شەكارانى زاڭسىز كەسىپ ءوتتى دەپ ايىپتالعان قاستەر مۇساحانۇلى مەن مۇراگەر ءالىمۇلىنىڭ ىسىنە قاتىستى سوت بۇگىن شقو زايسان قالاسىندا ءوتتى. سوت تورەشىسى قورعاۋشى ادۆوكات پەن ايىپتالۋشىلاردى قولداعان بەلسەندىلەردىڭ نارازىلىعىنا قاراماستان سوت وتىرىسىن 21 قاڭتارعا قالدىردى.

قاستەر مۇساحانۇلى مەن مۇراگەر ءالىمۇلىن قولداعان بەلسەندىلەر سەمەي مەن وسكەمەن قالالارىنان تىس ەلوردا مەن الماتىدان جانە شىمكەنت قالالارىنان بەلسەندىلەر سوت وتىرىسىنا قاتىستى. ولار ەكى ازاماتقا بوستاندىق بەرىلىپ، ەلدە قالدىرىلۋىن جانە سوت پروتسەسىنىڭ ءادىل ءوتۋىن تالاپ ەتىپ كەلگەن.

بۇگىنشى سوت وتىرىسىندا ق.مۇساحانۇلى مەن م.ءالىمۇلى وزدەرىنىڭ جانە تۋعان-تۋىستارىنىڭ قىتايدا قىسىم كورگەنىن، تولقۇجاتتارىن جەرگىلىكتى ۇكىمەت ورىندارى جيناپ العاندىقتان، قازاقستان شەكاراسىنان زاڭسىز وتۋگە ءماجبۇر بولعانىن جەتكىزدى. سونداي-اق، سوت وتىرىسىندا كۋالىك بەرگەن شەكارا قىزمەتىنىڭ وكىلى ماناس باۋىرجانۇلى ايىپتالۋشىلار شەكارادان كەسىپ وتتىك دەگەن 2 قازان كۇنى شەكارا بۇزۋ ءىسى تىركەلمەگەنىن ايتتى.

سوت وتىرىسىنان كەيىن بەلسەندىلەر پيكەت وتكىزىپ، سوت شەشىمىنە كەلىسپەيتىندەرىن ءبىلدىردى. ولار بيلىك وكىلدەرى بەلسەندىلەردىڭ سوت پروتسەسىن باقىلاۋىنا كەدەرگى كەلتىرۋ ءۇشىن سوت وتىرىسىن كەيىنگە قالدىرىپ وتىر دەگەن پىكىردە. بەلسەندىلەر كەلەسى سوت پروتسەسىنە ءتىپتى دە كوپ ازاماتتىق بەلسەندىلەردى قاتىسۋعا شاقىردى.

قورعاۋشى ادۆوكات پەن ايىپتالۋشىلاردى قولداعان بەلسەندىلەر سوت شەشىمىمەن كەلىسپەيتىنىن، وسىعان بايلانىستى جوعارى سوتقا جانە پرەزيدەنتكە شاعىمداناتىنىن جەتكىزدى.

“The Qazaq Times”