قاماۋدا نەگىزسىز وتىرعان كۇيەۋىن قايتارۋدى تالاپ ەتكەن فاريدا قابىلبەك بۇگىن استاناداعى قىتاي ەلشىلىگىنە باردى.

ازاتتىقتىڭ حابارلاۋىنشا، «ءتىرى جەسىر» اتانىپ وتىرعان ازامات ۇستىنە كۇيەۋى تۋرالى مالىمەتتەر جازىلعان پلاكات ءىلىپ، جالعىز ادامدىق پيكەت وتكىزگەن.

بۇعان دەيىن قىتايدان كەلىپ، قازاقستان ازاماتتىعىن العان ايەل كۇيەۋى راحىمجان زەينوللانى بوساتۋدى تالاپ ەتىپ، قىتايدىڭ الماتىداعى كونسۋلدىعىنا دا بارعان. بىراق كونسۋلدىق قىزمەتكەرلەرى ەشقانداي رەاكتسيا بىلدىرمەگەن. ونىڭ ايتۋىنشا، كۇيەۋى ادام قۇقىقتارى ەداۋىر جاقسى قورعالعان ەلدەر «ادام حاقى تاپتالىپ جاتىر» دەپ ايىپتايتىن اسپان استى ەلىندە 13 جىل تۇرمەدە وتىرىپ، ارتىنان 1,5 جىل ساياسي لاگەرگە قامالعان.

سىرتقى ىستەر مينيسترلىگى 2003 جىلدان بەرى قازاقستان ازاماتى سانالاتىن زەينوللانىڭ ىسىنە قاتىستى قىتاي ەلشىلىگىنە رەسمي حات جولداعان. الماتى وبلىسىنىڭ ىشكى ىستەر دەپارتامەنتى كوشى-قون پوليتسياسى باسقارماسىنىڭ قۇجاتىندا «1963 جىلى قحر تۋىلعان زەينوللا راحىمجان قازاقستان رەسپۋبليكاسى پرەزيدەنتىنىڭ 2004 جىلعى 12 ناۋرىزداعى №1302 جارلىعىمەن قازاقستان رەسپۋبليكاسىنىڭ ازاماتى بولىپ سانالادى» دەپ راستالعان.

ۆەدومستۆو حابارلاماسىندا «ونى جازىقسىز ۇستاپ، «تىڭشى» دەگەن ايىپپەن 2004 جىلى 13 جىلعا سوتتاپ، تۇرمەگە قامادى. ودان سوڭ ءبىر جارىم جىل ساياسي لاگەردە ۇستادى، ال سودان كەيىن ۇيقاماقتا وتىرعانىنا ءبىر جىل، ءبىر اي بولدى», – دەلىنگەن.

بۇگىنگى اكتسيادا فاريدا قابىلبەكتىڭ قۇجاتتارىن قىتاي ەلشىلىگىن كۇزەتەتىن پوليتسيا قىزمەتكەرلەرى تەكسەردى. ول ەلشىلىكتىڭ قۇجات قابىلداۋ بولىمىنە كىردى.

ايەلىنىڭ ءسوزى بويىنشا، قىتاي ورگاندارى راحىجان زەينوللانى 2004 جىلى شىڭجاڭعا وزىمەن بىرگە قىدىرىپ بارعان كەزدە ۇستاپ، «تىڭشىلىقپەن اينالىسۋ» ايىبىمەن  ون ءۇش جىلعا سوتتالعان.

– قازاقستاندا وقىعىسى كەلگەن جيىرماعا جۋىق بالانىڭ قۇجاتتارىن جوندەۋگە، شەكارادان وتۋىنە كومەكتەستى. ونىڭ بار «قىلمىسى» – سول عانا، – دەيدى ول.

سوڭعى كەزدەرى قىتايداعى قىسىمنان قاشىپ كەلىپ جاتقان ەتنيكالىق قازاقتار قاتارى كوبەيگەن.

"The Qazaq Times"