەگەندە ءالى 2-3 جىل مەرزىمدە جۇمىس ىستەۋىن تالاپ ەتەدى.
مۇنداي ۇلكەن باعدارلامالاردىڭ تىڭعىلىقتى ىسكە اسىرىلۋى ءۇشىن تەمىر ءتارتىپ ورناتا الاتىن ءارى تالاپشىل ۇكىمەت باسشىسى كەرەك. سوندىقتان ءدال قازىر قر ۇكىمەتىنىڭ وتستاۆكاعا كەتۋى ناقتى ءبىر ءىستى اياقتاماي، جارتى جولدان كەتۋمەن تەڭ. ول ەلىمىزدىڭ ەكونوميكالىق دامۋى جانە تاعى باسقا كورسەتكىشتەرگە كەرى اسەرىن تيگىزەتىنى انىق. سوندىقتان كورشى ەلدەردە بولىپ جاتقان قۇبىلىسقا تاڭىرقاي بەرمەي، العا نىق قادام باسىپ، قازىرگى ۇكىمەتتىڭ الاڭسىز جۇمىس ىستەۋىنە جاعداي جاساعىنىمىز ورىندى بولادى.

"The Qazaq Times"