بريۋسسەلدە وتكەن قازاقستان – ەۋرووداق ىنتىماقتاستىق كەڭەسىنىڭ 17-وتىرىسىندا تاراپتار كەڭەيتىلگەن سەرىكتەستىك جانە ىنتىماقتاستىق تۋرالى كەلىسىمدى راتيفيكاتسيالادى.

اتالعان كەلىسىم حالىقارالىق جانە ايماقتىق قاۋىپسىزدىك، ساۋدا مەن ينۆەستيتسيالار، ينفراقۇرىلىم مەن يننوۆاتسيالار، مادەني جانە گۋمانيتارلىق بايلانىستاردى دامىتۋعا باعىتتالعان. باسقوسۋ بارىسىندا الەمدەگى جاعداي، ورتالىق ازيا بويىنشا ەۋرووداقتىڭ جاڭا ستراتەگياسىن جۇزەگە اسىرۋ جانە پرەزيدەنت قاسىم-جومارت توقاەۆتىڭ بريۋسسەلگە رەسمي ساپارى تالقىلاندى.

قازاقستان سىرتقى ىستەر ءمينيسترى مۇحتار تىلەۋبەردى: «كەلىسىم تەز ارادا كۇشىنە ەنەدى دەپ ويلايمىز. ناقتى ايتقاندا، 1 ناۋرىزدا دەگەن ءۇمىتىم بار. ونى جۇزەگە اسىرۋ تابىستى ءارى ءوزارا ءتيىمدى ىنتىماقتاستىعىمىزدى دامىتۋعا كوپ مۇمكىندىكتەردى اشپاق. ەڭ الدىمەن، ول سەرىكتەستىگىمىزدىڭ جاڭا باسىمدىقتارى مەن سالالارىن بەلگىلەيدى. ىنىتىماقتاستىق بويىنشا كەڭەس ماجىلىستەرى بۇل كەلىسىمدى ىسكە اسىرۋعا شوعىرلانادى. ول ىنتىماقتاستىعىمىزدىڭ بارلىق سالالارىن: ساياسي، الەۋمەتتىك، ەكونوميكالىق جانە مادەني تۇستارىن قامتىعان»، – دەدى.

ەۋروپالىق وداق – قازاقستاننىڭ ەڭ ءىرى ينۆەستيتسيالىق سەرىكتەسىنىڭ ءبىرى. قازاقستان ورتالىق ازيا ەلدەرىنىڭ ىشىندە ەو-مەن كەڭەيتىلگەن سەرىكتەستىك جانە ىنتىماقتاستىق تۋرالى كەلىسىمگە ەڭ ءبىرىنشى قول قويعان بولاتىن. بىلتىر جىلدىڭ سوڭعى 9 ايىندا ەكىجاقتى تاۋار اينالىمى 24 ميلليارد دوللارعا جۋىقتاعان.

"The Qazaq Times"