قىتاي مەملەكەتتىك تەلەارنالارى ەلدەگى تاراپ جاتقان ىندەتتىڭ اۋىر كۇيدە ەكەنىن مالىمدەدى. كەشە قىتاي مەملەكەتتىك ارنالارى جەرگىلىكتى اكىمشىلىكتىڭ مالىمەتىنە سىلتەمە جاساي وتىرىپ، حۋبەي پروۆينتسياسىندا ۆيرۋسقا شالدىققان 17 ادامنىڭ كوز جۇمعانىن حابارلادى. بۇدان بىرنەشە ساعات بۇرىن عانا ۆيرۋستان 6 ادام قازا تاپقانىن حابارلاعان ەدى.

قىتاي بيلىگى قاۋىپتى ۆيرۋستىڭ ەڭ العاش تارالعان جەرى ۋحان قالاسىندا قوعامدىق ترانسپورتتى ۋاقىتشا توقتاتا تۇرۋ شەشىمى قابىلدادى. اۆتوبۋستار مەن مەترو جانە وزگە دە قوعامدىق كولىكتەر كەشە ساعات 10-نان باستاپ جۇمىسىن توقتاتتى. سونداي-اق، ۋحان قالاسىنىڭ تۇرعىندارى ءۇشىن پويىز ۆاگزالدارى مەن اۋەجايلار جابىلدى.

ۋحان قالاسى قىتايدىڭ بەيجىڭ، شاڭحاي، شىنجىن قالالارى سىندى تانىمال بولماعانىمەن، ول الەمنىڭ بىرقاتار ءىرى قالالارىمەن تىكەلەي اۋە لينيالارىنا يە. ايتالىق، ۋحاننان لوندون، پاريج، دۋباي تاعى باسقا دا قالالارمەن تىكەلەي اۋە قاتىناسى بار. بۇل قۋىپتى ۆيرۋستىڭ الەمگە تارالىپ كەتۋ قاۋپىن كۇشەيتەدى.

الەۋمەتتىك جەلىدە قىتاي بيلىگى ناقتى جاعدايدى جاسىرىپ وتىر دەگەن جازبالار دا كوبەيگەن. الەۋمەتتىك جەلى قولدانۋشىلارى شىنايى جاعدايدىڭ ۇكىمەت تاراتقان رەسمي مالىمەتتەردەن الدە قايدا اۋىر دەپ الاڭدايدى.

“The Qazaq Times”